نئی دہلی: پارلیمنٹ کے مانسون اجلاس کے آغاز سے قبل وزیر اعظم نریندر مودی پیر کی صبح 10:15 بجے پارلیمنٹ ہاؤس کے ہنس دوار پر میڈیا سے خطاب کریں گے۔

پارلیمنٹ کا مانسون اجلاس 20 جولائی سے شروع ہو کر 13 اگست تک جاری رہے گا۔ یوم آزادی کی تقریبات کے پیش نظر اجلاس کے دوران مختصر وقفہ رکھا جائے گا جس کے بعد ضرورت پڑنے پر دونوں ایوانوں کی کارروائی دوبارہ شروع کی جا سکتی ہے۔اجلاس کے دوران مرکزی حکومت لوک سبھا میں غیر ملکی عطیات ضابطہ ترمیمی بل 2026 اور وکست بھارت شکشا ادھشٹھان بل 2025 پیش کرنے کا ارادہ رکھتی ہے۔ لوک سبھا کے سیکریٹری جنرل کی جانب سے جاری بلیٹن میں اس کی اطلاع دی گئی ہے۔

غیر ملکی عطیات ضابطہ ترمیمی بل کے تحت کسی تنظیم کا ایف سی آر اے سرٹیفکیٹ مدت ختم ہونے۔ تجدید نہ ہونے یا حکومت کی جانب سے تجدید سے انکار کی صورت میں خود بخود ختم ہو جائے گا۔ اس کے علاوہ مجوزہ قانون میں غیر ملکی عطیات اور ان سے وابستہ اثاثوں کی نگرانی۔ انتظام اور تصرف کے لیے ایک بااختیار ادارہ قائم کرنے کی بھی تجویز دی گئی ہے۔یہ بل کیرالم اسمبلی انتخابات سے قبل ایک اہم سیاسی مسئلہ بن گیا ہے کیونکہ ریاست میں بڑی مسیحی آبادی موجود ہے اور متعدد غیر سرکاری تنظیمیں ایف سی آر اے کے تحت غیر ملکی فنڈز حاصل کرتی ہیں۔

دوسری جانب وکست بھارت شکشا ادھشٹھان بل 2025 کے ذریعے موجودہ یونیورسٹی گرانٹس کمیشن۔ آل ہند تکنیکی تعلیم کونسل اور قومی کونسل برائے اساتذہ تعلیم کی جگہ ایک نیا اعلیٰ تعلیمی ضابطہ کار ادارہ قائم کرنے کی تجویز ہے۔اس بل کے تحت پہلی مرتبہ قومی اہمیت کے اداروں کو بھی ضابطہ جاتی نگرانی کے دائرے میں لایا جائے گا جبکہ اب تک یہ ادارے بڑی حد تک اس نگرانی سے باہر تھے۔

بل کی دفعہ 15 کی شق 3 کے تحت مجوزہ اعلیٰ تعلیمی کمیشن کو مرکزی حکومت کی پالیسی ہدایات پر عمل کرنا لازم ہوگا اور اختلاف کی صورت میں حکومت کا فیصلہ حتمی تصور کیا جائے گا۔ اس شق پر تنقید کی جا رہی ہے تاہم مرکزی وزیر تعلیم دھرمیندر پردھان کا کہنا ہے کہ یہ موجودہ قانونی نظام میں کسی بنیادی تبدیلی کی نمائندگی نہیں کرتی۔یہ بل ایسے وقت میں پارلیمنٹ میں پیش کیا جا رہا ہے جب دھرمیندر پردھان کو نیٹ یو جی سوالیہ پرچہ افشا ہونے کے معاملے پر شدید تنقید کا سامنا ہے۔

حکومت نے مانسون اجلاس کے دوران معیشت سے متعلق آمدنی ٹیکس ترمیمی بل 2026 اور خرد۔ چھوٹے اور درمیانے درجے کے صنعتوں کی ترقی ترمیمی بل 2026 کو بھی اہم قانون سازی میں شامل کیا ہے۔ادھر کانگریس اور دیگر حزب اختلاف کی جماعتوں نے اعلان کیا ہے کہ وہ پارلیمنٹ میں ایودھیا رام مندر چندہ خرد برد معاملہ۔ نیٹ یو جی سمیت مختلف امتحانات کے پرچے افشا ہونے کے واقعات۔ ای 20 ایندھن کی پالیسی اور ہندوستان کی خارجہ پالیسی جیسے معاملات کو بھرپور انداز میں اٹھائیں گی۔