شملہ: بیوروکریسی کے اخراجات کم کرنے کی کوشش کے تحت ہماچل پردیش حکومت ریاست میں انڈین ایڈمنسٹریٹو سروس (آئی اے ایس)، انڈین فارسٹ سروس (آئی ایف ایس) اور انڈین پولیس سروس (آئی پی ایس) کے افسران کی تعداد کم کرنے کی منصوبہ بندی کر رہی ہے۔ حکومت آئی اے ایس افسران کی تعداد 153 سے کم کرکے 130 کرنے کی تجویز پر کام کر رہی ہے، یعنی 23 افسران کی کمی کی جائے گی۔

اسی طرح آئی ایف ایس افسران کی تعداد 118 سے گھٹا کر 83 کرنے کی تجویز ہے، جس کے نتیجے میں 35 افسران کم ہوں گے۔ حکام نے منگل کو بتایا کہ آئی پی ایس افسران کی تعداد میں کتنی کمی کی جائے گی، اس کا حتمی فیصلہ ابھی نہیں ہوا ہے۔

وزیر اعلیٰ سکھویندر سنگھ سکھو نے کہا، ’’درحقیقت آئی اے ایس افسران کی مطلوبہ تعداد 100 سے 110 کے درمیان ہونی چاہیے، لیکن ہم صرف 23 افسران کی کمی کا مطالبہ کر رہے ہیں، کیونکہ ہمیں افسران کی فوج نہیں چاہیے بلکہ ایسے افسران کی ضرورت ہے جو حکومت کی پالیسیوں اور اسکیموں کو مؤثر طریقے سے نافذ کر سکیں۔‘‘

انہوں نے مزید کہا کہ حکومت آل انڈیا سروسز کے افسران کو مرکزی ڈیپوٹیشن پر جانے کی اجازت دینے کا سلسلہ جاری رکھے گی اور انہیں ریاست سے باہر جانے کے لیے فوری منظوری دی جائے گی۔ حکام کے مطابق آل انڈیا سروسز کے افسران کی تعداد کم کرنے کی باضابطہ تجویز جلد ہی مرکزی حکومت کو بھیجی جائے گی۔ فی الحال 20 سے زائد آئی اے ایس افسران اور ایک درجن سے زیادہ آئی پی ایس اور آئی ایف ایس افسران ڈیپوٹیشن پر ہیں۔

ان میں سے کچھ ریاست کے اندر ہی کیڈر سے ہٹ کر دیگر عہدوں پر تعینات ہیں۔ ریاستی حکومت مرکزی حکومت سے یہ درخواست بھی کرنے والی ہے کہ ہماچل پردیش میں مزید مرکزی سروس کے افسران مختص نہ کیے جائیں۔ اندازہ ہے کہ ہر افسر پر تنخواہ، مہنگائی الاؤنس، ماتحت عملے اور دیگر مراعات سمیت سالانہ 40 سے 50 لاکھ روپے تک خرچ آتا ہے۔