نئی دہلی: 2,445 ایسے طلبہ کے لیے NEET-PG دوبارہ امتحان کرانے کے فیصلے کو سپریم کورٹ میں چیلنج کیا گیا ہے جو تکنیکی خرابی کے باعث امتحان نہیں دے سکے تھے۔ بدھ کو چیف جسٹس سوریہ کانت، جسٹس جوی مالیا باگچی اور جسٹس وی موہنا پر مشتمل بنچ کے سامنے ایک وکیل نے اس معاملے کا ذکر کیا۔ وکیل نے کہا کہ دوبارہ امتحان کرانے کا فیصلہ سپریم کورٹ کے سابقہ حکم کی خلاف ورزی ہے اور معاملے کی فوری سماعت کی درخواست کی۔

سپریم کورٹ نے کہا کہ NEET سے متعلق تمام معاملات جسٹس پی ایس نرسمہا کی سربراہی والی بنچ کے سامنے زیر سماعت ہیں۔ بنچ نے کہا، ’’NEET سے متعلق تمام معاملات جسٹس نرسمہا کی سربراہی والی مقررہ بنچ کے سامنے ہیں۔ آپ اسی بنچ کے سامنے معاملہ پیش کریں۔ ان معاملات میں کئی پیش رفت ہوتی رہتی ہے۔‘‘

نیشنل بورڈ آف ایگزامینیشنز اِن میڈیکل سائنسز تکنیکی خرابی سے متاثر ہونے والے 2,445 امیدواروں کے لیے NEET-PG 2026 کا دوبارہ امتحان منعقد کرے گا۔ NEET-PG 2026 کا امتحان 30 اگست کو ملک بھر میں منعقد ہوا تھا۔ مجموعی طور پر 2,65,980 امیدوار امتحان میں شریک ہوئے تھے، جن میں سے 2,63,535 امیدواروں کا امتحان کامیابی سے مکمل ہوا تھا۔ سرکاری نوٹس میں یہ اطلاع دی گئی تھی۔