نئی دہلی

وزیر اعظم نریندر مودی نے پیر کے روز مرکزی وزیر برائے کھیل منسکھ منڈاویا کو سالگرہ کی مبارک باد دی اور ملک میں کھیلوں کے بنیادی ڈھانچے کو بہتر بنانے کے لیے ان کی خدمات کو سراہا۔

ایکس پر ایک پوسٹ میں وزیر اعظم مودی نے کہا کہ مرکزی کابینہ کے وزیر جناب منسکھ منڈاویا جی کو سالگرہ کی دل کی گہرائیوں سے مبارک باد۔ وہ کھیلوں کے بنیادی ڈھانچے کو مضبوط بنانے اور ہماری نوجوان قوت کی فلاح و بہبود کو آگے بڑھانے میں نمایاں کردار ادا کر رہے ہیں۔ وہ ہمارے محنت کش طبقے کی بہبود کے لیے بھی پیش پیش ہیں، جس کا ہماری معیشت میں نہایت اہم کردار ہے۔ میں ان کی طویل اور صحت مند زندگی کے لیے دعا گو ہوں۔منسکھ منڈاویا نے وزیر اعظم مودی کا شکریہ ادا کرتے ہوئے کہا کہ ان کی نیک تمنائیں اور رہنمائی ان کے لیے ہمیشہ باعثِ تحریک رہی ہیں۔

انہوں نے کہا کہ محترم وزیر اعظم جی، آپ کی نیک خواہشات اور آشیرواد کے لیے دل کی گہرائیوں سے شکر گزار ہوں۔ آپ کی مسلسل رہنمائی ہماری سب سے بڑی تحریک ہے، جو ہمیں ہر روز ’وکست ہندوستان‘ کے ہدف اور ملک کے شہریوں کی فلاح کے لیے مزید لگن کے ساتھ کام کرنے کی ترغیب دیتی ہے۔

مرکزی وزیر داخلہ امت شاہ نے بھی منسکھ منڈاویا کو سالگرہ کی مبارک باد دی۔

انہوں نے کہا کہ  مرکزی وزیر منسکھ منڈاویا کو سالگرہ کی دلی مبارک باد۔ مودی جی کی قیادت میں آپ مزدوروں کی فلاح و بہبود کے ساتھ ساتھ کھیلوں کی ثقافت اور بنیادی ڈھانچے کی ترقی کے لیے قابلِ ستائش کام کر رہے ہیں۔ میں خدا سے آپ کی اچھی صحت اور طویل عمر کی دعا کرتا ہوں۔

اس موقع پر وزیر خارجہ ایس جے شنکر، مرکزی وزیر ٹرانسپورٹ نتن گڈکری، مرکزی وزیر پیٹرولیم و قدرتی گیس ہردیپ سنگھ پوری اور کابینہ کے دیگر اراکین نے بھی منسکھ منڈاویا کو مبارک باد پیش کی۔

لوک سبھا کے اسپیکر اوم برلا نے اپنے پیغام میں کہا کہ مرکزی وزیر برائے محنت و روزگار اور وزیر برائے امورِ نوجوانان و کھیل، منسکھ ایل منڈاویا جی کو سالگرہ کی دلی مبارک باد اور نیک تمنائیں۔ میں خدا سے آپ کی بہترین صحت اور خوشگوار زندگی کے لیے دعا گو ہوں۔

منسکھ منڈاویا کی پیدائش ریاست گجرات کے ضلع بھاونگر کی پالیتانہ تحصیل کے ایک چھوٹے سے گاؤں ہنول میں ہوئی تھی۔سال 2016 میں انہوں نے مرکزی وزیر مملکت کے طور پر سڑک نقل و حمل و شاہراہوں، جہاز رانی اور کیمیکل و کھاد کی وزارتوں کا حلف اٹھایا تھا۔2019 میں انہیں کیمیکل و کھاد کے وزیر مملکت کے ساتھ ساتھ بندرگاہوں، جہاز رانی اور آبی گزرگاہوں کی وزارت کا آزادانہ چارج بھی سونپا گیا۔7 جولائی 2021 کو منسکھ منڈاویا نے مرکزی وزیر برائے صحت و خاندانی بہبود کے طور پر ذمہ داری سنبھالی، جبکہ انہیں کیمیکل و کھاد کی وزارت کی اضافی ذمہ داری بھی دی گئی تھی۔

بعد ازاں وزیر اعظم نریندر مودی کی تیسری حکومت میں انہوں نے مرکزی وزیر برائے کھیل اور وزیر برائے محنت و روزگار کے طور پر اپنی ذمہ داریاں سنبھالیں۔