نئی دہلی: وزیر اعظم نریندر مودی 17 ستمبر کو ’سواستھ ناری، شکتی پرورک پریوار ابھیان‘ اور آٹھواں پوشن ماہ لانچ کریں گے، جو ملک بھر میں خواتین، نوعمر بچیوں اور بچوں کی صحت و تغذیہ خدمات کو مضبوط بنانے کی سمت ایک تاریخی قدم ہے۔یہ مہم وزارتِ صحت و خاندانی بہبود(MoHFW) اور وزارتِ خواتین و اطفال ترقی(MoWCD) کی مشترکہ قیادت میں چلائی جا رہی ہے، جو خواتین اور بچوں کی صحت و غذائیت کے تئیں دونوں وزارتوں کے عزم کو ظاہر کرتی ہے۔

وزارتِ صحت پورے ملک میں ہیلتھ کیمپوں اور سہولتوں کے ذریعے احتیاطی، ترویجی اور علاجی خدمات کی فراہمی کی ذمے داری سنبھالے گی، جبکہ وزارتِ خواتین و اطفال ترقی آنگن واڑی مراکز کے ذریعے خواتین اور بچیوں کو متحرک کرے گی، پوشن ماہ کی سرگرمیوں کو مہم کے ساتھ جوڑے گی اور بڑے پیمانے پر غذائیت سے متعلق مشاورت اور ترکیبوں کے عملی مظاہرے کی قیادت کرے گی۔ دونوں وزارتیں خون کی کمی کی روک تھام، متوازن غذا اور ماہواری کی صحت سے متعلق بیداری مہم بھی چلائیں گی تاکہ خواتین اور نوعمر بچیوں کی صحت و غذائیت کی ضروریات کو جامع انداز میں پورا کیا جا سکے۔

’سواستھ ناری، شکتی پرورک پریوار ابھیان‘ وزیر اعظم کے وژن صحت، پوشن، فٹنس اور 2047 تک ایک وکست بھارت (ترقی یافتہ بھارت) کو آگے بڑھانے کی کوشش ہے۔ یہ ملک گیر مہم برادری کی سطح پر خواتین مرکوز احتیاطی، ترویجی اور علاجی صحت خدمات فراہم کرے گی۔

اس کے تحت غیر متعدی امراض، خون کی کمی، تپ دق اور سیکل سیل بیماری کی اسکریننگ، ابتدائی تشخیص اور علاجی روابط کو مضبوط بنایا جائے گا، ساتھ ہی ماں، بچے اور نوعمر صحت کو بہتر بنانے کے لیے قبل از ولادت نگہداشت، ٹیکہ کاری، تغذیہ، ماہواری کی صحت، طرزِ زندگی اور ذہنی صحت سے متعلق سرگرمیوں کو بھی فروغ دیا جائے گا۔

اسی کے ساتھ یہ مہم صحت مند طرزِ زندگی اپنانے کی طرف برادری کو متحرک کرے گی، خاص طور پر موٹاپے کی روک تھام، بہتر غذائیت اور رضاکارانہ خون عطیہ پر زور دیا جائے گا۔وزیرِ صحت جے پی نڈا نے ایک پوسٹ میں کہا کہ اس پہل کا مقصد ملک بھر میں خواتین اور بچوں کے لیے صحت کی خدمات کو مضبوط بنانا ہے، تاکہ معیاری علاج تک بہتر رسائی اور زیادہ بیداری پیدا ہو۔ انہوں نے نجی اسپتالوں اور صحت کے شعبے سے وابستہ فریقین سے اپیل کی کہ وہ اس ’جن بھاگیداری ابھیان‘ کا حصہ بنیں۔یہ مہم 17 ستمبر سے 2 اکتوبر تک آیوشمان آروگیہ مندر، کمیونٹی ہیلتھ سینٹرز(CHCs)، ضلعی اسپتالوں اور دیگر سرکاری صحت سہولتوں پر منظم کی جائے گی۔

اس دوران ایک لاکھ سے زیادہ ہیلتھ کیمپ منعقد ہوں گے، جو ملک میں خواتین اور بچوں کے لیے سب سے بڑی ہیلتھ آؤٹ ریچ ہوگی۔ تمام سرکاری صحت مراکز میں روزانہ ہیلتھ کیمپ لگائے جائیں گے۔اس مہم میں مرکزی و ریاستی وزراء، ارکانِ پارلیمان اور عوامی نمائندے شریک ہوں گے۔ آشا ورکرز، اے این ایمز، آنگن واڑی ورکرز، سیلف ہیلپ گروپس، پنچایتی راج ادارے، شہری بلدیات، مائی بھارت والنٹیئرز اور نوجوانوں کے گروپ برادری کی سطح پر متحرک کردار ادا کریں گے۔ماہرین کی خدمات بشمول امراضِ نسواں، اطفال، آنکھ، کان، دانت، امراضِ جلد اور نفسیات کو میڈیکل کالجوں، ضلعی اسپتالوں، مرکزی اداروں اور نجی اسپتالوں کے ذریعے فراہم کیا جائے گا۔

ایمس، دفاع اور ریلوے اسپتال، ای ایس آئی سی اسپتال، سی جی ایچ ایس مراکز اور دیگر قومی ادارے بھی اس مہم میں شامل ہوں گے تاکہ خصوصی خدمات اور علاج کی تسلسل کو دور دراز علاقوں تک پہنچایا جا سکے۔ کئی نجی اسپتالوں نے بھی اس مہم کو تعاون دینے کی پیشکش کی ہے، جس سے اس کی رسائی اور معیار مزید وسیع ہو جائے گا۔