نئی دہلی

وزیر اعظم نریندر مودی نے جمعہ کے روز مدھیہ پردیش کے جبل پور میں کشتی الٹنے کے حادثے میں قیمتی جانوں کے ضیاع پر گہرے رنج و غم کا اظہار کیا اور متاثرین کے لیے معاوضے کا اعلان کیا۔سوشل میڈیا پلیٹ فارم ’ایکس‘ پر وزیر اعظم کے دفتر (پی ایم او) نے کہا کہ مدھیہ پردیش کے جبل پور میں کشتی کے الٹنے سے جانوں کا نقصان نہایت افسوسناک ہے۔ اس دردناک حادثے میں اپنے عزیزوں کو کھونے والوں سے میری دلی ہمدردیاں ہیں۔ زخمیوں کی جلد صحتیابی کے لیے دعا گو ہوں۔ مقامی انتظامیہ متاثرین کی ہر ممکن مدد کر رہی ہے۔

پی ایم او نے وزیر اعظم کے قومی ریلیف فنڈ (پی ایم این آر ایف) سے مالی امداد کا بھی اعلان کیا۔بیان میں کہا گیا کہ حادثے میں جان گنوانے والوں کے لواحقین کو فی کس 2 لاکھ روپے جبکہ زخمیوں کو 50 ہزار روپے دیے جائیں گے۔مقامی حکام متاثرین کو ضروری مدد فراہم کرنے کے ساتھ ساتھ راحت اور بچاؤ کی کارروائیاں جاری رکھے ہوئے ہیں۔جبل پور کے برگی ڈیم میں سیاحتی کشتی الٹنے کے واقعے میں ہلاکتوں کی تعداد ایک دن بعد بڑھ کر 9 ہو گئی ہے، جبکہ لاپتہ افراد کی تلاش کے لیے سرچ اور ریسکیو آپریشن جاری ہے۔

سیاحت محکمہ کی کروز کشتی سے پیش آئے اس حادثے کے بعد مدھیہ پردیش کے وزیر سیاحت دھرمیندر سنگھ لودھی نے واقعے کی تحقیقات کا حکم دیا اور ذمہ داروں کے خلاف سخت کارروائی کی یقین دہانی کرائی۔انہوں نے کہا کہ یہ ایک نہایت افسوسناک اور دل دہلا دینے والا واقعہ ہے۔ میں نے محکمہ کو اس کی تحقیقات کا حکم دے دیا ہے۔ اگر کسی قسم کی لاپرواہی سامنے آئی تو سخت ترین کارروائی کی جائے گی۔ اس حادثے میں 9 افراد کی موت ہو چکی ہے۔

انہوں نے مزید کہا کہ ہلاکتوں کی تعداد بڑھ سکتی ہے اور تحقیقات کے بعد لاپرواہی ثابت ہونے پر سخت اقدام کیا جائے گا۔ہوم گارڈ ایس ڈی آر ایف کے کمانڈنٹ نیرج سنگھ راجپوت نے بتایا کہ ٹیموں نے مشکلات کے باوجود مسلسل کام جاری رکھا۔انہوں نے کہا کہ یہاں صورتحال مشکل تھی۔ گزشتہ رات بارش اور اندھیرا تھا، جس کی وجہ سے ریسکیو آپریشن میں دشواری پیش آئی، لیکن ہم نے روشنی اور دیگر آلات کی مدد سے کام جاری رکھا۔ آج این ڈی آر ایف اور فوج کی ٹیمیں بھی پہنچ گئیں، جس کے بعد مزید 5 لاشیں برآمد کی گئیں۔ اب تک مجموعی طور پر 9 لاشیں مل چکی ہیں۔

چیف میڈیکل اینڈ ہیلتھ آفیسر (سی ایم ایچ او) جبل پور نے تصدیق کی کہ 24 بچائے گئے افراد زیر علاج ہیں اور تمام زخمیوں کو ضروری طبی سہولیات فراہم کی جا رہی ہیں۔