گاندھی نگر

گجرات حکومت نے وزیرِ اعلیٰ بھوپیندر پٹیل کی قیادت میں شہریوں کی محنت کی کمائی کو ڈیجیٹل فراڈ سے محفوظ رکھنے کے لیے بڑے پیمانے پر پولیس کارروائیوں کا آغاز کیا ہے۔ ایک سرکاری بیان کے مطابق، سائبر مجرموں کے خلاف سخت قانونی کارروائی کو یقینی بنانے اور گجرات کے عوام کو محفوظ ڈیجیٹل ماحول فراہم کرنے کے مقصد سے ریاستی پولیس نے جرائم پیشہ نیٹ ورکس کو ختم کرنے کے لیے کثیر جہتی مہم شروع کی ہے۔

بیان کے مطابق، وزیرِ اعلیٰ کی رہنمائی اور نائب وزیرِ اعلیٰ ہرش سنگھوی کی قیادت میں ریاست بھر میں ایک خصوصی آپریشن چلایا گیا۔ گجرات پولیس کے سائبر سینٹر آف ایکسی لینس کی سربراہی میں کیے گئے اس آپریشن کے دوران "میول اکاؤنٹس" کے خلاف کارروائی کی گئی، جس کے نتیجے میں مختلف مقدمات میں مجموعی طور پر 2,289 کروڑ روپے کے سائبر فراڈ کا انکشاف ہوا۔

میول اکاؤنٹس ایسے بینک اکاؤنٹس ہوتے ہیں جنہیں سائبر مجرم دھوکہ دہی سے حاصل کی گئی رقم وصول کرنے، منتقل کرنے اور منی لانڈرنگ کے لیے استعمال کرتے ہیں۔ ایسے اکاؤنٹس رکھنے والے افراد کو "منی میول" کہا جاتا ہے۔ سائبر مجرم ان اکاؤنٹس کے ذریعے رقم کو ایک اکاؤنٹ سے دوسرے اکاؤنٹ میں منتقل کرتے ہیں۔

گجرات پولیس نے ان میول اکاؤنٹس کی نشاندہی اور ان کے خلاف کارروائی کے لیے یہ خصوصی مہم شروع کی۔ سائبر جرائم میں یہ اکاؤنٹس بعض اوقات جان بوجھ کر اور بعض اوقات لاعلمی میں استعمال کیے جاتے ہیں۔گجرات پولیس اور سائبر سینٹر آف ایکسی لینس نے 2025 میں "آپریشن میول ہنٹ 1.0" کا انعقاد کیا۔ اس آپریشن میں تمام پولیس کمشنرز، رینج ہیڈز، لوکل کرائم برانچ کے انسپکٹرز اور سائبر پولیس اسٹیشنز نے حصہ لیا۔ ہیڈکوارٹرز روزانہ کی بنیاد پر پیش رفت کی نگرانی کرتا رہا اور باقاعدہ رپورٹس حاصل کرتا رہا۔

گجرات پولیس نے انڈین سائبر کرائم کوآرڈینیشن سینٹر (I4 سی )، نیشنل سائبر کرائم رپورٹنگ پورٹل ، کوآرڈینیشن پورٹل اور 1930 ہیلپ لائن سے موصول ہونے والے ڈیٹا کو یکجا کیا۔ اس ڈیٹا کی بنیاد پر ہر ضلع میں نوڈل افسران مقرر کیے گئے اور شکایات کے ازالے کے لیے خصوصی معاون ٹیمیں تشکیل دی گئیں۔

مزید برآں، تمام بینکوں کو حقیقی وقت میں معلومات کے تبادلے کے لیے ہدایات جاری کی گئیں تاکہ مؤثر رابطہ کاری ممکن بنائی جا سکے۔ اس طرح ڈیٹا انٹیلی جنس اور مؤثر ہم آہنگی کے ذریعے گجرات پولیس نے میول اکاؤنٹس سے جڑے جرائم کی جڑوں تک پہنچ کر غیر معمولی کامیابیاں حاصل کیں۔آپریشن میول ہنٹ 1.0 کے نتیجے میں فراڈ کے ایک وسیع نیٹ ورک کو بے نقاب کیا گیا، سیکڑوں گرفتاریاں عمل میں آئیں اور غیر قانونی مالی سرگرمیوں پر بڑا اثر پڑا۔ سرکاری اعداد و شمار کے مطابق اس کارروائی کے دوران 565 ایف آئی آر درج کی گئیں اور سائبر جرائم میں ملوث 638 افراد کو گرفتار کیا گیا۔

تحقیقات میں مجموعی طور پر 4,052 جرائم کی نشاندہی ہوئی، جن میں سے 491 مقدمات گجرات سے متعلق تھے۔ حکام نے 193 میول اکاؤنٹس کے خلاف کارروائی کی، جو 2,289 کروڑ روپے کے بڑے مالیاتی فراڈ سے حاصل شدہ رقم کی منی لانڈرنگ کا اہم ذریعہ تھے۔اس کارروائی کے بعد سائبر جرائم پیشہ گروہوں کے طریقۂ کار میں بھی نمایاں تبدیلی دیکھی گئی۔ اعداد و شمار کے مطابق چیک کے ذریعے رقم نکلوانے کے واقعات میں مجموعی طور پر 75 فیصد کمی آئی، جبکہ ماہانہ چیک نکاسی 126 کروڑ روپے سے کم ہو کر صرف 25 کروڑ روپے رہ گئی، جو تقریباً 80 فیصد کمی کو ظاہر کرتی ہے۔

فراڈ نیٹ ورک کے پہلے مرحلے یعنی ان ابتدائی اکاؤنٹس کی تعداد میں بھی نمایاں کمی آئی، جہاں متاثرین کی رقم سب سے پہلے جمع ہوتی تھی۔ اگست سے دسمبر 2025 کے درمیان ایسے "فرسٹ لیئر میول اکاؤنٹس" میں 30 فیصد کمی ریکارڈ کی گئی۔ اسی طرح اے ٹی ایم کے ذریعے نقد رقم نکالنے کے واقعات، جو ڈیجیٹل ریکارڈ مٹانے کا ایک عام طریقہ سمجھے جاتے ہیں، ستمبر سے دسمبر 2025 کے درمیان 66 فیصد کم ہو گئے۔

میول اکاؤنٹس کے خلاف اس مہم کو مزید مؤثر اور پیشگی بنیادوں پر فعال بنانے کے لیے، ریزرو بینک آف انڈیا  کی رہنمائی میں انڈین ڈیجیٹل پیمنٹس انٹیلی جنس کارپوریشن مصنوعی ذہانت پر مبنی رسک اسکورنگ سسٹم نافذ کر رہی ہے۔اس نظام کے تحت ہر مالی لین دین کو کم خطرہ ، درمیانہ خطرہ یا زیادہ خطرہ  کی درجہ بندی دی جائے گی، جس سے مشتبہ اکاؤنٹس کی شناخت آسان ہو جائے گی۔ ان اسکورز کی بنیاد پر مختلف بینک ضروری کارروائی کر سکیں گے۔

وزیرِ اعظم نریندر مودی مسلسل سائبر جرائم میں اضافے پر تشویش کا اظہار کرتے رہے ہیں اور شہریوں پر زور دیتے رہے ہیں کہ وہ زیادہ بیداری کے ساتھ ڈیجیٹل سرگرمیوں میں حصہ لیں اور "ڈیجیٹل گرفتاری" سمیت مختلف سائبر جرائم سے خود کو محفوظ رکھیں۔