نئی دہلی: آل پارٹیز حریت کانفرنس کے صدر میرواعظ عمر فاروق نے جمعہ کو مغربی ایشیا میں جاری کشیدگی کے درمیان امن سفارت کاری اور انصاف کے لیے پُرزور اپیل کرتے ہوئے کہا کہ ’’انصاف کے بغیر امن قائم نہیں ہو سکتا‘‘۔ انہوں نے یہ بات نئی دہلی میں منعقدہ اٹھارہویں برکس سربراہی اجلاس کے موقع پر کہی۔میرواعظ عمر فاروق نے یہ بیان اس اعلیٰ سطحی اجتماع کے بعد دیا جس میں نئی دہلی میں برکس سربراہی اجلاس میں شرکت کے لیے موجود ایران کے صدر مسعود پزشکیان نے ہندوستانی مذہبی رہنماؤں دانشوروں اور کاروباری شخصیات کے ایک وفد سے ملاقات کی۔ میرواعظ نے اجلاس کے بعد خبر رساں ادارے اے این آئی سے گفتگو کرتے ہوئے عالمی استحکام کی ضرورت پر زور دیا۔

میرواعظ نے کہا کہ آج یہاں ہونے والی بات چیت میں مختلف مذاہب کے رہنما کاروباری شعبے کے نمائندے اور دانشور شریک ہوئے۔ موجودہ حالات میں جبکہ نئی دہلی میں برکس کا ایک اہم اجلاس بھی جاری ہے اور دنیا بھر کے رہنما یہاں موجود ہیں سب سے اہم پیغام امن کا ہونا چاہیے۔انہوں نے تہران اور پورے خطے کو نشانہ بنانے والی موجودہ جغرافیائی سیاسی کشیدگی کی شدید مذمت کی۔ میرواعظ نے کہا کہ انصاف کے بغیر امن قائم نہیں ہو سکتا۔ ایران میں آج جو کچھ ہو رہا ہے وہ بالکل غلط ہے۔ بالخصوص جس طرح امریکہ نے ایران پر جنگ مسلط کی ہے وہ قابل مذمت ہے۔ اس کے علاوہ فلسطین اور لبنان میں رونما ہونے والے واقعات نے عالمی سطح پر ایک انتشار کی صورتحال پیدا کردی ہے جسے حل کرنے کی ضرورت ہے۔

ایرانی صدر مسعود پزشکیان کے خطاب کے اہم نکات کی تائید کرتے ہوئے میرواعظ نے کہا کہ تنازع کے بجائے انسانی بنیادوں کو ترجیح دینے کی ضرورت ہے۔ انہوں نے کہا کہ ایرانی صدر نے یہاں ایک اہم پیغام دیا ہے کہ اگر ہم امن کی طرف بڑھنا چاہتے ہیں تو سب سے بنیادی ترجیح انسانیت ہونی چاہیے۔ موجودہ دور جنگ کا نہیں بلکہ مذاکرات اور سفارت کاری کا دور ہے۔ انسانی اقدار پر یقین رکھنے والے ہر شخص کو اس بات پر زور دینا چاہیے کہ اب جنگوں کو ختم کرنے اور امن و مذاکرات کو اختیار کرنے کا وقت آگیا ہے۔ عالمی سطح پر پیدا ہونے والی تباہ کن صورتحال کو حل کرنے کا یہی واحد راستہ ہے۔

.@MirwaizKashmir at the Iranian President’s event in New Delhi, where he visits an exhibition commemorating the innocent children killed in Minab. pic.twitter.com/upyDVR1Pc7

— Mirwaiz Manzil-Office of Mirwaiz-e-Kashmir (@mirwaizmanzil) September 11, 2026

ہندوستان اور ایران کے تعلقات کے ساتھ ساتھ عالمی طاقتوں کی وسیع تر ذمہ داریوں کا ذکر کرتے ہوئے میرواعظ نے علاقائی تشدد کے خاتمے کے لیے اجتماعی اور فیصلہ کن اقدامات پر زور دیا۔ انہوں نے کہا کہ موجودہ صورتحال میں ہمیں ایران ہو یا فلسطین ہر جگہ ہونے والی زیادتیوں اور ظلم کے خلاف آواز بلند کرنے کو یقینی بنانا ہوگا۔ اب کارروائی کا وقت آچکا ہے۔ تمام عالمی طاقتوں کی جانب سے ایک مضبوط پیغام جانا چاہیے کہ جنگ ختم ہونی چاہیے اور مذاکرات و سفارت کاری کو موقع دیا جانا چاہیے تاکہ بات چیت کا عمل شروع ہوسکے۔

