نئی دہلی
ایودھیا میں واقع شری رام جنم بھومی تیرتھ شیتر ٹرسٹ کے مبینہ مالی بے ضابطگیوں کے معاملے میں سپریم کورٹ میں ایک نئی درخواست دائر کی گئی ہے، جس میں عدالت کی نگرانی میں تحقیقات کرانے کا مطالبہ کیا گیا ہے۔درخواست میں مبینہ طور پر لاپتہ فنڈز، مالی بے ضابطگیوں، بدانتظامی اور ٹرسٹ کے انتظامی امور سے متعلق دیگر غیر قانونی سرگرمیوں کی تحقیقات کے لیے سنٹرل بیورو آف انویسٹی گیشن (سی بی آئی) کے تحت ایک خصوصی تحقیقاتی ٹیم (ایس آئی ٹی) تشکیل دینے اور ایف آئی آر درج کرنے کی استدعا کی گئی ہے۔
یہ درخواست وکلا اجے کمار رائے اور دنیش کمار یادو کی جانب سے دائر کی گئی ہے۔درخواست میں سپریم کورٹ سے یہ ہدایت جاری کرنے کی بھی اپیل کی گئی ہے کہ ٹرسٹ اور اتر پردیش حکومت تمام جسمانی، ڈیجیٹل اور مالیاتی ریکارڈ محفوظ رکھیں، جن میں عطیات کے رجسٹر، آڈٹ رپورٹس، سی سی ٹی وی فوٹیج، بینک ریکارڈز اور عطیات و اثاثوں کی وصولی، حساب کتاب اور استعمال سے متعلق دیگر دستاویزات شامل ہیں۔
اس کے علاوہ عدالت سے یہ بھی درخواست کی گئی ہے کہ ٹرسٹ اور حکومت کو کسی بھی ریکارڈ، اثاثے، فنڈ، دستاویز یا الیکٹرانک ڈیٹا کو تباہ کرنے، تبدیل کرنے، چھیڑ چھاڑ کرنے یا منتقل کرنے سے روکا جائے۔
درخواست گزاروں نے مزید مطالبہ کیا ہے کہ ٹرسٹ، اتر پردیش حکومت اور مرکزی حکومت ایسے نگرانی، ضابطہ بندی اور آڈٹ کے مؤثر نظام قائم کریں جو عوامی مفاد کے تحفظ اور لاکھوں عقیدت مندوں و عطیہ دہندگان کے اعتماد کو برقرار رکھنے میں مددگار ہوں۔
درخواست میں کہا گیا ہے کہ ایک ایسے ادارے کی جانب سے، جو امانت دارانہ حیثیت رکھتا ہے، فنڈز اور اثاثوں کے معاملات میں غیر شفافیت لاکھوں عقیدت مندوں اور عوام کے اعتماد، جذبات اور عقیدے کو براہ راست متاثر کرتی ہے، جنہوں نے بھگوان شری رام مندر کی تعمیر کے لیے رضاکارانہ طور پر عطیات دیے ہیں۔درخواست میں اتر پردیش حکومت کی جانب سے مبینہ گمشدہ فنڈز اور حسابی بے ضابطگیوں کی تحقیقات کے لیے قائم کی گئی ایس آئی ٹی کی افادیت پر بھی سوال اٹھایا گیا ہے۔
درخواست گزاروں کا مؤقف ہے کہ ریاستی سطح پر جاری تحقیقات کا دائرہ کار، اختیارات اور مقاصد واضح نہیں ہیں اور ممکن ہے کہ وہ ان سنگین الزامات کی پیچیدگی سے نمٹنے کے لیے کافی نہ ہوں۔
درخواست میں کہا گیا ہے کہ اتر پردیش حکومت کی قائم کردہ خصوصی تحقیقاتی ٹیم نے بغیر ایف آئی آر یا کسی باقاعدہ فوجداری مقدمے کے اپنی تحقیقات شروع کر دی ہیں۔ ایسی صورت میں تحقیقات کے دوران جمع کیے گئے شواہد کی قانونی حیثیت اور قابلِ قبولیت کو چیلنج کیا جا سکتا ہے، جس سے مستقبل میں ممکنہ قانونی کارروائی متاثر ہو سکتی ہے۔سپریم کورٹ سے مداخلت کی اپیل کرتے ہوئے درخواست میں کہا گیا ہے کہ شری رام جنم بھومی تیرتھ شیتر ٹرسٹ کے انتظام و انصرام پر عوامی اعتماد برقرار رکھنے، قانون کی حکمرانی کو یقینی بنانے اور ادارہ جاتی سالمیت کے تحفظ کے لیے عدالت کی مداخلت ناگزیر ہو چکی ہے۔
درخواست میں مزید کہا گیا ہے کہ جاری ایس آئی ٹی تحقیقات کے دائرۂ کار کے بارے میں اب بھی واضح معلومات موجود نہیں ہیں، جبکہ کسی بھی فوجداری تحقیقات کے ابتدائی مراحل شواہد محفوظ رکھنے کے لیے انتہائی اہم ہوتے ہیں۔ درخواست گزاروں نے خبردار کیا کہ تاخیر کی صورت میں شواہد کے ضائع یا تبدیل ہونے کا خطرہ پیدا ہو سکتا ہے، جس سے تحقیقات متاثر ہو سکتی ہیں۔
درخواست میں مؤقف اختیار کیا گیا ہے کہ ابتدائی نوعیت کی ایس آئی ٹی تحقیقات شاید ان تمام پہلوؤں کا احاطہ نہ کر سکیں، اس لیے حقیقت سامنے لانے اور اگر کوئی بے ضابطگی ثابت ہو تو ذمہ داروں کا تعین کرنے کے لیے آزادانہ اور غیر جانبدارانہ تحقیقات ضروری ہیں۔واضح رہے کہ اس سے قبل بھی ایک وکیل نے سپریم کورٹ کو خط کے ذریعے درخواست بھیجی تھی، جس میں شری رام جنم بھومی مندر میں عقیدت مندوں کی جانب سے دیے گئے عطیات اور نذرانوں کے مبینہ غلط استعمال، گمشدگی اور مالی بے ضابطگیوں پر تشویش کا اظہار کیا گیا تھا۔
