وڈودرا (گجرات): وزیر اعظم نریندر مودی نے منگل کو ڈبل اسٹیک کنٹینر مال بردار ٹرینوں کے فوائد بیان کرتے ہوئے اپوزیشن پر طنز کیا۔ انہوں نے ان ناقدین کو ’’ناراض پھوپھا‘‘ قرار دیا جو یہ سوال اٹھاتے ہیں کہ ڈیڈیکیٹڈ فریٹ کوریڈور بننے سے ٹرک ڈرائیوروں اور ٹرک مالکان کا کیا ہوگا۔ وڈودرا میں ’نمو فار وکست بھارت‘ پروگرام سے خطاب کرتے ہوئے وزیر اعظم نے بتایا کہ حال ہی میں ممبئی کے جواہر لال نہرو پورٹ ٹرسٹ (جے این پی ٹی) سے وڈودرا تک ڈبل اسٹیک کنٹینر مال بردار ٹرین چلائی گئی، جس میں ایک کنٹینر کے اوپر دوسرا کنٹینر رکھا گیا تھا۔ ایک ہی سفر میں اس ٹرین کے ذریعے اتنا سامان منتقل کیا گیا جو 250 سے زیادہ ٹرکوں کے برابر تھا۔

مودی نے کہا، ’’اب ’ناراض پھوپھا‘ میدان میں آتے ہیں، جو فوراً شکایت شروع کر دیتے ہیں کہ ٹرک ڈرائیوروں کا کیا ہوگا؟ ٹرک کہاں جائیں گے؟ جن لوگوں نے ٹرک خریدے ہیں، ان کا کیا ہوگا؟ اب پھوپھا کو شکایت کرنے کے لیے کچھ مل گیا ہے۔‘‘ وزیر اعظم نے 2014 سے قبل ڈیڈیکیٹڈ فریٹ کوریڈور کی صورت حال کا ذکر کرتے ہوئے کہا کہ اس سے پہلے کی حکومت کے سات سے آٹھ سالہ دور میں اس منصوبے کا ایک کلومیٹر کام بھی مکمل نہیں ہو سکا تھا۔

انہوں نے کہا کہ 2014 کے بعد گجرات میں حاصل اپنے تجربات اور سیکھے گئے اسباق کی بنیاد پر اس منصوبے کے کام میں تیزی لائی گئی۔ مودی نے کہا، ’’2014 میں وڈودرا، گجرات اور ملک کے عوام نے مجھے گجرات سے دہلی بھیجا۔ اس وقت پچھلی حکومت اقتدار میں تھی۔ آپ نے مجھے دہلی بھیجا اور ان کی رخصتی ہوئی۔ حقیقت یہ تھی کہ نوجوان دوستو، میری بات غور سے سنیں اور اسے یاد رکھیں، ان سات سے آٹھ برسوں میں فریٹ کوریڈور کا ایک کلومیٹر کام بھی مکمل نہیں ہو سکا تھا۔‘

‘ انہوں نے مزید کہا، ’’اگر ملک ان کے طریقہ کار کے مطابق چلتا تو معلوم نہیں آپ کی تین یا چار نسلوں کے بعد بھی یہ کام مکمل ہوتا یا نہیں۔ یہ ایسے منصوبے کی حالت تھی جس سے ہندوستان کے لاجسٹکس نظام میں انقلاب لانے کی توقع تھی۔‘‘ مودی نے کہا کہ 2014 کے بعد گجرات سے ملنے والی تعلیم و تربیت، اس سرزمین سے حاصل ہونے والے اسباق اور لوگوں سے سیکھی گئی باتیں وہ اپنے ساتھ دہلی لے کر گئے اور وہاں پہنچتے ہی اس منصوبے کو تیز رفتاری سے مکمل کرنے پر کام شروع کر دیا۔ وزیر اعظم نے کہا کہ ڈیڈیکیٹڈ فریٹ کوریڈور کی تکمیل نے ہندوستان کے نقل و حمل کے شعبے کو تبدیل کر دیا ہے۔

