پریاگ راج

وزیر دفاع راجناتھ سنگھ نے پیر کے روز کہا کہ آپریشن سندور "ٹیکنالوجی پر مبنی جنگ" کی ایک مثال تھا، جس میں جدید نظاموں کے استعمال اور بدلتے ہوئے جنگی حالات کے مطابق مسلح افواج کی تیاری کو ظاہر کیا گیا۔نارتھ ٹیک سمپوزیم کی افتتاحی تقریب سے خطاب کرتے ہوئے انہوں نے کہا کہ اس آپریشن میں آکاش میزائل سسٹم، برہموس اور دیگر جدید آلات سمیت جدید ترین پلیٹ فارمز کا مؤثر استعمال کیا گیا۔

انہوں نے کہا کہ آپریشن سندور خود ٹیکنالوجی پر مبنی جنگ کی ایک مثال تھا۔ اس میں آکاش تیر، آکاش میزائل سسٹم اور برہموس جیسے جدید میزائل نظاموں کے ساتھ کئی جدید آلات استعمال کیے گئے۔ اس سے ثابت ہوا کہ ہماری مسلح افواج نہ صرف تبدیلیوں کو سمجھ رہی ہیں بلکہ انہیں اعتماد کے ساتھ اپنانے کی صلاحیت بھی رکھتی ہیں۔انہوں نے غیر یقینی سکیورٹی ماحول میں ہر وقت تیار رہنے کی ضرورت پر زور دیا اور کہا، "میں ہمیشہ اپنی افواج اور دفاعی ماہرین سے کہتا آیا ہوں کہ ہمیں صرف متحرک ہی نہیں بلکہ پیش قدم بھی رہنا ہوگا، اور ہر طرح کے حالات کے لیے تیار رہنا ہوگا۔

انہوں نے کہا کہ آپریشن سندور مسلح افواج کی تیاری اور موافقت کی صلاحیت کا واضح ثبوت ہے۔ "ہماری افواج اور ہماری صنعتوں نے بدلتے حالات کا گہرا تجزیہ کیا ہے اور ہمیشہ تیار رہتی ہیں۔ اس کی سب سے بڑی مثال آپریشن سندور ہے۔ ایک سال بعد اس آپریشن کو یاد کرتے ہوئے انہوں نے دہشت گردی کے خلاف افواج کے ردعمل کی تعریف کی اور کہا کہ جب بھی آپریشن سندور کا ذکر ہوتا ہے تو مجھے اپنی افواج کی بہادری یاد آتی ہے۔ دہشت گردوں اور ان کے سرپرستوں کو ایسا جواب ملا کہ پورے ملک کا سر فخر سے بلند ہو گیا۔ ہم نے تحمل کا مظاہرہ کرتے ہوئے صرف دہشت گردوں کو ختم کیا، ورنہ دنیا جانتی ہے کہ ہماری افواج کیا صلاحیت رکھتی ہیں۔

انہوں نے جنگ کی بدلتی نوعیت پر بھی روشنی ڈالی اور کہا کہ اب غیر روایتی خطرات تیزی سے بڑھ رہے ہیں۔ پہلے ہمیں دشمن کی صلاحیتوں اور حکمت عملی کا اندازہ ہوتا تھا، لیکن اب مسلسل ایسے نئے اور غیر متوقع عناصر سامنے آ رہے ہیں جن کا پہلے تصور بھی نہیں کیا جا سکتا تھا۔ عام شہری زندگی کی چیزیں بھی اب مہلک ہتھیار بنتی جا رہی ہیں۔

انہوں نے بنیادی ڈھانچے کی ترقی کو قومی سلامتی سے جوڑتے ہوئے گنگا ایکسپریس وے جیسے منصوبوں کا ذکر کیا اور کہا کہ یہ مستقبل میں دفاعی شعبے کے لیے بھی اہم ثابت ہوں گے۔انہوں نے دفاعی نظام کو مضبوط بنانے کے لیے حکومت کے اقدامات جیسے آئی ڈی ای ایکس، آدیتی اور ٹیکنالوجی ڈیولپمنٹ فنڈ کا ذکر کیا اور کہا کہ ان کے ذریعے جدت کو فروغ دیا جا رہا ہے اور نجی شعبے کی شمولیت بڑھائی جا رہی ہے۔

انہوں نے کہا کہ دفاعی راہداری اور برہموس اسمبلنگ سہولت جیسے منصوبے ملک کی صلاحیت کو مزید مضبوط بنا رہے ہیں۔انہوں نے عالمی سطح پر دفاعی صنعت کی بڑھتی پہچان کا بھی ذکر کیا اور کہا کہ اب دنیا بھر میں ہماری صنعتوں پر گفتگو ہو رہی ہے اور انہیں مثبت نظر سے دیکھا جا رہا ہے۔دفاعی تحقیق پر بات کرتے ہوئے انہوں نے کہا کہ دفاعی تحقیق کے بجٹ کا 25 فیصد حصہ صنعت، تعلیمی اداروں اور نئی کمپنیوں کے لیے مختص کیا گیا ہے، جس میں سے تقریباً 4500 کروڑ روپے استعمال بھی کیے جا چکے ہیں۔

انہوں نے کہا کہ دفاعی تحقیق و ترقی تنظیم نے اپنے پیٹنٹس اور تجرباتی سہولیات کو صنعتوں کے لیے کھول دیا ہے، جس سے ان کی تکنیکی صلاحیت اور عالمی مسابقت میں اضافہ ہوگا۔انہوں نے زور دے کر کہا کہ مستقبل کی جنگیں تجربہ گاہوں میں جیتی جائیں گی اور تحقیق کا کوئی متبادل نہیں۔ "آج کی لیبارٹریز میں ہی مستقبل کی جنگوں کا فیصلہ ہو رہا ہے، اور حکومت نے دفاعی تحقیق کو اپنی ترجیحات میں شامل کیا ہے۔

وزیر دفاع نے "رکشا تروینی سنگم — جہاں ٹیکنالوجی، صنعت اور فوجی صلاحیتیں ایک ساتھ ملتی ہیں" کے عنوان سے نارتھ ٹیک سمپوزیم کا افتتاح کیا۔یہ تین روزہ پروگرام فوج کے شمالی اور وسطی کمانڈ اور دفاعی سازوسامان بنانے والی تنظیم کے اشتراک سے منعقد کیا گیا ہے، جس میں 284 کمپنیاں دیسی دفاعی ٹیکنالوجی کی نمائش کر رہی ہیں۔