نئی دہلی

سرکاری ملازمت کے منتظر نوجوانوں کے لیے ہفتہ (23 مئی) کا دن نہایت خاص رہا۔ وزیرِ اعظم نریندر مودی نے آج 19ویں روزگار میلہ کے دوران 51 ہزار سے زائد نوجوانوں میں تقرری نامے تقسیم کیے۔ روزگار میلہ کے آغاز سے اب تک ملک بھر میں منعقد ہونے والے 18 پروگراموں کے ذریعے تقریباً 12 لاکھ تقرری نامے جاری کیے جا چکے ہیں۔ہفتہ کے روز 19ویں روزگار میلہ میں وزیرِ اعظم نے ڈیجیٹل ذریعے سے 51 ہزار سے زائد نوجوانوں کو سرکاری ملازمتوں کے تقرری نامے دیے۔ اس موقع پر خطاب کرتے ہوئے انہوں نے کہا کہ آج ملک بھر کے ہزاروں نوجوانوں کے لیے انتہائی اہم دن ہے۔ آج 51 ہزار سے زیادہ نوجوانوں کو سرکاری ملازمتوں کے تقرری نامے ملے ہیں۔

پانچ ممالک کے دورے کا ذکر

اپنے خطاب میں وزیرِ اعظم نے حالیہ پانچ ممالک کے دورے کا بھی ذکر کیا۔ انہوں نے کہا کہ میں دو روز قبل ہی پانچ ممالک کے دورے سے واپس آیا ہوں۔ یہ صرف پانچ ممالک کا دورہ تھا، لیکن اس دوران میں نے درجنوں ممالک کی بڑی کمپنیوں کے سربراہان سے ملاقاتیں اور تفصیلی گفتگو کی۔ ہر جگہ میں نے ایک بات مشترک دیکھی کہ دنیا ہندوستان کے نوجوانوں اور تکنیکی ترقی کو لے کر بے حد پرجوش ہے۔ آج دنیا ہندوستان کی ترقی کے سفر کا حصہ بننا چاہتی ہے۔ ہندوستان بھی دنیا کے مختلف ممالک کے ساتھ شراکت داری کو فروغ دے رہا ہے۔ میں چاہتا ہوں کہ ہمارے نوجوان عالمی سطح کا تجربہ حاصل کریں۔

مختلف شعبوں میں تعاون پر گفتگو

وزیرِ اعظم نے کہا کہ نیدرلینڈز کے دورے کے دوران سیمی کنڈکٹر، پانی، زراعت اور جدید مینوفیکچرنگ پر تبادلۂ خیال ہوا۔انہوں نے بتایا کہ سویڈن میں مصنوعی ذہانت (AI) اور ڈیجیٹل اختراعات کے شعبے میں تعاون پر کئی اہم بات چیت ہوئی، جبکہ ناروے کے ساتھ گرین ٹیکنالوجی اور بحری تعاون کے موضوعات پر پیش رفت ہوئی۔

اسی طرح متحدہ عرب امارات کے ساتھ اسٹریٹجک، توانائی اور ٹیکنالوجی شراکت داری سے متعلق اہم معاہدے ہوئے، جبکہ اٹلی کے ساتھ دفاع، اہم معدنیات، سائنس اور ٹیکنالوجی جیسے شعبوں میں تعاون کے معاہدوں پر اتفاق کیا گیا۔انہوں نے کہا کہ ان تمام معاہدوں سے ہندوستان کے نوجوانوں کو براہِ راست فائدہ پہنچے گا۔

دنیا ہندوستان کی ترقی کا حصہ بننا چاہتی ہے

وزیرِ اعظم نے کہا کہ آج پوری دنیا ہندوستان کی ترقیاتی سفر میں شریک ہونا چاہتی ہے اور ہندوستان بھی مختلف ممالک کے ساتھ شراکت داری کو وسعت دے رہا ہے۔

انہوں نے کہا کہ میں چاہتا ہوں کہ ہمارے نوجوان عالمی تجربات حاصل کریں۔ آج تقرری نامے حاصل کرنے والے تمام نوجوان ملک کی ترقی کے سفر میں اہم شراکت دار بن رہے ہیں۔ ریلوے، بینکنگ، دفاع، صحت، تعلیم اور دیگر شعبوں میں یہ نوجوان نئی ذمہ داریاں سنبھالنے جا رہے ہیں۔ آنے والے برسوں میں آپ سب ترقی یافتہ ہندوستان کے عزم کو پورا کرنے میں اہم کردار ادا کریں گے۔

ترقی یافتہ ہندوستان میں نوجوانوں کا کردار

وزیرِ اعظم مودی نے کہا کہ ہندوستان کے نوجوان ترقی یافتہ ہندوستان کے خواب کو حقیقت میں بدلنے میں کلیدی کردار ادا کر رہے ہیں۔

انہوں نے کہا کہ روزگار میلہ نوجوانوں کو نئے مواقع فراہم کرنے کے لیے ہماری حکومت کے عزم کی عکاسی کرتا ہے۔ دنیا ہندوستان کے نوجوانوں اور ٹیکنالوجی کے میدان میں ملک کی پیش رفت سے بے حد متاثر ہے۔ آج دنیا ہندوستان کی ترقی کے سفر میں شریک ہونا چاہتی ہے۔"

اب تک 12 لاکھ تقرری نامے جاری

روزگار میلہ حکومت کی ایک اہم پہل ہے۔ اس منصوبے کے تحت اب تک تقریباً 12 لاکھ تقرری نامے جاری کیے جا چکے ہیں۔ملک بھر میں اب تک 18 روزگار میلوں کا انعقاد ہو چکا ہے، جبکہ ہفتہ کے روز 47 مقامات پر 19واں روزگار میلہ منعقد کیا گیا۔

ملک کے مختلف حصوں سے منتخب کیے گئے نوجوان حکومتِ ہند کے مختلف وزارتوں اور محکموں میں خدمات انجام دیں گے، جن میں وزارتِ ریلوے، وزارتِ داخلہ، وزارتِ صحت و خاندانی بہبود، محکمہ مالیاتی خدمات، محکمہ اعلیٰ تعلیم اور دیگر محکمے شامل ہیں۔