نئی دہلی/ آواز دی وائس

وزیراعظم نریندر مودی نے بدھ کے روز قومی دارالحکومت میں پونگل کی تقریب میں شرکت کی اور کہا کہ فطرت کے ساتھ ہم آہنگ توازن کا پیغام دینے والا یہ تہوار اب عالمی شکل اختیار کر چکا ہے اور دنیا کی قدیم ترین تہذیبوں میں سے ایک کی نمائندگی کرتا ہے۔

یہاں مرکزی وزیرِ مملکت برائے اطلاعات و نشریات ایل مروگن کی رہائش گاہ پر منعقدہ اس تقریب میں وزیراعظم مودی کی موجودگی کو تمل ناڈو کے عوام سے رابطہ مضبوط کرنے کے طور پر بھی دیکھا جا رہا ہے، جہاں آئندہ چند مہینوں میں اسمبلی انتخابات ہونے والے ہیں۔ اس پروگرام میں حال ہی میں ریلیز ہونے والی فلم ’پراشکتی‘ کے فنکاروں سمیت تمل سماج کی کئی معروف شخصیات بھی شامل ہوئیں۔ تقریب سے خطاب کرتے ہوئے وزیراعظم نے کہا کہ اس تہوار میں کسانوں کی محنت کا جشن منایا جاتا ہے اور زمین اور سورج کے تئیں شکرگزاری کا اظہار کیا جاتا ہے۔

انہوں نے کہا کہ پونگل کا تہوار ہمیں یاد دلاتا ہے کہ شکرگزاری صرف الفاظ تک محدود نہیں رہنی چاہیے بلکہ اسے ہماری روزمرہ زندگی کا لازمی حصہ بننا چاہیے۔ جب زمین ہمیں اتنا کچھ دیتی ہے تو ہماری ذمہ داری بنتی ہے کہ ہم اس کی حفاظت کریں اور اسے سنبھال کر رکھیں۔

اس پروگرام میں کئی مرکزی وزرا، اعلیٰ افسران اور سماج کے مختلف طبقوں کے لوگ موجود تھے، جن میں نائب صدر سی پی رادھا کرشنن، مرکزی وزیر جی کشن ریڈی اور رام موہن نائیڈو شامل تھے۔

تمل فلم ’پراشکتی‘ کے اداکار شیو کارتکیئن اور روی موہن، نیز موسیقار جی وی پرکاش کمار سمیت فلم سے وابستہ دیگر افراد نے بھی تقریب میں شرکت کی۔ وزیراعظم نے کہا کہ دنیا بھر میں تمل برادری اور تمل ثقافت کو سنبھالنے والے لوگ بڑے جوش و خروش کے ساتھ پونگل مناتے ہیں اور ان کے درمیان آ کر انہیں فخر کا احساس ہو رہا ہے۔ مودی نے کہا کہ تمل ثقافت دنیا کی قدیم ترین تہذیبوں میں سے ایک ہے، جس میں صدیوں کی دانش اور روایت شامل ہے جو تاریخ سے سبق لے کر مستقبل کی راہ دکھاتی ہے۔

انہوں نے کہا کہ اس ورثے سے تحریک لے کر آج کا ہندوستان اپنی ثقافتی جڑوں سے طاقت حاصل کرتے ہوئے آگے بڑھ رہا ہے۔ پونگل کے اس مبارک موقع پر ہم محسوس کرتے ہیں کہ ہندوستان کو آگے لے جانے والی یقین اور اتحاد کی روح اس کی ثقافت سے گہرائی سے جڑی ہوئی ہے اور اس دھرتی کے لیے بے پناہ احترام رکھتی ہے۔

وزیراعظم نے کہا کہ پونگل کا تہوار فطرت، خاندان اور سماج کے درمیان ہم آہنگ توازن قائم رکھنے کی اہمیت پر زور دیتا ہے۔

انہوں نے کہا کہ مٹی کی صحت برقرار رکھنا، پانی کا تحفظ کرنا اور آنے والی نسلوں کے لیے وسائل کا دانشمندانہ استعمال بے حد ضروری ہے۔ مشن ’لائف‘، ’ایک پیڑ ماں کے نام‘ اور ’امرت سروور‘ جیسی پہل اسی سوچ پر مبنی ہیں اور ہمیں ان اقدار کو برقرار رکھنے کی ترغیب دیتی ہیں۔’

مودی نے کہا کہ پونگل ہمیں یہ سکھاتا ہے کہ فطرت کے تئیں شکرگزاری صرف الفاظ تک محدود نہیں ہونی چاہیے بلکہ اسے روزمرہ زندگی کا حصہ بنانا چاہیے۔