نئی دہلی: عام آدمی پارٹی کے قومی کنوینر اروند کیجریوال نے منگل کے روز وزیراعظم نریندر مودی کی جانب سے تجویز کردہ کفایتی اقدامات پر سوال اٹھاتے ہوئے کہا کہ حکومت کو ملک کی معیشت کی اصل صورتحال عوام کے سامنے رکھنی چاہیے۔

کیجریوال نے ایک پریس کانفرنس میں کہا کہ بھارت نے ماضی میں جنگوں سمیت کئی بحرانوں کا سامنا کیا ہے، لیکن اس سے پہلے کسی بھی وزیراعظم نے اتنے سخت اور غیر معمولی اقدامات کا اعلان نہیں کیا تھا اور عوام سے ان پر عمل کرنے کی اپیل نہیں کی تھی۔

انہوں نے دعویٰ کیا کہ وزیراعظم مودی کے حالیہ کفایتی اقدامات کے پیچھے امریکہ اور ایران کے درمیان کشیدگی جیسے عوامل ہو سکتے ہیں، تاہم انہوں نے یہ بھی سوال اٹھایا کہ “ملک کی معیشت کی خرابی کی اصل وجوہات کچھ اور بھی ہو سکتی ہیں جنہیں چھپایا جا رہا ہے۔”

سابق وزیراعلیٰ دہلی نے یہ بھی کہا کہ تمام کفایتی اقدامات کا بوجھ صرف متوسط طبقے پر کیوں ڈالا جا رہا ہے، جبکہ وزیراعظم، وزراء، اعلیٰ حکام اور امیروں سے ایسی قربانیوں کی توقع کیوں نہیں کی جاتی۔ واضح رہے کہ وزیراعظم نے حال ہی میں عوام سے سونے کی خریداری میں احتیاط، غیر ضروری بیرون ملک سفر سے گریز اور پٹرول کے استعمال میں کمی جیسے اقدامات کی اپیل کی تھی۔ اپوزیشن نے ان بیانات کو حکومت کی معاشی پالیسیوں کی ناکامی قرار دیتے ہوئے تنقید کا نشانہ بنایا ہے۔