نئی دہلی
بدھ کے روز کئی اپوزیشن اراکینِ پارلیمنٹ نے پارلیمنٹ ہاؤس کمپلیکس میں ایل پی جی کی مبینہ قلت کے خلاف احتجاج کیا۔کانگریس کے صدر ملکارجن کھڑگے، این سی پی (ایس پی) کی سپریا سُلے، ایس پی کے دھرمندر یادو، سی پی آئی-ایم ایل کے سُداما پرساد، ڈی ایم کے کی ٹی سُمتی اور جے ایم ایم کی مہوا ماجی سمیت دیگر رہنما پارلیمنٹ کے مکر دوار کے قریب احتجاج میں شامل ہوئے۔
اراکینِ پارلیمنٹ نے "خالی سلنڈر، خالی وعدے" لکھے ہوئے بڑے بینر کے ساتھ حکومت کے خلاف نعرے بازی کی۔ایل پی جی کی یہ مبینہ قلت مغربی ایشیا میں جاری تنازع کے پس منظر میں سامنے آئی ہے، جس کے بعد حکومت نے گھریلو سطح پر پیدا ہونے والی قدرتی گیس کو ایل پی جی کی تیاری، کمپریسڈ نیچرل گیس (سی این جی) اور پائپ کے ذریعے فراہم کی جانے والی گیس کے شعبوں کے لیے ترجیح دی ہے۔
حکومت نے گیس کی تقسیم کو بہتر بنانے اور سپلائی کے دباؤ کو کم کرنے کے لیے اقدامات تیز کر دیے ہیں، جس کے تحت سٹی گیس منصوبوں کی تیز رفتار تکمیل کی ہدایت دی گئی ہے، جبکہ مشکل جغرافیائی و سیاسی حالات کے پیش نظر اہم شعبوں کے لیے کمرشل ایل پی جی کی فراہمی میں بھی اضافہ کیا جا رہا ہے۔
