نئی دہلی : کانگریس کے رکن پارلیمان راہل گاندھی نے جمعرات کے روز لداخ کے ایک وفد سے ملاقات کی اور کہا کہ لداخ کے لوگ روزگار اور صنعت چاہتے ہیں۔ لوک سبھا میں قائد حزب اختلاف راہل گاندھی نے امید ظاہر کی کہ مرکزی وزیر داخلہ امت شاہ، جو اسی دن دو روزہ دورے پر لیہ پہنچے، اس حقیقت کو سمجھ سکیں گے۔

اس سے قبل دن میں زنسکار کے لوگوں نے لیہ، لداخ میں مرکزی وزیر داخلہ امت شاہ کا روایتی رقص اور گیتوں کے ساتھ استقبال کیا۔ کانگریس پارٹی نے اس ملاقات کی تصاویر اپنے سرکاری سوشل میڈیا اکاؤنٹ پر بھی شیئر کیں۔ راہل گاندھی نے “ایکس” پر پوسٹ کرتے ہوئے کہا، “لداخ کے نوجوانوں نے مجھے بتایا کہ ان کے خوبصورت خطے کو ایک پولیس اسٹیٹ میں تبدیل کر دیا گیا ہے۔

ان کی آوازوں کو دبایا گیا ہے، جمہوری حقوق کو کچلا گیا ہے، اور ان کی زمین اور نازک ماحول کو مودی جی کے ارب پتی دوستوں کے حوالے کیا جا رہا ہے۔ لداخ کے لوگ ترقی کے خلاف نہیں ہیں۔ وہ روزگار اور صنعت چاہتے ہیں، لیکن ایسی ترقی جو مقامی لوگوں کے فائدے میں ہو۔ مجھے امید ہے کہ اپنے دورے کے دوران وزیر داخلہ اس حقیقت کو سمجھ سکیں گے۔”

دوسری جانب لداخ کے لیفٹیننٹ گورنر ونئے کمار سکسینہ نے پیر کے روز یونین ٹیریٹری میں پانچ نئے اضلاع کے قیام کی منظوری دی ہے، جس کا مقصد نچلی سطح پر حکمرانی کو مضبوط بنانا اور انتظامی نظام کو مزید مؤثر بنانا ہے۔ نئے اضلاع میں نوبرا، شام، چانگتھانگ، زنسکار اور دراس شامل ہیں، جس کے بعد لداخ میں اضلاع کی مجموعی تعداد سات ہو گئی ہے۔ واضح رہے کہ لداخ 31 اکتوبر 2019 کو یونین ٹیریٹری بنا تھا اور یہ اپنی پہاڑی خوبصورتی اور منفرد ثقافت کے لیے جانا جاتا ہے۔