نئی دہلی

وزیر اعظم نریندر مودی نے جمعرات کو کولکتہ کے تاراتلا علاقے میں زیرِ تعمیر گودام کے شیڈ کے گرنے سے ہلاک ہونے والے آٹھ افراد کے اہل خانہ کے لیے دو، دو لاکھ روپے کی مالی امداد (ایکس گریشیا) کا اعلان کیا ہے۔وزیر اعظم کے دفتر (پی ایم او) کے مطابق، اس حادثے میں زخمی ہونے والے 20 افراد کو مرکزی حکومت کی جانب سے 50 ہزار روپے فی کس دیے جائیں گے۔ایکس پر جاری ایک بیان میں پی ایم او نے کہا کہ ریاستی حکومت شیڈ گرنے کے واقعے سے متاثرہ افراد کو ہر ممکن مدد فراہم کرنے کے لیے کام کر رہی ہے۔

پی ایم او کے بیان میں کہا گیا کہ کولکتہ میں کل پیش آنے والا حادثہ انتہائی افسوسناک ہے۔ اس حادثے میں جان گنوانے والوں کے قریبی لواحقین کو وزیر اعظم قومی امدادی فنڈ (پی ایم این آر ایف) سے دو، دو لاکھ روپے دیے جائیں گے۔ زخمیوں کو 50 ہزار روپے کی امداد فراہم کی جائے گی۔ ریاستی حکومت دن رات کام کر رہی ہے تاکہ متاثرہ افراد کو ہر ممکن مدد مل سکے۔کولکتہ پولیس کے مطابق اس حادثے میں ہلاک ہونے والوں کی تعداد بڑھ کر آٹھ ہو گئی ہے۔ تمام آٹھ افراد کو ایس ایس کے ایم ہسپتال لایا گیا جہاں انہیں مردہ قرار دیا گیا۔ حادثے میں مجموعی طور پر 20 افراد زخمی ہوئے ہیں۔

یہ حادثہ بدھ کے روز دوپہر تقریباً 12 بج کر 7 منٹ پر پیش آیا تھا۔ جائے حادثہ پر ہندوستانی فوج اور قومی آفات سے نمٹنے والی فورس (این ڈی آر ایف) کی جانب سے امدادی اور بچاؤ کارروائیاں جاری ہیں۔مغربی بنگال کے وزیر اعلیٰ سوویندو ادھیکاری نے بدھ کے روز ہسپتال کا دورہ کیا۔ ادھیکاری نے صحافیوں سے گفتگو کرتے ہوئے بتایا کہ زخمی ہونے والے 20 افراد میں سے 18 کی حالت خطرے سے باہر ہے۔

حادثے کے سلسلے میں تین افراد کو گرفتار کیا گیا ہے، جن میں ایک تعمیراتی نگران (بلڈنگ سپروائزر) اور دو مزدور سپلائر شامل ہیں۔مغربی بنگال حکومت نے اس حادثے کی تحقیقات کے لیے ایک خصوصی تحقیقاتی ٹیم (ایس آئی ٹی) تشکیل دی ہے۔

سرکاری بیان کے مطابق ایس آئی ٹی کی سربراہی اسسٹنٹ کمشنر آف پولیس جئے سورج مکھرجی کریں گے۔تحقیقاتی ٹیم میں انسپکٹر دیباشیش دتہ (انچارج، ہومیسائیڈ اسکواڈ)، انسپکٹر ہیرک دلاپتی (جو اس کیس کے نئے تحقیقاتی افسر ہوں گے)، انسپکٹر سرفراز احمد (اینٹی راؤڈی اسکواڈ)، اور سب انسپکٹر مناس بھٹاچاریہ اور کشل منڈل شامل ہیں، جو تاراتلا پولیس اسٹیشن سے وابستہ ہیں۔