نئی :وزیر اعظم نریندر مودی کو بدھ کے روز فن لینڈ کے صدر الیگزینڈر اسٹب کی جانب سے ایک ٹیلیفون کال موصول ہوئی، وزارت خارجہ(MEA) نے ایک سرکاری بیان میں یہ اطلاع دی۔

وزارت خارجہ کے مطابق، صدر اسٹب نے امریکہ، یورپی رہنماؤں اور یوکرین کے درمیان واشنگٹن میں حالیہ ملاقاتوں کا خلاصہ پیش کیا، جن میں یوکرین تنازع کے حل پر تبادلہ خیال کیا گیا۔
وزیر اعظم مودی نے ایک بار پھر یوکرین جنگ کے پرامن حل اور جلد از جلد امن و استحکام کی بحالی کے لیے بھارت کی مستقل حمایت کا اعادہ کیا۔

دوطرفہ تعلقات اور جدید ٹیکنالوجی میں تعاون

دونوں رہنماؤں نے بھارت-فن لینڈ دوطرفہ تعلقات میں پیش رفت کا جائزہ لیا اور خاص طور پر کوانٹم ٹیکنالوجی، 6G، مصنوعی ذہانت(AI)، سائبر سیکیورٹی اور پائیداری(sustainability) جیسے ابھرتے ہوئے شعبوں میں شراکت داری کو فروغ دینے کے عزم کا اعادہ کیا۔

صدر اسٹب نے بھارت-یورپی یونین آزاد تجارتی معاہدے(India-EU FTA) کو جلد مکمل کرنے کے لیے فن لینڈ کی حمایت کی یقین دہانی کرائی، اور 2026 میں بھارت میں منعقد ہونے والےAI Impact Summit کی کامیابی کے لیے نیک خواہشات کا اظہار بھی کیا۔

وزیر اعظم مودی نے صدر اسٹب کو جلد بھارت کے دورے کی دعوت دی، جسے انہوں نے خوش دلی سے قبول کیا، اور دونوں رہنماؤں نے رابطے میں رہنے پر اتفاق کیا۔

ایکس(X) پر ردِ عمل:

وزیر اعظم مودی نے اپنی پوسٹ میں لکھا:"صدر الیگزینڈر اسٹب سے اچھی گفتگو ہوئی۔ فن لینڈ یورپی یونین میں بھارت کا قریبی شراکت دار ہے۔ ہم نے تجارت، ٹیکنالوجی اور پائیداری جیسے اہم شعبوں میں تعاون کو مضبوط بنانے پر تبادلہ خیال کیا۔ یوکرین جنگ کے پرامن حل کی کوششوں پر بھی خیالات کا تبادلہ ہوا۔

صدر اسٹب نے بھی ایک مثبت پیغام شیئر کرتے ہوئے کہا:"وزیر اعظم نریندر مودی سے اچھی گفتگو ہوئی۔ روس کی جنگ کے خاتمے کے لیے ایک منصفانہ اور پائیدار حل کی ضرورت پر تبادلہ خیال کیا۔ یہ ہم سب کے مفاد میں ہے۔ بھارت کا کردار اہم ہے اور اسے دنیا کے جنوب، مغرب اور مشرق میں سنا اور سراہا جاتا ہے۔ ہم نے بھارت-یورپی یونین تعلقات کو مزید گہرا کرنے کی ضرورت پر بھی اتفاق کیا۔ ہمارا تعاون جاری رہے گا۔