نئی دہلی: نئی دہلی کی خصوصی این آئی اے عدالت نے غیر قانونی سرگرمیوں کی روک تھام ایکٹ (یو اے پی اے) کے تحت درج مقدمے میں پاپولر فرنٹ آف انڈیا (پی ایف آئی) کے بانی چیئرمین ای ابو بکر کی تیسری درخواستِ ضمانت مسترد کر دی ہے۔ عدالت نے حال ہی میں ای ابو بکر سمیت پی ایف آئی کے دیگر رہنماؤں کے خلاف دہشت گردی کی سازش، دہشت گردی کے لیے مالی معاونت اور ملک کے خلاف جنگ چھیڑنے کی سازش کے الزامات کے تحت فردِ جرم عائد کی تھی۔

2022 میں گرفتار کیے گئے ابو بکر نے مقدمے کی کارروائی میں تاخیر، صحت کی خراب حالت، جلد سماعت کے حق اور یو اے پی اے کے تحت ضمانت سے متعلق قانونی دفعات میں تبدیلی کو بنیاد بنا کر ضمانت کی درخواست دی تھی۔ پٹیالہ ہاؤس کورٹ کے خصوصی این آئی اے جج پرشانت شرما نے بدھ کے روز فریقین کے دلائل سننے کے بعد درخواست مسترد کر دی۔ عدالت نے اپنے حکم میں کہا کہ مقدمے میں تاخیر کے معاملے کو تنہا بنیاد نہیں بنایا جا سکتا، بلکہ اس کے ساتھ مقدمے کے تمام حالات و عوامل کو بھی مدنظر رکھنا ضروری ہے۔

عدالت کے مطابق جرم کی سنگینی، عدالت پر مقدمات کا بوجھ، ملزمان کی بڑی تعداد اور ان کی نمائندگی کرنے والے وکلا کی تعداد جیسے عوامل بھی سماعت کی رفتار پر اثر انداز ہوتے ہیں۔ جج نے کہا کہ ملزم کے وکیل نے تاخیر کے اعتراض کے دوران ان اہم نکات کا کوئی ذکر نہیں کیا، اس لیے ان کا مؤقف مضبوط بنیادوں پر قائم نہیں ہے۔ عدالت نے مزید کہا کہ چارج شیٹ زیرِ التوا ہونے کی وجوہات، انتظامی معاملات اور تاخیر کے حقیقی اسباب بھی درخواست میں واضح نہیں کیے گئے، لہٰذا تاخیر کی بنیاد پر ضمانت کا مطالبہ بے بنیاد ہے۔

عدالت نے اپنے حکم میں کہا، ’’مقدمے کے حقائق اور حالات کا جائزہ لینے کے بعد درخواست گزار کو ضمانت دینے کی کوئی وجہ نظر نہیں آتی، اس لیے ای ابو بکر کی موجودہ درخواستِ ضمانت مسترد کی جاتی ہے۔‘‘ سماعت کے دوران ملزم کے وکیل نے کہا کہ ابو بکر 22 ستمبر 2022 سے عدالتی تحویل میں ہیں، ان کی صحت خراب ہے اور انہیں جلد سماعت کا آئینی حق حاصل ہے۔

دوسری جانب این آئی اے کی جانب سے خصوصی سرکاری وکیل راہل تیاگی، جاتن کھتری اور امت روہیلا نے عدالت میں مؤقف اختیار کیا کہ درخواست مسترد کی جائے کیونکہ ملزم کے خلاف ابتدائی شواہد موجود ہیں، جو ان کے خلاف عائد الزامات کی تائید کرتے ہیں۔ این آئی اے نے عدالت کو بتایا کہ ابو بکر کی پہلی درخواستِ ضمانت 14 نومبر 2022 کو مسترد ہوئی تھی، جس کے خلاف دہلی ہائی کورٹ میں دائر اپیل بعد میں واپس لے لی گئی تھی۔ اس کے بعد 9 جون 2023 کو دوسری درخواست بھی مسترد ہوئی، جس کے خلاف دائر اپیل کو بھی دہلی ہائی کورٹ نے خارج کر دیا تھا۔

دہلی ہائی کورٹ نے اپنے فیصلے میں کہا تھا کہ چارج شیٹ میں یو اے پی اے کے باب چہارم اور باب ششم کے تحت عائد الزامات بادی النظر میں درست معلوم ہوتے ہیں۔ عدالت نے ابو بکر کی صحت سے متعلق تہاڑ جیل اور اپولو اسپتال سے طبی رپورٹ بھی طلب کی تھی۔

تہاڑ جیل کے میڈیکل افسر کی رپورٹ کے مطابق ابو بکر کو چلنے، بولنے اور نگلنے میں دشواری اور خون میں شکر کی سطح میں اتار چڑھاؤ کی شکایت ہے، تاہم انہیں مناسب طبی سہولتیں فراہم کی جا رہی ہیں۔ رپورٹ میں کہا گیا کہ ان کی حالت اس وقت مستحکم ہے اور ان کا علاج جی این ای سی اسپتال، میڈز، دیدی یو اسپتال، صفدر جنگ اسپتال، جی بی پنت اسپتال اور ایمس میں جاری ہے۔