اجلاس میں ہندوستان کے دیگر مذہبی رہنماؤں نے بھی عدم تشدد اور امن کی حمایت میں اپنے خیالات کا اظہار کیا۔ جین مذہبی رہنما آچاریہ لوکیش منی نے بتایا کہ انہوں نے ایرانی صدر کو تہران میں ایک بین الاقوامی امن اقدام کی میزبانی کی باضابطہ دعوت دی ہے۔آچاریہ لوکیش منی نے کہا کہ اس وقت سب کی نظریں ہندوستان پر ہیں۔ یہاں منعقد ہونے والے برکس سربراہی اجلاس کے دوران انہوں نے ایران کے صدر کو دعوت دی کہ ہم ایران میں اپنی نوعیت کی پہلی امن کانفرنس منعقد کریں۔انہوں نے کہا کہ مذہبی رہنماؤں کی حیثیت سے ہمارا یقین ہے کہ جنگ تشدد اور دہشت گردی کسی بھی مسئلے کا حل نہیں ہیں۔ ہر مسئلے کو بات چیت مذاکرات اور امن کی کوششوں کے ذریعے حل کیا جاسکتا ہے۔ اسی لیے انہوں نے ایرانی صدر کو دعوت دی اور انہیں یہ کہتے ہوئے خوشی محسوس ہورہی ہے کہ صدر پزشکیان نے اس دعوت کو قبول کرلیا ہے۔ بہت جلد ہم دنیا بھر کے مذہبی رہنماؤں اور امن پسند قوتوں کے ساتھ ایک مشترکہ پلیٹ فارم پر جمع ہوں گے اور بات چیت اور مذاکرات کے ذریعے دنیا میں امن لانے کی کوشش کریں گے۔

اس کے بعد اجمیر شریف درگاہ کے گدی نشین حاجی سید سلمان چشتی نے برکس سربراہی اجلاس کے موقع پر عالمی ہم آہنگی انصاف اور عالمگیر بھائی چارے کے لیے ہندوستان کے عزم کا اعادہ کیا۔اجلاس کے بعد اے این آئی سے گفتگو کرتے ہوئے انہوں نے ہندوستان سے پھوٹنے والی صدیوں پرانی روحانی اقدار کو اجاگر کیا۔ حاجی سید سلمان چشتی نے کہا کہ آج برکس سربراہی اجلاس کے تحت ہندوستان بھر کے تمام روحانی رہنما یہاں موجود ہیں۔ کشمیر سے کنیا کماری تک صدیوں سے یہی پیغام دیا جاتا رہا ہے کہ سب سے محبت کرو اور کسی سے نفرت نہ کرو۔دنیا بھر کے رہنماؤں کی موجودگی میں ہندوستان میں ہونے والے اہم سربراہی اجلاس کا ذکر کرتے ہوئے انہوں نے دنیا بھر میں ناانصافی کے خلاف مضبوط موقف اختیار کرنے کی اپیل کی۔ انہوں نے کہا کہ یہ بہت اچھا پیغام ہے کہ ہندوستان کی سرزمین سے پوری دنیا یہاں موجود ہے۔ برکس سربراہی اجلاس ہورہا ہے اور دنیا بھر کے رہنما یہاں موجود ہیں۔ آج پیغام بالکل واضح ہے کہ کسی کے ساتھ ناانصافی نہیں ہونی چاہیے۔

Multiple Faiths, One Voice – #Minab 168
Ayatollah Gholam-Hossein Mohseni-Eje’i, Chief Justice of the Islamic Republic of Iran, who travelled to India to participate in the #BRICS Meeting of Heads of Judiciary, began his visit with a meeting at the Embassy of the Islamic Republic… pic.twitter.com/bVAnWnnB7l

— Iran in India (@Iran_in_India) September 7, 2026

انہوں نے مزید کہا کہ ہندوستان نے ہمیشہ انصاف ہمدردی رحم اور وحدت کی اقدار کو برقرار رکھا ہے۔ انہوں نے قدیم ہندوستانی تصور ’’وسودھیو کٹمبکم‘‘ یعنی پوری دنیا ایک خاندان ہے کا حوالہ دیتے ہوئے کہا کہ پوری دنیا ایک خاندان ہے اور ہم سب مل کر ہر انسان کی خدمت کے لیے کام کررہے ہیں۔ایرانی سفارت خانے نے بھی پزشکیان کی ملاقات کو اجاگر کرتے ہوئے سماجی رابطے کی ویب سائٹ ایکس پر ایک پیغام میں کہا کہ ایران کے صدر مسعود پزشکیان جو اٹھارہویں برکس سربراہی اجلاس میں شرکت کے لیے نئی دہلی میں موجود ہیں نے جمعہ کی شام ہندوستانی مذہبی رہنماؤں دانشوروں اور کاروباری شخصیات کے ایک گروپ سے ملاقات کی۔

اس سے قبل اجتماع سے خطاب کرتے ہوئے ایرانی صدر مسعود پزشکیان نے امید ظاہر کی کہ آج وزیراعظم نریندر مودی کے ساتھ ہونے والی ان کی بات چیت دونوں ممالک کے درمیان ثقافت ٹیکنالوجی تجارت سائنس اور معیشت سمیت مختلف شعبوں میں مزید تعاون کی راہ ہموار کرے گی۔وزیراعظم نریندر مودی نے بھی جمعہ کو نئی دہلی میں برکس سربراہی اجلاس کے موقع پر ایرانی صدر مسعود پزشکیان سے ملاقات کی۔ دونوں رہنماؤں کے درمیان دو ہفتوں سے بھی کم عرصے میں یہ دوسری ملاقات تھی۔ اس سے قبل دونوں رہنماؤں نے 31 اگست کو بشکیک میں منعقدہ شنگھائی تعاون تنظیم کے سربراہی اجلاس کے موقع پر ملاقات کی تھی۔