نئی دہلی: سپریم کورٹ نے جمعہ کے روز مرکزی حکومت، یعنی وزارتِ تعلیم کو ہدایت دی کہ وہ ایک الگ حلف نامہ داخل کرے، جس میں یہ بتایا جائے کہ نیشنل ٹیسٹنگ ایجنسی (این ٹی اے) کے ذریعے نیٹ امتحانات کے انعقاد اور ان کے اختتام کے عمل کو سال بہ سال ایک باقاعدہ ادارہ جاتی نظام کے تحت کیسے منظم کیا جائے گا۔ جسٹس پی ایس نرسمہا اور جسٹس آلوک آرادھے پر مشتمل بنچ نے کہا کہ حلف نامے میں یہ وضاحت ہونی چاہیے کہ این ٹی اے کے اندر خصوصی ماہرین کی تقرری اور وسیع بنیادوں پر مشتمل ماہرین کی شمولیت کے ذریعے ادارہ جاتی تجربہ اور مہارت کیسے پیدا کی جائے گی۔

عدالت نے کہا کہ کوشش یہ ہونی چاہیے کہ این ٹی اے کے پاس “ضروری جسمانی اور فکری وسائل” موجود ہوں تاکہ 2024 اور 2026 کے نیٹ امتحانی تنازعات جیسے واقعات کی دوبارہ تکرار نہ ہو۔ عدالت نے چھ ہفتوں کے اندر حلف نامہ داخل کرنے کی ہدایت دی۔ سماعت کے دوران عدالت نے این ٹی اے اور ہائی پاورڈ کمیٹی کے چیئرمین ڈاکٹر کے رادھاکرشنن کی جانب سے داخل کردہ حلف ناموں کا جائزہ لیا۔

اس دوران مرکز کی نمائندگی کر رہے سالیسٹر جنرل تشار مہتا نے عدالت کو بتایا کہ “وزیرِ اعظم خود اس معاملے کی نگرانی کر رہے ہیں۔ تاہم بنچ نے سوال اٹھایا کہ ہائی پاورڈ کمیٹی کی مسلسل نگرانی اور اجلاسوں کے باوجود یہ مبینہ ناکامی کیسے پیش آئی۔

عدالت نے کہا: “کیا آپ باقاعدگی سے اجلاس کر رہے تھے؟ پھر اتنی نگرانی کے باوجود یہ ناکامی کیسے ہوئی؟” ڈاکٹر کے رادھاکرشنن اور این ٹی اے کے وکلا نے جواب دیا کہ ہائی پاورڈ کمیٹی نے تقریباً 60 سفارشات پیش کی تھیں، جن میں سے کئی پر عمل ہو چکا ہے۔ عدالت کو بتایا گیا کہ کچھ اصلاحات ابھی باقی ہیں اور انہیں دوبارہ مقرر کیے گئے نیٹ-یو جی امتحان سے پہلے نافذ کر دیا جائے گا۔

تاہم جسٹس نرسمہا نے نگرانی کے نظام کی مؤثریت پر تشویش ظاہر کرتے ہوئے کہا: “پھر یا تو اصل سفارشات میں کوئی خرابی ہے، یا مؤثر نگرانی نہیں ہوئی۔ یہ کیسے ہوا؟” عدالت نے این ٹی اے کے نظام میں جوابدہی کے فقدان پر بھی سوال اٹھایا۔ بنچ نے کہا: “جوابدہی کا نظام قائم نہیں کیا گیا۔ جوابدہی اسی وقت مؤثر ہوگی جب یہ طے ہو کہ ذمہ داری کس کے کندھوں پر ہے۔”

عدالت نے مزید کہا کہ “منتشر ذمہ داری” کا نتیجہ آخرکار یہ ہوتا ہے کہ ساری ذمہ داری عمومی طور پر حکومت پر ڈال دی جاتی ہے۔ ادارہ جاتی اصلاحات کی ضرورت پر زور دیتے ہوئے بنچ نے کہا: “ضرورت ادارہ جاتی اصلاحات کی ہے، افراد کی نہیں۔ لوگ آتے جاتے رہیں گے، لیکن نظام کے اندر کوئی مستقل ارتقائی ڈھانچہ ہونا چاہیے۔” عدالت نے بار بار امتحانی تنازعات کے طلبہ اور ان کے خاندانوں پر پڑنے والے جذباتی اثرات کا بھی ذکر کیا۔

بنچ نے کہا: “یہ حقیقتاً نہایت تکلیف دہ ہے، صرف طلبہ کے لیے نہیں بلکہ خاندانوں کے لیے بھی۔ اس میں برسوں کی محنت، تعلیم اور جذباتی سرمایہ کاری شامل ہوتی ہے۔” عدالت نے یہ بھی کہا کہ ہندوستان نے یو پی ایس سی جیسے “عالمی معیار کے ادارے” قائم کیے ہیں اور اسی طرح کی ادارہ جاتی مضبوطی اور ساکھ این ٹی اے میں بھی پیدا کی جانی چاہیے۔ اپنے حکم میں عدالت نے درج کیا کہ اس کی سابقہ ہدایات کے مطابق این ٹی اے کے ڈائریکٹر نے ایک حلف نامہ داخل کیا ہے، جس میں بتایا گیا ہے کہ نیٹ-یو جی 2026 کے انعقاد کے سلسلے میں ہائی پاورڈ کمیٹی کی سفارشات پر کس طرح عمل کیا جا رہا ہے۔

عدالت نے یہ بھی نوٹ کیا کہ اسٹیئرنگ کمیٹی کے سربراہ ڈاکٹر کے رادھاکرشنن نے مستقبل کے لائحۂ عمل سے متعلق الگ حلف نامہ داخل کیا ہے۔ عدالت نے کہا کہ وہ کچھ مزید وقت تک اس معاملے کی نگرانی جاری رکھے گی اور اگلی سماعت جولائی کے دوسرے ہفتے میں مقرر کی گئی ہے۔