تہران

ایرانی ذرائع کے مطابق، ایران کے قانونی اور بین الاقوامی امور کے نائب وزیر خارجہ کاظم غریب آبادی مبینہ طور پر دارالحکومت میں ہونے والے برکس سربراہی اجلاس میں شرکت کے لیے ہندوستان آنے والے ہیں۔ اس سال برکس کی صدارت ہندوستان کے پاس ہے اور وہ 14 اور 15 مئی کو برکس وزرائے خارجہ اجلاس کی میزبانی کرے گا۔روس نے 29 اپریل کو کہا تھا کہ اس کے وزیر خارجہ سرگئی لاوروف برکس وزرائے خارجہ اجلاس میں شرکت کے لیے ہندوستان آئیں گے۔ ایکس  پر ایک پوسٹ میں روسی وزارت خارجہ نے کہا کہ وہ 14 اور 15 مئی کو ہندوستان میں موجود رہیں گے۔

 روسی وزارت خارجہ کی ترجمان ماریا زاخارووا نے کہا کہ یہ پروگرام موجودہ بین الاقوامی مسائل اور عالمی نظم و نسق کو مضبوط بنانے کے امکانات پر بامعنی گفتگو کے لیے ایک اہم پلیٹ فارم فراہم کرے گا۔انہوں نے کہا کہ 14 اور 15 مئی کو روسی وزیر خارجہ سرگئی لاوروف نئی دہلی میں برکس وزرائے خارجہ کی مکمل اجلاس میں شرکت کریں گے۔زاخارووا نے مزید کہا کہ ہندوستان کی صدارت میں ہونے والا یہ اجلاس موجودہ عالمی مسائل اور عالمی نظم و نسق کو مضبوط بنانے کے امکانات پر خاص طور پر اُن ممالک کے تناظر میں اہم تبادلۂ خیال کا موقع فراہم کرے گا جو عالمی اکثریت کی نمائندگی کرتے ہیں۔

انہوں نے کہا کہ 18ویں برکس سربراہی اجلاس کی تیاری کے سلسلے میں اسٹریٹجک شراکت داریوں کو فروغ دینے پر خصوصی توجہ دی جائے گی، جو اس ستمبر میں نئی دہلی میں منعقد ہوگا۔"

زاخارووا کے مطابق، برکس شراکت دار ممالک کے وزرائے خارجہ اجلاس کے دوران کئی سیشنز میں شرکت کریں گے۔ انہوں نے یہ بھی بتایا کہ نئی دہلی کے دورے کے دوران لاوروف کی اپنے ہندوستانی ہم منصب ایس جے شنکر کے ساتھ ملاقات بھی متوقع ہے۔انہوں نے کہا کہ بات چیت میں دوطرفہ تعلقات کے تمام پہلو شامل ہوں گے، جن میں اعلیٰ سطحی روابط کا شیڈول، تجارت، معیشت، سائنس، ٹیکنالوجی اور ثقافتی تعاون شامل ہیں۔ اس کے علاوہ روس۔ہندوستان بین الحکومتی کمیشن کے اجلاسوں کی تیاری پر بھی خصوصی توجہ دی جائے گی۔

ادھر، برکس کے نائب وزرائے خارجہ اور مشرق وسطیٰ و شمالی افریقہ کے لیے خصوصی نمائندوں کا اجلاس 23 اور 24 اپریل کو قومی دارالحکومت میں منعقد ہوا، جہاں موجودہ علاقائی صورتحال پر تبادلۂ خیال کیا گیا۔برکس دنیا کی گیارہ بڑی ابھرتی ہوئی معیشتوں اور ترقی پذیر ممالک کو ایک پلیٹ فارم پر لاتا ہے، جن میں برازیل، چین، مصر، ایتھوپیا، ہندوستان، انڈونیشیا، ایران، روس، سعودی عرب، جنوبی افریقہ اور متحدہ عرب امارات شامل ہیں۔یہ تنظیم عالمی اور علاقائی اہمیت کے حامل مسائل، نیز عالمی سیاسی اور اقتصادی نظم و نسق سے متعلق امور پر مشاورت اور تعاون کے لیے ایک مؤثر پلیٹ فارم کے طور پر کام کرتی ہے۔

ہندوستان، جس کے پاس 2026 میں برکس کی صدارت ہے، "لچک، اختراع، تعاون اور پائیداری کے لیے تعمیر" کے موضوع کے تحت اپنی ذمہ داریاں نبھا رہا ہے۔ یہ موضوع اُس عوامی اور انسانیت پر مبنی نقطۂ نظر کی عکاسی کرتا ہے جس کا اظہار وزیر اعظم نے 2025 میں ریو ڈی جنیرو میں منعقدہ 17ویں برکس سربراہی اجلاس کے دوران کیا تھا۔