نئی دہلی: مرکزی وزیر برائے پارلیمانی امور کرن رجیجو نے پارلیمنٹ سے لوک امتحانات (غیر منصفانہ ذرائع کی روک تھام) ترمیمی بل، 2026 کی منظوری کا خیرمقدم کرتے ہوئے کہا کہ اس قانون کو ایوان کے بیشتر ارکان کی حمایت حاصل رہی۔ امتحانی پرچہ لیک کے مسئلے پر قابو پانے کے مقصد سے لائے گئے اس بل پر گفتگو کرتے ہوئے رجیجو نے کہا کہ ایوان میں اس قانون کی ضرورت پر عمومی اتفاق تھا، جبکہ جو مخالفت سامنے آئی وہ بل کی خوبیوں کے بجائے سیاسی وجوہات پر مبنی تھی۔
انہوں نے صحافیوں سے کہا، "پرچہ لیک سے متعلق بل کو ارکانِ پارلیمنٹ کی اکثریت کی حمایت سے منظور کیا گیا۔ اس قانون کی اصل میں کوئی مخالفت نہیں تھی، جو اختلاف سامنے آیا وہ سیاسی محرکات پر مبنی تھا۔ تعلیم کے معاملے میں سب سنجیدہ ہیں، خاص طور پر پرچہ لیک کے مسئلے پر۔" رجیجو نے کہا کہ حکومت نوجوانوں کے مستقبل کے تحفظ کے لیے پُرعزم ہے اور اب اس قانون کو جلد از جلد نافذ کرنا اولین ترجیح ہے۔
Merit will prevail. Malpractice will pay.
— Kiren Rijiju (@KirenRijiju) July 30, 2026
With the Public Examinations (Prevention of Unfair Means) Amendment Bill, 2026 now passed by both Houses of Parliament, Bharat has taken a decisive step towards fair & transparent public examinations.
The aspirations of millions of… pic.twitter.com/M5PIEts6HB
انہوں نے کہا، "اب ہماری ترجیح یہ ہے کہ اس قانون کو جلد از جلد نافذ کیا جائے تاکہ طلبہ کے مستقبل کا تحفظ یقینی بنایا جا سکے۔ اس کے علاوہ بھی کئی اہم بل پارلیمنٹ میں زیر غور ہیں، جن میں آج پیش ہونے والا بل بھی شامل ہے۔" وزیرِ پارلیمانی امور نے ایوان میں بار بار ہونے والی ہنگامہ آرائی پر بھی اظہارِ خیال کرتے ہوئے اپوزیشن جماعتوں سے اپیل کی کہ وہ پارلیمنٹ کو مؤثر طریقے سے چلنے دیں۔
انہوں نے کہا، "میں اپوزیشن جماعتوں سے اپیل کرتا ہوں کہ وہ اپنے مسائل ضرور اٹھائیں، لیکن بلوں کی منظوری، وقفۂ سوالات اور پارلیمنٹ کی دیگر اہم کارروائی میں رکاوٹ نہ ڈالیں۔ اس سے نہ صرف ان کا بلکہ سب کا فائدہ ہوگا۔" انہوں نے امید ظاہر کی کہ آئندہ اجلاسوں میں تمام سیاسی جماعتیں تعاون کریں گی تاکہ پارلیمنٹ کی کارروائی خوش اسلوبی سے چل سکے۔
واضح رہے کہ 30 جولائی کو پارلیمنٹ کے مانسون اجلاس کے دوران لوک امتحانات (غیر منصفانہ ذرائع کی روک تھام) ترمیمی بل، 2026 راجیہ سبھا سے بھی منظور ہو گیا۔ اس سے ایک روز قبل یہ بل لوک سبھا سے صوتی ووٹ کے ذریعے منظور کیا گیا تھا، جبکہ راجیہ سبھا میں ووٹنگ کے دوران اپوزیشن نے واک آؤٹ کیا تھا۔ بل پر حکومت اور اپوزیشن کے درمیان شدید سیاسی اختلاف دیکھنے میں آیا۔
اپوزیشن کا الزام تھا کہ حکومت نے جلد بازی میں ترمیمات پیش کیں اور پرچہ لیک کی بنیادی وجوہات کے حل کے بجائے طلبہ کے احتجاج کو ٹھنڈا کرنے کی کوشش کی، جبکہ مرکزی حکومت کا کہنا تھا کہ یہ ترامیم 2024 کے قانون کے نفاذ کے بعد حاصل ہونے والے تجربات کی بنیاد پر کی گئی ہیں اور ان کا مقصد امتحانی بے ضابطگیوں کے خلاف قانونی نظام کو مزید مضبوط بنانا ہے۔
