نئی دہلی: وزیرِ اعظم نریندر مودی 5 جون 2026 کو گجرات اور دمن کے دورے پر جائیں گے، جہاں وہ ہزاروں کروڑ روپے مالیت کے ترقیاتی منصوبوں کا افتتاح کریں گے، مختلف منصوبوں کا سنگِ بنیاد رکھیں گے اور عوامی اجتماعات سے خطاب بھی کریں گے۔ وزیرِ اعظم دوپہر تقریباً ڈھائی بجے ضلع سورت کے علاقے ہزیرہ پہنچ کر جاری صنعتی سرگرمیوں اور بنیادی ڈھانچے کے منصوبوں کا جائزہ لیں گے۔
اس کے بعد شام سوا چار بجے سورت میں تقریباً 18 ہزار 800 کروڑ روپے مالیت کے مختلف منصوبوں کا افتتاح، قوم کے نام وقف اور سنگِ بنیاد رکھیں گے۔ سورت میں سڑکوں، بجلی اور صنعت سے متعلق متعدد اہم منصوبے شامل ہیں۔ وزیرِ اعظم ودودرا-ممبئی ایکسپریس وے کے پیکیج ششم اور ہفتم قوم کے نام وقف کریں گے، جس سے گجرات اور مہاراشٹر کے درمیان تیز رفتار آمدورفت، تجارتی نقل و حمل اور اقتصادی روابط کو فروغ ملے گا۔
وہ قومی شاہراہ 56 کے اہم حصوں کو چار رویہ بنانے کے منصوبے کا سنگِ بنیاد بھی رکھیں گے، جس سے قبائلی علاقوں میں رابطہ بہتر ہوگا اور اسٹیچو آف یونٹی تک رسائی مزید آسان ہو جائے گی۔ دورے کے دوران وزیرِ اعظم سورت میں 200 بستروں پر مشتمل جدید ای ایس آئی سی اسپتال کا افتتاح بھی کریں گے، جہاں مختلف طبی شعبوں، مرکزی تجربہ گاہ اور چوبیس گھنٹے ہنگامی و حادثاتی طبی سہولیات دستیاب ہوں گی۔
اس کے علاوہ وہ گجرات میں بجلی کی ترسیلی صلاحیت بڑھانے، والساد میں بجلی کی تقسیم کے نظام کو جدید بنانے، داہیج اور ساریگام کے صنعتی علاقوں میں فضلہ صاف کرنے اور نکاسی کے جدید منصوبوں کے ساتھ جامبوسر بلک ڈرگ پارک میں بنیادی سہولیات کے منصوبوں کا بھی افتتاح کریں گے۔ بعد ازاں وزیرِ اعظم دمن روانہ ہوں گے، جہاں شام تقریباً سوا چھ بجے نامو ہوائی اڈے کی نئی ٹرمینل عمارت کا افتتاح کریں گے اور نامو اسپتال قوم کے نام وقف کریں گے۔
اس کے بعد شام سوا سات بجے وہ تقریباً 2 ہزار 970 کروڑ روپے مالیت کے مختلف ترقیاتی منصوبوں کا افتتاح، سنگِ بنیاد اور قوم کے نام وقف کرنے کی تقریبات میں شرکت کریں گے اور عوامی اجتماع سے خطاب بھی کریں گے۔ دمن میں صحت، شہری ہوا بازی، سیاحت، بنیادی ڈھانچے، رابطہ کاری اور عوامی فلاح سے متعلق منصوبے شامل ہیں، جن سے دادرا و نگر حویلی اور دمن و دیو کی مجموعی ترقی کو فروغ ملنے کی توقع ہے۔
ان منصوبوں میں تقریباً ایک ہزار 340 کروڑ روپے مالیت کے وہ منصوبے شامل ہیں جن کا افتتاح کیا جائے گا، جبکہ تقریباً ایک ہزار 630 کروڑ روپے کے منصوبوں کا سنگِ بنیاد رکھا جائے گا۔ ان میں ایک شاندار پل، دمن کنونشن سینٹر اور قومی ادارۂ فیشن ٹیکنالوجی (نفٹ) کا کیمپس بھی شامل ہے، جن سے سیاحت، سرمایہ کاری، روزگار کے مواقع اور عوام کے معیارِ زندگی میں بہتری آنے کی توقع ہے۔ وزیرِ اعظم لکشدیپ میں تقریباً 885 کروڑ روپے مالیت کے بندرگاہی منصوبوں کا سنگِ بنیاد بھی رکھیں گے۔
کلپینی اور کدمت جزائر میں تعمیر ہونے والی جدید جیٹیوں کے ذریعے بڑے مسافر بردار اور کروز جہاز سال بھر لنگر انداز ہو سکیں گے، جبکہ ماہی گیری، ایندھن کی فراہمی، برف کی دستیابی اور کشتیوں کی مرمت جیسی سہولیات بھی فراہم کی جائیں گی۔ ان منصوبوں سے سمندری رابطے مضبوط ہوں گے، ماہی گیروں کی روزی روٹی میں بہتری آئے گی، سیاحت کو فروغ ملے گا اور جزائر کی سماجی و اقتصادی ترقی میں مدد ملے گی۔
