گاندربل/ آواز دی وائس

گاندربل میں منگل کے روز وزیرِ اعلیٰ عمر عبداللہ نے اپنی حکومت کے اس فیصلے کا دفاع کیا جس کے تحت ایک مجوزہ بل کو مسترد کر دیا گیا۔ ان کا کہنا تھا کہ یہ بل “زمین مافیا کی مدد کرنے” کے لیے لایا گیا تھا۔ عمر عبداللہ نے صحافیوں سے گفتگو کرتے ہوئے کہا کہ ہم ایسا بل کیسے منظور کر سکتے ہیں جو زمین مافیا کی مدد کے لیے بنایا گیا ہو؟ جو ان لوگوں کو فائدہ پہنچانے کے لیے ہو جنہوں نے غیر قانونی طور پر زمین پر قبضہ کر رکھا ہے، اور جو یہ تک واضح نہیں کرتا کہ آیا وہ واقعی جموں و کشمیر کے رہائشی ہیں یا نہیں؟

وزیرِ اعلیٰ نے الزام لگایا کہ اس بل کو پیش کرنے والوں نے اسے انتخابات سے قبل سیاسی فائدہ حاصل کرنے کے لیے استعمال کرنے کی کوشش کی۔ انہوں نے کہا کہ ایک ایسا بل جو صرف سیاسی فائدے کے لیے لایا گیا ہو، وہ جموں و کشمیر کے عوام کے مفاد میں نہیں ہے۔ میں اپنی حکومت کو عوام کے نقصان کی اجازت نہیں دوں گا۔ یہ مجوزہ بل "جموں و کشمیر (ریگولرائزیشن اینڈ ریکگنیشن آف پراپرٹی رائٹس آف ریزیڈنٹس اِن پبلک لینڈز) بل، 2025" کہلاتا ہے۔ اس کا مقصد ان گھروں کے مالکان کو مالکانہ حقوق یا منتقلی کے حقوق دینا تھا جو سرکاری زمین، کچاریہ زمین، مشترکہ زمین یا شملات زمین پر تعمیر کیے گئے ہیں  اور یہ سب آئینِ ہند کے آرٹیکل 21 کے تحت شہریوں کے “رہائش کے حق” کے تحفظ کے نام پر کیا جا رہا تھا۔

دوسری جانب، پیر کے روز عمر عبداللہ نے پیپلز کانفرنس کے صدر سجاد لون کے اس بیان پر ردِعمل ظاہر کیا جس میں انہوں نے حالیہ راجیہ سبھا انتخابات کو “فکسڈ میچ” یعنی طے شدہ مقابلہ قرار دیا تھا۔ میڈیا سے گفتگو کرتے ہوئے عمر عبداللہ نے کہا کہ سجاد لون کو، جو خود الیکشن میں حصہ لینے سے انکار کر چکے تھے، اس بارے میں بولنے کا کوئی حق نہیں۔ انہوں نے الزام لگایا کہ سجاد لون نے ووٹنگ سے پرہیز کر کے بالواسطہ طور پر بی جے پی کی مدد کی۔ ان کا کہنا تھا کہ ہندوارہ کے عوام نے انہیں خاموش بیٹھنے یا دوہرا کردار ادا کرنے کے لیے منتخب نہیں کیا تھا۔

عمر عبداللہ نے کہا کہ جو شخص ابتدا میں الیکشن میں حصہ لینے کو تیار نہیں تھا، اسے اس پر تبصرہ کرنے کا کوئی حق نہیں۔ پہلے وہ یہ بتائیں کہ آخر انہیں کس چیز نے بی جے پی کی مدد کرنے پر مجبور کیا؟ اگر وہ واقعی ‘فکسڈ میچ’ روکنا چاہتے تھے، تو کم از کم اپنا ووٹ تو ڈالتے۔ ہندوارہ کے لوگوں نے انہیں اس لیے نہیں بھیجا کہ وہ خاموش رہیں۔ انہیں صاف صاف کہنا چاہیے کہ وہ بی جے پی کے ساتھ ہیں یا نہیں۔ میں نے پہلے ہی کہا تھا کہ جو لوگ ووٹنگ سے دور رہتے ہیں، وہ دراصل بی جے پی کی مدد کر رہے ہیں۔

عمر عبداللہ نے سجاد لون کے الزامات کو “بے بنیاد” قرار دیتے ہوئے کہا کہ جموں و کشمیر میں صرف نیشنل کانفرنس ہی وہ جماعت ہے جو بی جے پی کا مقابلہ کر رہی ہے۔ 25 اکتوبر کو سجاد لون نے ایکس پر پوسٹ کرتے ہوئے الزام لگایا تھا کہ نیشنل کانفرنس نے راجیہ سبھا انتخابات کے دوران بی جے پی سے “بات چیت” کی۔

انہوں نے لکھا کہ ڈاکٹر فاروق صاحب نے خود کہا کہ بی جے پی نے انہیں تین راجیہ سبھا نشستوں کے لیے پیشکش کی تھی۔ اس کا مطلب ہے کہ دونوں جماعتوں کے درمیان بات چیت کا کوئی ذریعہ موجود تھا۔ کیا انہوں نے اپنے اتحادیوں کو بتایا کہ وہ بی جے پی سے بات چیت کر رہے ہیں؟ یہی تو ہم شروع سے کہہ رہے ہیں  یہ سب ایک فکسڈ میچ ہے۔