نئی دہلی: وزیر اعظم نریندر مودی نے ہندوستان کی ثقافتی وراثت اور بین الاقوامی کھیلوں میں اس کی کامیابیوں کو اجاگر کرتے ہوئے نیوزی لینڈ کے وزیر اعظم کرسٹوفر لکسن کو علامتی تحائف پیش کیے۔ یہ تحائف ان کے تین ملکی دورے کے دوران دیے گئے جس میں نیوزی لینڈ، انڈونیشیا اور آسٹریلیا شامل تھے۔

نیوزی لینڈ کے وزیر اعظم کو پیش کیے گئے تحائف میں ہندوستانی خواتین کی ہاکی ٹیم کی تمام کھلاڑیوں کے دستخطوں سے مزین ایک ہاکی اسٹک شامل تھی۔ یہ تحفہ نیوزی لینڈ میں منعقدہ ایف آئی ایچ ویمنز نیشنز کپ میں ہندوستانی ٹیم کی تاریخی کامیابی کی یاد میں پیش کیا گیا۔

یہ ہاکی اسٹک محض کھیل کا سامان نہیں بلکہ ہندوستانی ہاکی میں عزم، ٹیم ورک اور اعلیٰ کارکردگی کی علامت ہے۔ اس پر موجود ہر دستخط ان کھلاڑیوں کی محنت، لگن اور حوصلے کی نمائندگی کرتا ہے جنہوں نے اس اہم چیمپئن شپ میں کامیابی حاصل کی۔ یہ تحفہ خاص طور پر نوجوان لڑکیوں کو اپنے خواب پورے کرنے کی ترغیب دینے کی علامت بھی سمجھا جا رہا ہے۔

ہندوستان کی شاندار ہاکی روایت کی عکاسی کرتی یہ دستخط شدہ اسٹک فنی مہارت، قومی یکجہتی اور فخر کی علامت ہے اور اسے ایک یادگاری نوادر کے طور پر محفوظ رکھا جائے گا۔

کھیلوں کے اس خصوصی تحفے کے علاوہ وزیر اعظم مودی نے کرسٹوفر لکسن کو روایتی اتراکھنڈی یا پہاڑی ٹوپی بھی پیش کی۔

یہ ٹوپی اتراکھنڈ کی ثقافتی شناخت اور ہمالیائی ورثے کی نمایاں علامت سمجھی جاتی ہے۔ اعلیٰ معیار کی اون سے ہاتھ سے تیار کی جانے والی یہ ٹوپی گرمائش فراہم کرنے کے ساتھ ساتھ روایتی بنائی کے فن کی خوبصورتی بھی ظاہر کرتی ہے۔

اتراکھنڈ میں یہ ٹوپی تہواروں، مذہبی تقریبات، شادیوں اور سماجی اجتماعات میں بڑے فخر سے پہنی جاتی ہے اور عزت، وقار، مہمان نوازی اور احترام کی علامت مانی جاتی ہے۔

اپنے عملی استعمال سے بڑھ کر یہ ٹوپی مقامی روایات اور قدرتی ماحول کے درمیان ہم آہنگی کی نمائندگی کرتی ہے۔ یہ علاقائی شناخت کا ایک مستقل نشان ہے جو مقامی دستکاری اور روایتی بنائی کے فن کو محفوظ رکھنے میں بھی مددگار ہے۔

اس دورے کے دوران وزیر اعظم مودی اور نیوزی لینڈ کے وزیر اعظم نے دو طرفہ تعلقات کے تمام شعبوں پر تفصیلی مذاکرات کیے۔ دونوں رہنماؤں نے تعلقات کو اسٹریٹجک شراکت داری کی سطح تک بلند کرنے اور 2030 تک دو طرفہ تجارت کو دوگنا کرنے کا ہدف مقرر کرنے پر اتفاق کیا۔

آکلینڈ کے گورنمنٹ ہاؤس میں ہونے والی ملاقات کے دوران وزیر اعظم مودی کا روایتی ماؤری انداز میں استقبال کیا گیا جس میں امن، احترام اور خیر مقدم کی علامت سمجھے جانے والے روایتی رسوم ادا کیے گئے۔ اس کے بعد انہوں نے گارڈ آف آنر کا معائنہ کیا۔

دونوں وزرائے اعظم کے درمیان محدود اور وفود کی سطح پر ہونے والی بات چیت میں تجارت و سرمایہ کاری، دفاع و سلامتی، زرعی ٹیکنالوجی، کھیل، تعلیم، سیاحت، ثقافت اور عوامی روابط سمیت مختلف شعبوں پر تبادلہ خیال ہوا۔

وزارت خارجہ کے مطابق دونوں ممالک نے باہمی دلچسپی کے تمام شعبوں میں تعاون بڑھانے کے عزم کا اعادہ کیا اور ہندستان۔نیوزی لینڈ آزاد تجارتی معاہدے پر جلد عمل درآمد کی اہمیت پر زور دیا۔

رہنماؤں نے علاقائی اور عالمی امور پر بھی تبادلہ خیال کیا اور کثیر جہتی عالمی فورمز میں تعاون مزید مضبوط بنانے کے عزم کا اظہار کیا۔

مذاکرات کے بعد دونوں رہنماؤں نے دفاع اور سمندری سلامتی، ہائیڈروگرافی، کھیل، آفات سے نمٹنے، ڈیری، سیاحت، سمندری ورثہ، ثقافت، فوڈ ٹیکنالوجی اور سمندری تحقیق کے شعبوں میں کئی مفاہمتی یادداشتوں اور سمجھوتوں کے تبادلے کا مشاہدہ بھی کیا۔