ایسٹرن اور ویسٹرن ڈیڈیکیٹڈ فریٹ کوریڈور اب ملک کی تجارت اور کاروبار کی ریڑھ کی ہڈی بن رہے ہیں۔ انہوں نے کہا کہ ڈیڈیکیٹڈ فریٹ کوریڈور نے مال برداری کی رفتار اور کارکردگی میں نمایاں بہتری لائی ہے، جس سے سفر کا وقت، ایندھن کا استعمال اور لاجسٹکس کے اخراجات کم ہوئے ہیں اور ماحول کو بھی فائدہ پہنچا ہے۔ مودی نے کہا، ’’آج 2,800 کلومیٹر طویل کوریڈور کا کام کامیابی سے مکمل ہو چکا ہے۔ ایسٹرن اور ویسٹرن ڈیڈیکیٹڈ فریٹ کوریڈور اب ملک کی تجارت اور کاروبار کی ریڑھ کی ہڈی بنتے جا رہے ہیں۔ ڈیڈیکیٹڈ فریٹ کوریڈور تیزی سے ترقی کرتے ہندوستان کے لیے لائف لائن ہے اور اس نے ملک کے ٹرانسپورٹ نظام کو تبدیل کر دیا ہے۔‘‘

انہوں نے کہا کہ پہلے مال بردار ٹرینیں مسافر ٹرینوں کے ساتھ ایک ہی پٹری استعمال کرتی تھیں، جس کی وجہ سے مسافر اور مال بردار دونوں ٹرینوں کی رفتار کم رہتی تھی، لیکن ڈیڈیکیٹڈ فریٹ کوریڈور نے صورت حال بدل دی ہے۔ مودی کے مطابق، آج ایسٹرن اور ویسٹرن کوریڈور پر روزانہ 430 سے زیادہ مال بردار ٹرینیں چل رہی ہیں۔ جو مال بردار ٹرین پہلے 100 کلومیٹر کا فاصلہ طے کرنے میں ساڑھے چھ گھنٹے لیتی تھی، وہ اب یہی فاصلہ نصف سے بھی کم وقت میں طے کر لیتی ہے۔ انہوں نے کہا کہ ٹرک کے ذریعے عموماً 30 گھنٹے میں مکمل ہونے والا سفر ڈیڈیکیٹڈ فریٹ کوریڈور پر صرف 10 سے 12 گھنٹے میں مکمل ہو جاتا ہے۔

اس کے نتیجے میں ٹرکوں اور ٹرینوں دونوں کے ایندھن کی بچت ہوتی ہے، مال برداری کے اخراجات کم ہوتے ہیں، وقت کی بچت ہوتی ہے اور ماحول کو بھی فائدہ پہنچتا ہے۔ وزیر اعظم نے مزید کہا کہ حکومت مسابقتی امتحانات کی تیاری کرنے والے طلبہ کے لیے ملک کے بہترین اساتذہ کے ذریعے مفت آن لائن کوچنگ فراہم کرنے کی سمت میں بھی آگے بڑھ رہی ہے، تاکہ غریب اور متوسط طبقے کے خاندانوں پر مالی بوجھ کم کیا جا سکے۔ انہوں نے کہا کہ دنیا تیزی سے بدل رہی ہے اور اس کے ساتھ ضروریات بھی تبدیل ہو رہی ہیں۔ اسی طرح تعلیم اور سیکھنے کے طریقے بھی بدل رہے ہیں۔ پہلے پوری توجہ صرف ڈگریوں پر ہوتی تھی، لیکن اب ڈگری کے ساتھ ہنر پر بھی توجہ دی جا رہی ہے اور ہنر کی اہمیت بڑھ رہی ہے۔

مودی نے کہا کہ ہر سال متوسط طبقے کے خاندانوں کی آمدنی کا ایک بڑا حصہ بچوں کی کوچنگ پر خرچ ہوتا ہے۔ حکومت کی کوشش ہے کہ غریب اور متوسط طبقے کے خاندان اپنی محنت کی کمائی بچا سکیں۔ اسی لیے حکومت ملک کے بہترین اساتذہ کے ذریعے طلبہ کے لیے مفت آن لائن کوچنگ کا نظام فراہم کرنے کی سمت میں آگے بڑھ رہی ہے۔ وزیر اعظم نے کہا کہ مسابقتی امتحانات کی تیاری کرنے والے نوجوانوں کی کوچنگ کا خرچ اب حکومت خود برداشت کرنے کی سمت میں کام کر رہی ہے۔ مودی نے وڈودرا میں 35 ہزار کروڑ روپے سے زیادہ مالیت کے ترقیاتی منصوبوں کا سنگ بنیاد رکھا اور کئی منصوبوں کا افتتاح بھی کیا۔ ان میں ویسٹرن ڈیڈیکیٹڈ فریٹ کوریڈور کے تین اہم حصے، ریلوے اور ہائی وے کے منصوبے اور گجرات حکومت کے مختلف ترقیاتی منصوبے شامل ہیں۔