نئی دہلی
بھارتیہ جنتا پارٹی کی رکنِ پارلیمنٹ کنگنا رناوت نے پیر کے روز عوام سے اپیل کی کہ وہ وزیرِ اعظم نریندر مودی کی قیادت والی حکومت پر بھروسہ رکھیں۔ انہوں نے اپوزیشن پر الزام لگایا کہ وہ ملک میں ایل پی جی کی قلت کے معاملے پر خوف اور گھبراہٹ پھیلانے کی کوشش کر رہی ہے۔
کنگنا رناوت نے کہا كہ اپوزیشن گھبراہٹ پیدا کرنے کی کوشش کر رہی ہے اور میں ملک کے لوگوں سے اپیل کرتی ہوں کہ وہ وزیرِ اعظم مودی کی قیادت پر اعتماد رکھیں۔دوسری جانب کانگریس کے صدر ملیکارجن کھڑگے نے ایوانِ بالا میں جاری مغربی ایشیا کے بحران کے باعث ملک میں پیدا ہونے والے ایل پی جی بحران پر تشویش ظاہر کی۔
راجیہ سبھا میں پیر کے روز خطاب کرتے ہوئے کھڑگے نے کہا کہ ایل پی جی سلنڈروں کی کمی کے باعث ملک بھر میں گھریلو صارفین اور کاروباری اداروں کو شدید مشکلات کا سامنا کرنا پڑ رہا ہے۔
انہوں نے کہا كہ میں اس ایوان کی توجہ ملک میں جاری ایل پی جی بحران کی طرف مبذول کرانا چاہتا ہوں، جو مغربی ایشیا میں جاری تنازع کے باعث پیدا ہوا ہے۔ اس بحران نے پورے ملک میں بڑے پیمانے پر بے چینی پیدا کر دی ہے۔کھڑگے کے مطابق اس بحران کا سب سے زیادہ اثر غریب اور کمزور طبقات، متوسط طبقے، عام گھروں، ریستورانوں، ہاسٹلوں اور تجارتی صارفین پر پڑ رہا ہے۔
انہوں نے کہا کہ ہندوستان اپنی تقریباً 60 فیصد ایل پی جی ضرورت درآمد کرتا ہے اور ان درآمدات میں سے تقریباً 90 فیصد آبنائے ہرمز سے ہو کر آتی ہیں، جس کی وجہ سے ملک جغرافیائی و سیاسی کشیدگی سے متاثر ہو سکتا ہے۔
انہوں نے مزید کہا كہ اس بحران کے اثرات ملک کے تقریباً ہر حصے میں محسوس کیے جا رہے ہیں۔ گھریلو صارفین پریشان ہیں، جبکہ سڑک کنارے چھوٹے ہوٹل، ریستوراں اور ہاسٹل اس کا بڑا بوجھ اٹھا رہے ہیں۔ کمیونٹی کچن سے لے کر فلاحی کھانا مراکز تک کئی مقامات بند ہونے پر مجبور ہو گئے ہیں۔کھڑگے کے بیان پر ردِعمل دیتے ہوئے مرکزی وزیر جے پی نڈا نے اپوزیشن کو اس معاملے کو سیاسی رنگ دینے پر تنقید کا نشانہ بنایا۔
انہوں نے کہا كہ کانگریس کے ایک رہنما کو سلنڈر ذخیرہ کرتے ہوئے پکڑا گیا ہے۔ وہ ملک کے پرامن لوگوں کو بھڑکا رہے ہیں۔ افسوس کی بات ہے کہ اپوزیشن، خاص طور پر کانگریس، مشکل حالات میں بھی سیاست کرنے سے باز نہیں آتی۔ یہ بحران ہندوستان کی وجہ سے نہیں ہے۔
ادھر پٹرولیم اور قدرتی گیس کی وزارت نے کہا کہ ملک بھر میں ایل پی جی ڈسٹری بیوشن مراکز پر گیس کی سپلائی ختم ہونے کی کوئی اطلاع نہیں ملی ہے۔وزارت کے بیان کے مطابق ایل پی جی بکنگ میں کمی دیکھی گئی ہے۔ گزشتہ روز تقریباً 77 لاکھ بکنگ درج کی گئیں، جبکہ 13 مارچ 2026 کو یہ تعداد 88.8 لاکھ تھی۔
بہار، دہلی، ہریانہ اور راجستھان سمیت کئی ریاستوں اور مرکز کے زیرِ انتظام علاقوں نے حکومت کی ہدایات کے مطابق غیر گھریلو ایل پی جی کی تقسیم کے لیے احکامات جاری کیے ہیں۔
وزارت نے مزید کہا کہ تجارتی ایل پی جی سلنڈر ریاستی حکومتوں کو ترجیحی بنیاد پر تقسیم کے لیے فراہم کیے گئے ہیں اور اب یہ 30 ریاستوں اور مرکز کے زیرِ انتظام علاقوں میں صارفین کے لیے دستیاب ہیں۔
.gif)
