کنگڑا

 مرکزی وزیر کرن رجیجو نے ہفتہ کے روز آل انڈیا مجلس اتحاد المسلمین کے سربراہ اسدالدین اویسی کی حکومت کی بین الاقوامی سرگرمیوں کو نشانہ بنانے والی تقاریر پر سخت ردِعمل ظاہر کیا۔

رجیجو کا یہ جواب اس وقت سامنے آیا جب حیدرآباد سے رکنِ پارلیمان نے وزیرِ اعظم کے حالیہ سرکاری دورۂ اسرائیل پر سوال اٹھاتے ہوئے الزام لگایا کہ یہ قومی مفاد کے بجائے نظریاتی محرکات پر مبنی تھا۔

اپوزیشن کی بیان بازی پر تبصرہ کرتے ہوئے مرکزی وزیر کیرن رجیجو نے کہا كہ یہ محض سیاست کی جا رہی ہے۔ ہر وقت حکومت پر تنقید کرنا اور وزیرِ اعظم مودی کو گالیاں دینا درست نہیں۔

دوسری جانب، جمعہ کے روز آل انڈیا مجلس اتحاد المسلمین  کے سربراہ اسدالدین اویسی نے وزیرِ اعظم نریندر مودی کے اسرائیل کے سرکاری دورے پر تنقید کرتے ہوئے کہا کہ “وزیرِ اعظم کی اسرائیل سے محبت محض نظریاتی بنیاد پر ہے، قومی مفاد پر نہیں۔یہاں مسجدِ چوک میں منعقدہ جلسۂ یومُ القرآن سے خطاب کرتے ہوئے اویسی نے اسرائیل-فلسطین تنازع پر ہندوستان کے موقف پر سوال اٹھایا اور الزام عائد کیا کہ بھارتیہ جنتا پارٹی (بی جے پی) نے ملک کی روایتی کثیرالجہتی خارجہ پالیسی کو ترک کر دیا ہے۔

اویسی نے کہا كہ میں آپ کو بتا رہا ہوں کہ وزیرِ اعظم کی اسرائیل سے محبت صرف نظریے کی بنیاد پر ہے۔ آپ نے کھلے عام ایک نسل کُش حکومت کی حمایت کی ہے۔ صیہونیت اور آر ایس ایس کا نظریہ ایک ہی ہے، جو نفرت پر مبنی ہے۔ لوگ پوچھتے ہیں کہ فلسطین سے آپ کو کیا سروکار ہے؟ میرے بھائی، یہ مسلمانوں کا تیسرا مقدس ترین مقام بھی ہے اور یہ انصاف کا معاملہ ہے۔

اپنے خطاب میں اویسی نے دعویٰ کیا كہ صیہونیت اور آر ایس ایس کا نظریہ ایک جیسا ہے، اور یہ نفرت پر مبنی ہے،” اور کہا کہ یہی اب ہندوستان کی خارجہ پالیسی کو سمت دے رہا ہے۔

انہوں نے سوال اٹھایا كہ اس میں قومی مفاد کیا ہے؟ آج پورا گلوبل ساؤتھ پریشان ہے۔ سب فکر مند ہیں کہ ہندوستان کے وزیرِ اعظم کیا کر رہے ہیں۔ ہماری کثیرالجہتی پالیسی کہاں گئی؟

اویسی نے میڈیا کے بعض حلقوں کی رپورٹس کا حوالہ دیتے ہوئے الزام لگایا کہ اسرائیلی سفارت کاروں اور سابقہ بھارتیہ جن سنگھ، جو بی جے پی کی پیش رو جماعت تھی، کے رہنماؤں کے درمیان تاریخی روابط رہے ہیں۔ انہوں نے کہا كہ ان لوگوں کا بہت پرانا تعلق ہے، بہت ہی پرانا تعلق۔