نئی دہلی/ آواز دی وائس

وزیر اعظم نریندر مودی نے جمعہ کے روز نئی دہلی کے اندرا گاندھی انڈور اسٹیڈیم میں قومی گیت "وندے ماترم" کی سال بھر جاری رہنے والی تقریبات کا افتتاح کیا۔ اس موقع پر وزیر اعظم نے یادگاری ڈاک ٹکٹ اور سکے بھی جاری کیے۔

وزیر اعظم مودی نے قومی گیت "وندے ماترم" کے 150 سال مکمل ہونے کے موقع پر ایک خصوصی پورٹل کا بھی آغاز کیا۔ اس جشن کے دوران پورے ملک میں عوامی مقامات پر شہریوں نے "وندے ماترم" کے مکمل ورژن کا اجتماعی طور پر گانا گایا، جس میں سماج کے تمام طبقوں نے بڑھ چڑھ کر حصہ لیا۔ وزیر اعظم مودی نے بھی اندرا گاندھی انڈور اسٹیڈیم میں منعقدہ مرکزی پروگرام کے دوران عوام کے ساتھ "وندے ماترم" کا اجتماعی گیت گایا۔

اس موقع پر مرکزی وزیر گجیندر سنگھ شیخاوت، دہلی کے لیفٹیننٹ گورنر ونے سکسینہ اور دہلی کی وزیر اعلیٰ ریکھا گپتا بھی موجود تھیں۔ یہ پروگرام 7 نومبر 2025 سے 7 نومبر 2026 تک ایک سالہ قومی تقریب کے باضابطہ آغاز کی نشاندہی کرتا ہے، جس میں اس لازوال تخلیق کے 150 سال مکمل ہونے کا جشن منایا جا رہا ہے ایک ایسا گیت جس نے ہندوستان کی آزادی کی تحریک کو متاثر کیا اور آج بھی قومی اتحاد و فخر کی علامت ہے۔

وزیر اعظم کے دفتر (پی ایم او) کی جانب سے جاری بیان کے مطابق، سال 2025 "وندے ماترم" کے 150 سال مکمل ہونے کا سال ہے۔ قومی گیت "وندے ماترم" بنکم چندر چٹرجی نے 7 نومبر 1875 کو اکشے نوامی کے دن تحریر کیا تھا۔ یہ گیت سب سے پہلے ادبی جریدے "بانگ درشن" میں ان کے ناول "آنند مٹھ" کے حصے کے طور پر شائع ہوا تھا۔ یہ گیت مادرِ وطن کو طاقت، خوشحالی اور تقدس کی علامت کے طور پر پیش کرتا ہے، اور ہندوستان کے اتحاد و خود داری کے بیدار روح کو شاعرانہ انداز میں ظاہر کرتا ہے۔

یہ گیت جلد ہی قوم سے عقیدت کی ایک دائمی علامت بن گیا۔ یکم اکتوبر کو مرکزی کابینہ نے پورے ملک میں "وندے ماترم" کے 150 سال مکمل ہونے کی تقریبات کی منظوری دی، تاکہ ایک ایسی تحریک شروع کی جا سکے جو خاص طور پر نوجوانوں اور طلبہ کو اس گیت کے انقلابی جذبے سے جوڑ سکے۔ یہ تقریبات اس پیغامِ محبت و عقیدت کو زندہ رکھیں گی اور اس کی وراثت کو آنے والی نسلوں کے دلوں میں ہمیشہ کے لیے بسا دیں گی۔