نئی دہلی مہاراشٹر کے پیاز پیدا کرنے والے کسانوں نے ہفتہ کے روز مرکزی اور ریاستی حکومت سے اپیل کی کہ پی ایم کسان اور نمو شیتکری اسکیموں کا دائرہ وسیع کیا جائے، تاکہ ان اہل کسانوں کو بھی شامل کیا جا سکے جنہوں نے 2019 کی مقررہ آخری تاریخ کے بعد خریداری، وراثت یا خاندانی تقسیم کے ذریعے زرعی زمین حاصل کی ہے۔

مہاراشٹر اسٹیٹ آنین پروڈیوسرز ایسوسی ایشن نے کہا ہے کہ کھیتی کی پوری لاگت برداشت کرنے والے حقیقی کسانوں کو غلط طور پر ان اسکیموں سے باہر رکھا جا رہا ہے۔ تنظیم نے خبردار کیا کہ اگر حکام نے فوری طور پر اہلیت کے قواعد میں تبدیلی نہ کی اور ان کسانوں کو تمام رکی ہوئی مالی امداد جاری نہ کی، تو ریاست بھر میں احتجاجی تحریک چلائی جائے گی۔ ایسوسی ایشن نے ایک بیان میں مطالبہ کیا کہ 2019 کے بعد خریداری، وراثت یا خاندانی تقسیم کے ذریعے زمین حاصل کرنے والے تمام اہل کسانوں کو مرکزی حکومت کی پردھان منتری کسان سمان ندھی (پی ایم کسان) اور ریاستی حکومت کی نمو شیتکری مہاسمان ندھی اسکیموں میں شامل کیا جائے۔

تنظیم نے یہ بھی مطالبہ کیا کہ اہل کسانوں کو تمام بقایا اقساط ادا کی جائیں، اہلیت کا بنیادی معیار "حقیقی کاشتکار" کو بنایا جائے، اور اسکیم سے محروم رہ جانے والے کسانوں کی نشاندہی کے لیے خصوصی رجسٹریشن اور تصدیقی مہم چلائی جائے۔

ایسوسی ایشن نے کہا کہ وہ اپنی تمام مطالبات باضابطہ طور پر مرکزی اور ریاستی حکومتوں سمیت متعلقہ محکموں کو پیش کرے گی، اور اگر اصلاحی اقدامات نہ کیے گئے تو ریاست گیر احتجاج شروع کیا جائے گا۔ ایسوسی ایشن کے بانی صدر بھرت دگھولے نے کہا کہ اہلیت کے قواعد میں تبدیلی ضروری ہے تاکہ ہر حقیقی کسان دونوں اسکیموں سے فائدہ اٹھا سکے، اور تمام اہل کسانوں کو رکی ہوئی اقساط بھی فوری طور پر جاری کی جائیں۔