نئی دہلی

اندور کے مہاویر نگر علاقے میں آلودہ پینے کے پانی کے باعث متعدد افراد کے بیمار ہونے کے دعووں کے ایک دن بعد محکمۂ صحت نے بدھ کے روز کہا کہ اس وقت علاقے کی صورتحال معمول پر ہے اور مکمل طور پر قابو میں ہے۔

محکمے نے دعویٰ کیا کہ مہاویر نگر کے کسی بھی سرکاری یا نجی اسپتال میں الٹی اور دست میں مبتلا کوئی مریض زیرِ علاج نہیں ہے۔یہ معاملہ ملک کے صاف ترین شہر اندور کے بھاگیرتھ پورہ علاقے میں آلودہ پینے کے پانی کی فراہمی سے کئی افراد کی ہلاکتوں کے واقعے کے تقریباً چھ ماہ بعد سامنے آیا ہے۔

محکمۂ تعلقاتِ عامہ کی جانب سے جاری سرکاری بیان میں چیف میڈیکل اینڈ ہیلتھ آفیسر (سی ایم ایچ او) ڈاکٹر مادھو پرساد ہاسانی کے حوالے سے کہا گیا کہ منگل کے روز مہاویر نگر میں چند افراد میں الٹی اور دست جیسی علامات کی اطلاع ملتے ہی محکمۂ صحت نے فوری ردِعمل ٹیم (آر آر ٹی) کو موقع پر روانہ کیا۔ ٹیم نے علاقے کا تفصیلی معائنہ کیا اور تقریباً 85 گھروں کا طبی سروے انجام دیا۔

ڈاکٹر ہاسانی کے مطابق سروے کے دوران معلوم ہوا کہ علاقے کے کسی بھی سرکاری یا نجی طبی مرکز میں الٹی اور دست کے کسی مریض کو داخل نہیں کیا گیا ہے۔انہوں نے کہا کہ مقامی سطح پر 15 سے 20 افراد میں الٹی اور دست جیسی علامات کی اطلاع ملی تھی، جن کے خون کے نمونے حاصل کیے گئے۔ تاہم جانچ کے لیے درکار پاخانے (اسٹول) کے نمونے ان افراد میں سے کسی نے فراہم نہیں کیے۔

سی ایم ایچ او نے بتایا کہ اس وقت مہاویر نگر کی صورتحال "معمول کے مطابق اور قابو میں" ہے۔انہوں نے مزید کہا کہ محکمۂ صحت نے احتیاطی اقدام کے طور پر علاقے میں او آر ایس کے پیکٹ اور کلورین کی گولیاں تقسیم کی ہیں۔واضح رہے کہ منگل کے روز مہاویر نگر میں ایک سرکاری نلکوب میں مبینہ طور پر سیوریج کے پانی کے رساؤ سے پینے کا پانی آلودہ ہونے کی شکایت سامنے آئی تھی، جس کے بعد متعدد افراد نے الٹی، دست اور معدے سے متعلق مسائل کا دعویٰ کیا تھا۔