کیرالہ

کیرالہ اسمبلی انتخابات 2026 کی ووٹوں کی گنتی پیر کے روز آگے بڑھنے کے ساتھ، کانگریس کی قیادت والے متحدہ جمہوری محاذ کے رکن پارلیمنٹ کے سریش نے دعویٰ کیا کہ وہ اکثریت کا ہندسہ عبور کر چکے ہیں اور محاذ کی فیصلہ کن جیت پر اعتماد ظاہر کیا۔

انہوں نے کہا کہ ووٹوں کی گنتی جاری ہے۔ ہماری توقع 100 نشستوں کی تھی، اب ہم 89 سے آگے جا رہے ہیں۔ ہم نے ایگزٹ پول سے پہلے جو کہا تھا کہ متحدہ جمہوری محاذ 100 سے زیادہ نشستیں جیتے گا، وہ پیش گوئی سو فیصد درست ثابت ہوگی۔الیکشن کمیشن کے رجحانات کے مطابق کانگریس کی قیادت والا متحدہ جمہوری محاذ 82 نشستوں پر برتری کے ساتھ اکثریت کا ہندسہ عبور کر چکا ہے۔ کانگریس 50 نشستوں پر آگے ہے جبکہ اس کی اتحادی مسلم لیگ 17 نشستوں پر سبقت رکھتی ہے۔ بایاں محاذ 51 نشستوں پر آگے ہے۔

بائیں محاذ کی خراب کارکردگی پر سوال کیے جانے پر ریاستی کانگریس صدر سنی جوزف نے کہا کہ عوام مخالف پالیسیوں نے وجین کی شکست کا سبب بنایا۔کانگریس کی رکن پارلیمنٹ جیبی میتھر نے کہا کہ ہم 89 سے آگے پہنچ چکے ہیں اور اب صرف 11 نشستیں باقی ہیں۔ یہ ایگزٹ پول کے اندازوں سے کہیں زیادہ ہے۔ کیرالہ کے عوام نے متحدہ جمہوری محاذ کو واضح جیت دی ہے۔ یہ خوشی، جوش اور فخر کا لمحہ ہے۔ ہم عوام کے شکر گزار ہیں۔ یہ اس بات کی بھی عکاسی ہے کہ بایاں محاذ بری طرح ناکام رہا اور حکومت مخالف لہر نے بھرپور اثر دکھایا۔

ادھر کیرالہ میں بی جے پی کے صدر راجیو چندرشیکھر نے کہا کہ پارٹی حتمی نتائج کا انتظار کرے گی اور اس کے بعد ہی کوئی باضابطہ تبصرہ کرے گی، تاہم انہوں نے اعتماد ظاہر کیا کہ ووٹر اپوزیشن کی "تقسیم کرنے والی اور بدعنوان سیاست" کو مسترد کریں گے۔انہوں نے کہا کہ ہم نتائج کا انتظار کریں گے۔ آج دوپہر تک نتائج سامنے آ جائیں گے، اس کے بعد ہم تبصرہ کریں گے۔ یہ جمہوریت ہے، کوئی بھی سیاسی جماعت کسی دوسری جماعت کی قسمت کا فیصلہ نہیں کر سکتی۔

اسی دوران کیرالہ کے مالاپورم ضلع میں مختلف حلقوں سے سامنے آنے والے رجحانات کے مطابق متحدہ جمہوری محاذ کو واضح برتری حاصل ہے، اگرچہ کچھ نشستوں پر بایاں محاذ سخت مقابلہ کر رہا ہے۔

کونڈوٹی میں متحدہ جمہوری محاذ کے امیدوار ٹی پی اشرف علی 89 ووٹوں سے آگے ہیں۔ ایرناد میں پی کے بشیر 41 ووٹوں سے آگے ہیں جبکہ نیلمبور میں اریادان شوکت 79 ووٹوں کی برتری رکھتے ہیں۔ وانڈور میں اے پی انیل کمار 65 ووٹوں سے آگے ہیں۔