نئی دہلی
دہلی پولیس نے جنوبی دہلی کے مالویہ نگر میں واقع ایک ہوٹل میں پیش آنے والی ہولناک آتشزدگی کے معاملے میں مفرور جے مشرا کی تلاش کے لیے متعدد ٹیمیں تشکیل دی ہیں۔ اس سانحے میں 21 افراد اپنی جانوں سے ہاتھ دھو بیٹھے تھے۔ایک پولیس افسر نے جمعہ کو بتایا کہ تفتیشی اداروں نے جے مشرا کی تلاش تیز کر دی ہے، جس کے بارے میں شبہ ہے کہ آگ لگنے والے ہوٹل کے انتظام و انصرام اور اس کی سرگرمیوں میں اس کا اہم کردار تھا۔
پولیس ذرائع کے مطابق جے مشرا کو گرفتار کرنے کے لیے دہلی اور پڑوسی ریاستوں کے مختلف مقامات پر کئی ٹیمیں تعینات کی گئی ہیں۔افسر نے کہا کہ اس کی موجودگی کا سراغ لگانے کے لیے تکنیکی نگرانی اور دیگر تفتیشی طریقوں کا بھی استعمال کیا جا رہا ہے۔جاری تحقیقات کے تحت پولیس ان ہوٹل ملازمین اور دیگر کارکنوں کی بھی تلاش کر رہی ہے جو واقعے کے وقت ہوٹل میں موجود تھے یا اس سے وابستہ تھے۔
تفتیش کار ان کے بیانات قلمبند کرنا چاہتے ہیں تاکہ آگ لگنے سے پہلے کے واقعات کی مکمل ترتیب معلوم کی جا سکے اور ہوٹل کے انتظامی معاملات کے بارے میں معلومات حاصل کی جا سکیں۔
انہوں نے کہا کہ تحقیقات میں کئی پہلوؤں کا جائزہ لیا جا رہا ہے، جن میں حفاظتی ضوابط کی پابندی، عمارت کا نقشہ، ہنگامی اخراج کے انتظامات اور وہ حالات شامل ہیں جن کی وجہ سے مہمان عمارت کے اندر پھنس گئے تھے۔
پولیس اب تک ہوٹل سے وابستہ کئی افراد سے پوچھ گچھ کر چکی ہے اور جائیداد سے متعلق دستاویزات کا بھی معائنہ کیا گیا ہے۔ اس کے علاوہ زندہ بچ جانے والے افراد اور عینی شاہدین کے بیانات بھی ریکارڈ کیے جا رہے ہیں۔واضح رہے کہ بدھ کی صبح مالویہ نگر کی ایک تنگ گلی میں واقع اس ہوٹل میں اچانک خوفناک آگ بھڑک اٹھی تھی، جس کے نتیجے میں 21 افراد ہلاک اور متعدد دیگر زخمی ہو گئے تھے۔
پولیس کا کہنا ہے کہ معاملے کی مزید تحقیقات جاری ہیں۔
.webp "دہلی آتشزدگی: پولیس نےاہم ملزمین کی تلاش تیز کی")
