نئی دہلی
عالمی سطح پر خام تیل کی قیمتوں میں تیز اضافے اور گزشتہ چار برسوں سے خوردہ قیمتیں مستحکم رہنے کے باعث بڑھتے خسارے کے درمیان سرکاری ذرائع نے مستقبل قریب میں پیٹرول اور ڈیزل کی قیمتوں میں اضافے کے امکان کو مسترد نہیں کیا ہے۔ سرکاری ذرائع نے جمعہ کو بتایا کہ بدلتے ہوئے حالات میں پیٹرول اور ڈیزل کی قیمتوں میں اضافہ ہونے کے امکان کو مکمل طور پر خارج نہیں کیا جا سکتا۔
بین الاقوامی بازار میں اس ہفتے خام تیل کی قیمتیں بڑھ کر 126 ڈالر فی بیرل کی چار سالہ بلند ترین سطح تک پہنچ گئی تھیں۔ اگرچہ اس میں کچھ کمی آئی ہے، لیکن قیمتیں اب بھی 110 ڈالر فی بیرل سے اوپر برقرار ہیں۔
آبنائے ہرمز کے راستے تیل بردار جہازوں کی آمد و رفت پر اثر اور ایران و امریکہ کے درمیان جاری کشیدگی کے باعث صورتحال غیر یقینی بنی ہوئی ہے۔ اس سے قبل انڈین آئل کارپوریشن (آئی او سی) نے پیٹرولیم صنعت کی جانب سے جاری بیان میں کہا تھا کہ عالمی توانائی قیمتوں میں اضافے کے باوجود پیٹرول، ڈیزل اور گھریلو ایل پی جی کی قیمتوں میں اضافہ نہیں کیا جا رہا۔
تاہم سرکاری تیل کمپنیوں نے کمرشیل ایل پی جی، صنعتی ڈیزل، پانچ کلوگرام ایل پی جی سلنڈر اور بین الاقوامی ایئرلائنز کو فراہم کیے جانے والے ہوائی ایندھن کی قیمتیں لاگت کے مطابق بڑھا دی ہیں۔ماہرین نے پہلے یہ خدشہ ظاہر کیا تھا کہ مغربی بنگال اسمبلی انتخابات کی ووٹنگ 29 اپریل کو ختم ہونے کے بعد پیٹرول اور ڈیزل کی قیمتوں میں 25 سے 28 روپے فی لیٹر تک اضافہ ہو سکتا ہے۔
دہلی میں اس وقت پیٹرول کی قیمت 94.77 روپے فی لیٹر اور ڈیزل کی قیمت 87.67 روپے فی لیٹر ہے۔28 فروری کو امریکہ اور اسرائیل کی جانب سے ایران پر حملے اور اس کے جواب میں ایران کی کارروائی کے بعد عالمی تیل بازار میں ہلچل مچی ہوئی ہے۔ اس صورتحال کے باعث عالمی تیل تجارت کے تقریباً پانچویں حصے کو سنبھالنے والی آبنائے ہرمز کے راستے سپلائی متاثر ہوئی ہے۔
