نئی دہلی: دہلی ہائی کورٹ نے سابق ہندوستانی کرکٹر یووراج سنگھ کے شخصی حقوق (Personality Rights) کے تحفظ کے حق میں عبوری حکم جاری کرتے ہوئے کہا ہے کہ مصنوعی ذہانت (AI) سے تیار کردہ ڈیپ فیک ویڈیوز، جعلی سوشل میڈیا پوسٹس اور ان کی شناخت کے غیر مجاز تجارتی استعمال سے ان کی ساکھ اور تجارتی وقعت کو نقصان پہنچ رہا ہے۔

جسٹس جیوتی سنگھ نے قرار دیا کہ یووراج سنگھ نے پہلی نظر میں (Prima Facie) مضبوط مقدمہ قائم کیا ہے اور اگر انہیں فوری تحفظ نہ دیا گیا تو انہیں ناقابلِ تلافی نقصان پہنچ سکتا ہے۔ عدالت نے کہا کہ شخصی حقوق اور رازداری کی خلاف ورزی کرنے والوں کے ساتھ سختی سے نمٹا جانا چاہیے۔

عدالت نے متعدد سوشل میڈیا صارفین، نامعلوم افراد (جان ڈو)، آن لائن فروخت کنندگان اور دیگر پلیٹ فارمز کو یووراج سنگھ کی اجازت کے بغیر ان کے نام، تصویر، آواز، عرفیت "یووی" یا دیگر شناختی خصوصیات استعمال کرکے AI سے تیار کردہ مواد یا تجارتی مصنوعات بنانے، شائع کرنے یا فروخت کرنے سے روک دیا۔

عدالت نے کہا کہ یووراج سنگھ تقریباً 17 برس تک ہندوستان کی نمائندگی کرنے والے ممتاز کرکٹر رہے ہیں، 2011 کے ورلڈ کپ میں اہم کردار ادا کیا، پدم شری اور ارجن ایوارڈ سے نوازے گئے، اور YouWeCan Foundation کے ذریعے سماجی خدمات بھی انجام دیتے رہے ہیں۔ اس لیے انہیں اپنی شخصیت اور شناخت کے تجارتی استعمال پر مکمل قانونی حق حاصل ہے۔ عدالت نے نوٹ کیا کہ بعض افراد AI کے ذریعے جعلی تصاویر، ڈیپ فیک ویڈیوز اور فرضی سوشل میڈیا پوسٹس بنا رہے تھے، جن میں یووراج سنگھ کو نازیبا زبان استعمال کرتے، جارحانہ رویہ اختیار کرتے یا دوسرے کرکٹر پر حملہ کرتے ہوئے دکھایا گیا۔

عدالت کے مطابق ایسا مواد ان کی برسوں کی محنت سے حاصل کی گئی شہرت کو نقصان پہنچاتا ہے۔ عدالت نے یہ بھی پایا کہ بعض آن لائن فروخت کنندگان یووراج سنگھ کی تصویر اور نام کے ساتھ ٹی شرٹس، پوسٹرز، اسٹیکرز اور دیگر مصنوعات ان کی اجازت کے بغیر فروخت کر رہے تھے، جس سے عوام میں یہ غلط تاثر پیدا ہوتا ہے کہ یہ مصنوعات ان کی توثیق شدہ ہیں۔ عدالت نے میٹا کو ہدایت دی کہ وہ متعلقہ فیس بک اور انسٹاگرام لنکس 36 گھنٹوں کے اندر ہٹا دے، جبکہ ایمیزون اور فلپ کارٹ کو متعلقہ مصنوعات کی فہرستیں ہٹانے کا حکم دیا گیا۔ اسی طرح Turtle Wings اور SMEEPS کو بھی 24 گھنٹوں کے اندر خلاف ورزی پر مبنی مواد ہٹانے کی ہدایت دی گئی۔

عدالت نے واضح کیا کہ اگر مستقبل میں بھی یووراج سنگھ کو اس نوعیت کا کوئی نیا خلاف ورزی پر مبنی مواد ملتا ہے تو وہ متعلقہ پلیٹ فارم یا عدالت سے مناسب قانونی چارہ جوئی کر سکتے ہیں۔ مقدمے کی مزید سماعت بعد میں ہوگی۔