نئی دہلی: نیٹ پرچہ لیک تنازع پر سی جے پی (کاکروچ جنتا پارٹی) کا احتجاج ختم ہونے کے بعد دہلی ٹیکسی اینڈ ٹورسٹ ٹرانسپورٹ اینڈ ٹور آپریٹرز ایسوسی ایشن نے 4 اگست کو ایتھنول ملا ہوا پٹرول (ایتھنول بلینڈڈ پٹرول) کی پالیسی کے خلاف پارلیمنٹ مارچ کا اعلان کیا ہے۔

ایسوسی ایشن کے صدر سنجے سمرت نے اے این آئی سے گفتگو کرتے ہوئے کہا کہ ایتھنول ملا پٹرول ملک میں گاڑیوں کو نقصان پہنچائے گا۔ ان کا کہنا تھا کہ مختلف حلقوں میں لاکھوں موٹر سائیکلیں، نجی کاریں اور ٹیکسیاں سی این جی اور پٹرول دونوں پر چلتی ہیں، اور ایتھنول والے پٹرول کے نفاذ سے یہ گاڑیاں کسی بھی وقت ناکارہ ہو سکتی ہیں۔

بڑھتی ہوئی قیمتوں پر ناراضی ظاہر کرتے ہوئے سنجے سمرت نے کہا کہ پٹرول پمپ پر ہر 100 روپے کے پٹرول کے ساتھ عوام کو 20 فیصد ایتھنول ’’گنے کے رس‘‘ کے نام پر دیا جا رہا ہے، جس سے لوگ خود کو دھوکا کھایا ہوا محسوس کرتے ہیں۔ انہوں نے کہا، ’’جب سے نتن گڈکری ٹرانسپورٹ وزیر بنے ہیں، ہم مسلسل مشکلات کا سامنا کر رہے ہیں۔

دس برس سے زیادہ عرصے سے ہماری باتوں کو نظر انداز کیا جا رہا ہے۔ پہلے ہمیں مالی اور ذہنی نقصان اٹھانا پڑ رہا تھا، اب ایتھنول کے نام پر گنے کا رس ملا کر ہماری گاڑیوں کو بھی نقصان پہنچایا جا رہا ہے۔ جب ہم 100 روپے کا پٹرول خریدتے ہیں تو اس میں 20 فیصد ایتھنول ملا ہوتا ہے، جس سے ہمیں محسوس ہوتا ہے کہ ہمارے ساتھ دھوکا کیا جا رہا ہے۔‘‘

انہوں نے مزید کہا کہ ہر پارلیمانی حلقے میں لاکھوں موٹر سائیکلیں، نجی گاڑیاں اور ٹیکسیاں ہیں، جو اس پالیسی کی وجہ سے ناکارہ ہو سکتی ہیں۔ ان کے مطابق یہ گاڑیوں کو اسکریپ بنانے کی ایک سازش ہے، لیکن اس پر کوئی توجہ نہیں دی جا رہی۔ انہوں نے کہا کہ نتن گڈکری کو چھوڑ کر باقی 542 ارکانِ پارلیمنٹ کو اس پالیسی کی مخالفت کرنی چاہیے۔

ایسوسی ایشن نے ایتھنول پالیسی کی سخت مخالفت کرتے ہوئے مطالبہ کیا کہ اسے پورے ملک سے مکمل طور پر واپس لیا جائے۔ ادھر حکومت نے پیر کے روز پارلیمنٹ کو بتایا کہ ملک میں ایسے کتنے فیصد گاڑیاں ہیں جو مکمل طور پر ای-20 (E20) ایندھن کے مطابق ہیں، اس بارے میں کوئی جائزہ نہیں لیا گیا ہے۔

پٹرولیم و قدرتی گیس کے وزیر مملکت سریش گوپی نے ایک سوال کے تحریری جواب میں کہا کہ اس حوالے سے کوئی باضابطہ جائزہ نہیں کیا گیا۔ البتہ انہوں نے بتایا کہ ایتھنول بلینڈڈ پٹرول (EBP) پروگرام کو مرحلہ وار، سائنسی بنیادوں پر اور مختلف متعلقہ اداروں، جن میں نیتی آیوگ، آٹو موبائل کمپنیاں، آئل مارکیٹنگ کمپنیاں، آٹوموٹیو ریسرچ ایسوسی ایشن آف انڈیا (ARAI)، سوسائٹی آف انڈین آٹوموبائل مینوفیکچررز (SIAM)، انڈین انسٹی ٹیوٹ آف پیٹرولیم (IIP) اور دیگر تکنیکی ادارے شامل ہیں، کی مشاورت سے نافذ کیا جا رہا ہے۔