نئی دہلی: مرکزی وزیر داخلہ امت شاہ نے حکام کو ہدایت دی ہے کہ ہندوستان کی بین الاقوامی سرحدوں سے 15 کلومیٹر کے دائرے میں موجود تمام غیر قانونی تعمیرات کو منہدم کیا جائے اور تجاوزات و سرحد پار جرائم کے خلاف “زیرو ٹالرینس” پالیسی کو سختی سے نافذ کیا جائے۔

یہ ہدایت منگل کے روز بیکانیر میں امت شاہ کی صدارت میں منعقدہ ایک اعلیٰ سطحی سکیورٹی جائزہ میٹنگ کے دوران دی گئی، جس میں پاکستان سے متصل راجستھان کے سرحدی اضلاع کی سکیورٹی صورتحال کا جائزہ لیا گیا۔ حکام کے مطابق، وزارت داخلہ نے سرحدی علاقوں کے ضلع مجسٹریٹس کی ذمہ داریوں میں توسیع کر دی ہے۔

انہیں بینکنگ لین دین کی قانونی و مالی جانچ، بڑے تجارتی اداروں کی تصدیق، فنڈنگ کے ذرائع کی چھان بین، میول اکاؤنٹس اور شیل کمپنیوں کی نگرانی، فرضی آدھار کارڈز کی شناخت اور اسمگلنگ نیٹ ورکس پر قابو پانے جیسے امور کی ذمہ داری سونپی گئی ہے۔ اس میٹنگ میں راجستھان کے وزیر اعلیٰ بھجن لال شرما، ریاستی حکومت کے سینئر افسران، اور بیکانیر، جیسلمیر، باڑمیر، سری گنگانگر اور پھلودی کے ضلع مجسٹریٹس اور سپرنٹنڈنٹس آف پولیس شریک ہوئے۔

امت شاہ نے ہر سرحدی ضلع کے لیے “360 ڈگری سکیورٹی کور” کی ضرورت پر زور دیتے ہوئے کہا کہ اس میں عوام، مقامی انتظامیہ اور سکیورٹی ایجنسیوں کو شامل کیا جانا چاہیے۔ انہوں نے بارڈر سکیورٹی فورس (بی ایس ایف)، سینٹرل بورڈ آف ڈائریکٹ ٹیکسز (سی بی ڈی ٹی)، نارکوٹکس کنٹرول بیورو (این سی بی) اور ریاستی حکام کے درمیان بہتر تال میل پر بھی زور دیا تاکہ دراندازی، منشیات اسمگلنگ، دہشت گردی کی مالی معاونت اور دیگر سرحد پار جرائم پر قابو پایا جا سکے۔

وزیر داخلہ نے خاص طور پر حکام کو ہدایت دی کہ بین الاقوامی سرحد سے صفر تا 15 کلومیٹر کے دائرے میں غیر قانونی تعمیرات کے خلاف زیرو ٹالرینس پالیسی پر سختی سے عمل درآمد یقینی بنایا جائے اور گزشتہ برسوں میں تعمیر کی گئی تمام غیر قانونی عمارتوں کو منہدم کیا جائے۔

حکام کے مطابق، سرحدی اضلاع کو یہ بھی ہدایت دی گئی ہے کہ وہ جرائم اور منشیات کے پھیلاؤ کی وجوہات اور انداز کا مطالعہ کریں اور اس کے تدارک کے لیے طویل مدتی احتیاطی اقدامات تیار کریں۔ امت شاہ نے مزید کہا کہ سرحدی دیہات میں حکمرانی مضبوط بنانے، بنیادی ڈھانچے کی کمی دور کرنے اور مقامی آبادی کی مدد کے لیے “وائبرنٹ ولیجز پروگرام (VVP)-II” کو مؤثر طریقے سے نافذ کیا جائے۔ انہوں نے ان علاقوں میں فلاحی اسکیموں کی سو فیصد تکمیل اور سائبر جرائم سے نمٹنے کے لیے ‘1930’ ہیلپ لائن کے زیادہ استعمال پر بھی زور دیا۔