نئی دہلی: نیشنل اسٹاک ایکسچینج آف انڈیا (این ایس ای) نے جون 2026 میں ایک نئی اہم کامیابی حاصل کرتے ہوئے 26 کروڑ منفرد تجارتی کھاتوں (کلائنٹ کوڈز) کا ہندسہ عبور کر لیا ہے، جو ہندوستانی سرمایہ بازار میں عوامی شرکت کے تیزی سے فروغ کی عکاسی کرتا ہے۔
این ایس ای نے جمعہ کو جاری ایک پریس ریلیز میں کہا کہ حالیہ ایک کروڑ نئے کھاتے چار ماہ سے بھی کم عرصے میں شامل ہوئے، جبکہ گزشتہ ایک سال کے دوران 4.3 کروڑ سے زائد کھاتے کھولے گئے، جو مجموعی کھاتوں کا تقریباً 17 فیصد بنتے ہیں۔ 31 مئی 2026 تک این ایس ای کے پاس 13.1 کروڑ سے زائد منفرد رجسٹرڈ سرمایہ کار موجود تھے۔
اپریل 2026 میں یہ تعداد 13 کروڑ کا ہندسہ عبور کر چکی تھی۔ تجارتی کھاتوں کی تعداد منفرد سرمایہ کاروں سے زیادہ ہوتی ہے کیونکہ ایک سرمایہ کار مختلف بروکروں کے ساتھ متعدد کھاتے رکھ سکتا ہے۔ سرمایہ کاروں کی تعداد میں اضافہ اب صرف روایتی مالیاتی مراکز تک محدود نہیں رہا۔ مہاراشٹر 4.4 کروڑ کھاتوں کے ساتھ سرفہرست ہے، جو کل کا 17 فیصد ہے۔
اس کے بعد اتر پردیش میں 3 کروڑ، گجرات میں 2.2 کروڑ جبکہ مغربی بنگال اور راجستھان میں 1.5، 1.5 کروڑ کھاتے ہیں۔ سرفہرست پانچ ریاستوں میں مجموعی کھاتوں کا تقریباً 49 فیصد موجود ہے، تاہم شمال مشرقی ریاستوں میں سب سے تیز رفتار اضافہ دیکھا گیا۔ میزورم، سکم اور میگھالیہ میں 2021 سے 2025 کے درمیان شامل ہونے والے کھاتوں میں سے بالترتیب 32.3 فیصد، 30 فیصد اور 29.2 فیصد صرف 2025 میں شامل ہوئے۔
این ایس ای کے مطابق اس اضافے کی ایک بڑی وجہ تیز رفتار ڈیجیٹلائزیشن ہے۔ موبائل ٹریڈنگ پلیٹ فارمز اب نقد بازار کے کاروبار کا پانچواں حصہ سے زیادہ سنبھال رہے ہیں، جبکہ کے وائی سی (اپنے صارف کو جانیے) کے عمل کو بھی آسان بنایا گیا ہے۔ بازار کی کارکردگی نے بھی سرمایہ کاروں کے اعتماد کو تقویت دی ہے۔ 4 جون 2026 کو ختم ہونے والے پانچ برسوں کے دوران نفٹی 50 اور نفٹی 500 کے سالانہ اوسط منافع کی شرح بالترتیب 7.1 فیصد اور 9.8 فیصد رہی۔
این ایس ای میں درج کمپنیوں کی مجموعی مارکیٹ مالیت گزشتہ پانچ برسوں میں 12.6 فیصد سالانہ مرکب شرح نمو (CAGR) کے ساتھ بڑھ کر 462.2 لاکھ کروڑ روپے تک پہنچ گئی، جس سے گھریلو دولت میں نمایاں اضافہ ہوا۔ 31 مارچ 2026 تک انفرادی سرمایہ کار، براہِ راست اور میوچل فنڈز کے ذریعے، مارکیٹ کے 18.7 فیصد حصے کے مالک تھے۔ منظم سرمایہ کاری کے منصوبوں (ایس آئی پیز) کے ذریعے سرمایہ کاری کا رجحان بھی مضبوط ہو رہا ہے۔
اپریل 2025 سے مارچ 2026 کے درمیان 7.2 کروڑ نئے ایس آئی پی کھاتے کھولے گئے۔ گزشتہ ایک دہائی میں ایس آئی پی کے ذریعے ماہانہ اوسط سرمایہ کاری 3,660 کروڑ روپے (مالی سال 2017) سے بڑھ کر 29,132 کروڑ روپے (مالی سال 2026) تک پہنچ گئی، یعنی تقریباً آٹھ گنا اضافہ ہوا۔
این ایس ای کے چیف بزنس ڈیولپمنٹ آفیسر شری رام کرشنن نے کہا کہ 26 کروڑ کھاتوں کا ہندسہ ہندوستانی سرمایہ بازار میں سرمایہ کاروں کی بڑھتی ہوئی شرکت کی عکاسی کرتا ہے۔ انہوں نے کہا کہ "عالمی جغرافیائی و سیاسی غیر یقینی صورتحال کے باوجود چار ماہ سے بھی کم عرصے میں ایک کروڑ نئے کھاتوں کا اضافہ سرمایہ کاروں کے مسلسل اعتماد کو ظاہر کرتا ہے۔"
انہوں نے مزید کہا کہ سرمایہ کاری میں شرکت اب درجہ دوم، سوم اور چہارم کے شہروں تک پھیل رہی ہے اور سرمایہ کار حصص، ای ٹی ایفز، ریئل اسٹیٹ انویسٹمنٹ ٹرسٹس (ریٹس)، انفراسٹرکچر انویسٹمنٹ ٹرسٹس (انوٹس)، سرکاری و کارپوریٹ بانڈز سمیت مختلف مالیاتی ذرائع میں سرمایہ کاری کر رہے ہیں۔ حال ہی میں متعارف کرائی گئی الیکٹرانک گولڈ رسیدوں نے بھی سرمایہ کاری کے مواقع کو مزید وسعت دی ہے۔
