نئی دہلی

نئی دہلی میں غازی پور کی ایک کم عمر لڑکی کی موت کے معاملے پر سیاست گرم ہو گئی ہے۔ کانگریس پارٹی نے الزام لگایا ہے کہ متاثرہ خاندان سے ملاقات کے لیے جا رہے اس کے رہنماؤں کو انتظامیہ نے روک دیا اور اس کے ذمہ دار افسران کے خلاف مقدمہ درج کیا جانا چاہیے۔

پارٹی کے درج فہرست ذات (ایس سی) شعبہ کے صدر راجندر پال گوتم نے بتایا کہ وہ اپنے ساتھیوں کے ساتھ پیر کے روز غازی پور جا رہے تھے۔ ان کا کہنا ہے کہ وارانسی ہوائی اڈے پر انتظامیہ نے انہیں روک لیا اور حراست میں لے لیا۔ انہوں نے اسے بنیادی حقوق کی خلاف ورزی قرار دیا۔

واضح رہے کہ غازی پور میں 15 اپریل کو 17 سالہ لڑکی کی لاش دریائے گنگا میں ملی تھی۔ خاندان نے اس معاملے میں جنسی استحصال اور قتل کا الزام لگایا ہے۔ پولیس نے مرکزی ملزم کو گرفتار کر لیا ہے اور تحقیقات جاری ہیں۔راجندر پال گوتم نے کہا کہ ان کا وفد متاثرہ خاندان کو تعزیت پیش کرنے جا رہا تھا، لیکن ضلعی انتظامیہ نے دفعہ 163 کا حوالہ دے کر انہیں روک دیا۔ انہوں نے الزام لگایا کہ ایک طرف قانون متاثرہ کی شناخت ظاہر نہ کرنے کی بات کرتا ہے، جبکہ انتظامی حکم میں ہی اس کی شناخت سامنے آ گئی۔

کانگریس رہنماؤں کا کہنا ہے کہ انہیں نہ صرف روکا گیا بلکہ حراست میں لے کر تھانے بھی لے جایا گیا۔ پارٹی نے مطالبہ کیا ہے کہ جن افسران نے یہ کارروائی کی، ان کے خلاف قانونی اقدام کیا جائے۔