نئی دہلی
مغربی بنگال حکومت نے جمعہ کے روز کولکتہ ہائی کورٹ کو بتایا کہ سرکاری ملازمین کے لیے یومِ یوگا کی تقریب میں شرکت کرنا لازمی نہیں ہے۔ اس وضاحت کے بعد ہائی کورٹ نے ایک ملازم تنظیم کی درخواست نمٹا دی۔
مغربی بنگال حکومت کے ملازمین کی بائیں بازو کے نظریات رکھنے والی تنظیم "اسٹیٹ کوآرڈینیشن کمیٹی" نے چیف سیکریٹری کی جانب سے جاری کیے گئے اس حکم کو چیلنج کیا تھا، جس میں تمام ملازمین سے تقریب میں لازمی شرکت کرنے کو کہا گیا تھا۔ تنظیم نے اس ہدایت نامے کو جاری کرنے کے لیے چیف سیکریٹری کے اختیار پر بھی سوال اٹھایا تھا۔
جسٹس امریتا سنہا نے ایڈیشنل ایڈووکیٹ جنرل بلودل بھٹاچاریہ سے حکومت کا مؤقف جاننے کے بعد درخواست نمٹاتے ہوئے زبانی طور پر کہا کہ اس مقدمے کی کوئی ضرورت نہیں ہے۔
عدالت نے نوٹ کیا کہ مغربی بنگال حکومت کی جانب سے جمع کرائی گئی تحریری ہدایات میں واضح کیا گیا ہے کہ چیف سیکریٹری کا حکم ’’تمام سرکاری ملازمین سے بین الاقوامی یومِ یوگا کے موقع پر سرکاری تقریب میں شرکت کی ایک عمومی اپیل‘‘ ہے۔
ہدایت نامے میں مزید کہا گیا ہے کہ یہ حکم ’’لازمی نوعیت کا نہیں ہے اور اگر کوئی ملازم ذاتی وجوہات کی بنا پر تقریب میں شرکت نہ کر سکے تو اس کے خلاف کسی قسم کی تادیبی یا زبردستی کی کارروائی نہ تو زیرِ غور تھی اور نہ ہی حکم نامے میں اس کا کوئی ذکر کیا گیا تھا۔
درخواست نمٹاتے ہوئے عدالت نے کہا کہ ریاستی حکومت کی جانب سے پیش کی گئی وضاحتوں اور ہدایات کو مدنظر رکھتے ہوئے اس معاملے میں مزید کارروائی کی ضرورت نہیں ہے۔
