وزیر اعظم مودی نے لکھا کہ سومناتھ سوابھیمان پرو آج سے مبارک انداز میں شروع ہو رہا ہے۔ ایک ہزار سال پہلے، جنوری 1026 میں، سومناتھ مندر نے اپنی تاریخ کا پہلا حملہ برداشت کیا۔ 1026 کے حملے اور اس کے بعد ہونے والے متعدد حملے ہماری ابدی عقیدت کو متزلزل نہ کر سکے۔ اس کے برعکس، انہوں نے ہندوستان کی ثقافتی یکجہتی کے جذبے کو مزید تقویت دی، اور سومناتھ مندر بار بار زندہ ہوا اور دوبارہ تعمیر کیا گیا۔ میں سومناتھ کے اپنے پچھلے دوروں کی چند تصاویر شیئر کر رہا ہوں۔

اس موقع کو یادوں کا تہوار قرار دیتے ہوئے وزیر اعظم نے کہا کہ سوابھیمان پرو ان بے شمار ہندوستانیوں کو خراجِ عقیدت پیش کرتا ہے جنہوں نے مشکل اور خوفناک حالات کے باوجود کبھی اپنے اصولوں اور اقدار پر سمجھوتہ نہیں کیا۔

انہوں نے اس بات پر زور دیا کہ ہندوستانی تہذیب اور ثقافتی شعور کے ساتھ ان کی غیر متزلزل وابستگی ہمیشہ برقرار رہی، جو قومی یکجہتی کے لیے مسلسل عزم و حوصلے کی تحریک دیتی ہے۔

وزیر اعظم نے کہا کہ سومناتھ سوابھیمان پرو کا یہ موقع ان بے شمار مادرِ وطن کے سپوتوں کو یاد کرنے کا تہوار ہے جنہوں نے کبھی اپنے اصولوں اور اقدار پر سمجھوتہ نہیں کیا۔ حالات چاہے کتنے ہی مشکل اور خوفناک کیوں نہ ہوں، ان کا عزم ہمیشہ اٹل رہا۔ ہماری تہذیب اور ثقافتی شعور کے ساتھ ان کی وفاداری کبھی کمزور نہیں ہوئی۔ ہزار سالہ غیر منقطع عقیدے کا یہ موقع ہمیں قوم کی یکجہتی کے لیے مسلسل کوششوں کی ترغیب دیتا ہے۔

وزیر اعظم مودی نے 31 اکتوبر 2001 کو سومناتھ میں منعقد ایک پروگرام کی جھلکیاں بھی شیئر کیں، جو 1951 میں مندر کی ازسرِنو تعمیر اور افتتاح کی 50ویں سالگرہ کے موقع پر منعقد کیا گیا تھا۔

انہوں نے یاد دلایا کہ 1951 کی تاریخی تقریب اس وقت کے صدر ڈاکٹر راجندر پرساد کی موجودگی میں منعقد ہوئی تھی، اور سومناتھ مندر کی تعمیرِ نو میں سردار ولبھ بھائی پٹیل اور کے۔ ایم۔ منشی جیسے عظیم رہنماؤں کی نمایاں خدمات کو سراہا۔

وزیر اعظم نے اپنی پوسٹ میں مزید کہا کہ میں آپ کے ساتھ 31 اکتوبر 2001 کو سومناتھ میں منعقد ایک پروگرام کی کچھ جھلکیاں بھی شیئر کر رہا ہوں۔ وہ سال سومناتھ مندر کے افتتاح کی 50ویں سالگرہ کا تھا، جو 1951 میں ازسرِنو تعمیر کیا گیا تھا۔ 1951 میں وہ تاریخی تقریب اُس وقت کے صدر ڈاکٹر راجندر پرساد جی کی موجودگی میں ہوئی تھی۔ سومناتھ مندر کی تعمیرِ نو میں سردار پٹیل اور کے۔ ایم۔ منشی جی سمیت عظیم شخصیات کی کوششیں نہایت قابلِ تحسین تھیں۔ 2001 کے اس پروگرام میں اُس وقت کے وزیر اعظم اٹل جی اور وزیر داخلہ اڈوانی جی سمیت کئی معزز شخصیات نے شرکت کی تھی۔ سال 2026 میں ہم 1951 کی عظیم تقریب کی 75ویں سالگرہ بھی منا رہے ہیں۔

وزیر اعظم نریندر مودی 11 جنوری کو سومناتھ مندر کا دورہ کریں گے اور سومناتھ سوابھیمان پرو کی تقریبات میں شرکت کریں گے۔سومناتھ سوابھیمان پرو 8 جنوری سے 11 جنوری تک منایا جائے گا، جس کے دوران ہندوستان کی روحانی وراثت، ثقافتی فخر اور سماجی اقدار کو اجاگر کرنے والے مختلف پروگرام منعقد کیے جائیں گے۔