سری نگر/ آواز دی وائس

پیپلز ڈیموکریٹک پارٹی (پی ڈی پی) کی سربراہ محبوبہ مفتی نے جمعرات کو عمر عبداللہ کی قیادت والی نیشنل کانفرنس (این سی) حکومت پر سخت حملہ کیا۔ محبوبہ مفتی نے حکومت کی کارکردگی پر سوال اٹھاتے ہوئے سابق دہلی کے وزیر اعلیٰ اروند کیجریوال کے طرزِ حکمرانی سے اس کا موازنہ کیا۔

محبوبہ مفتی نے کہا کہ اگرچہ دہلی بھی جموں و کشمیر کی طرح ایک مرکز کے زیرِ انتظام علاقہ (یونین ٹیریٹری) ہے، لیکن کیجریوال کی قیادت میں وہاں کی حکومت نے شاندار کام کیا۔ انہوں نے الزام لگایا کہ ’’دہلی کے لیفٹیننٹ گورنر نے اروند کیجریوال کے سر پر بندوق تان رکھی تھی، پھر بھی وہ اتنا اچھا کام کرنے میں کامیاب رہے۔‘‘ محبوبہ مفتی نے سوال اٹھایا کہ عمر عبداللہ کی زیر قیادت موجودہ حکومت ایسے اقدامات کیوں نہیں کر پا رہی۔

انہوں نے کہا کہ اروند کیجریوال بھی ایک یونین ٹیریٹری کے وزیر اعلیٰ تھے۔ انہوں نے مفت بجلی، مفت پانی، بہتر اسکول اور صحت کی سہولیات فراہم کیں، غیر قانونی کالونیوں کو قانونی درجہ دیا۔ دہلی کے ایل جی نے ان پر دباؤ ڈالا، لیکن انہوں نے کام روکنے نہیں دیا۔ اگر دہلی میں یہ ممکن ہے تو جموں و کشمیر میں کیوں نہیں؟ عمر عبداللہ مفت گیس، بجلی، پانی، بیواؤں کے لیے امداد میں اضافہ اور روزگار کے مواقع کیوں نہیں دے رہے؟ ریاستی درجہ نہ ہونا کام نہ کرنے کا بہانہ ہے۔

محبوبہ مفتی نے انکشاف کیا کہ سابق وزیر اعلیٰ ڈاکٹر فاروق عبداللہ نے ان سے حکومت کو حمایت دینے کی درخواست کی تھی۔ انہوں نے بتایا کہ فاروق عبداللہ نے مجھے فون کر کے کہا کہ حکومت کو حمایت کی ضرورت ہے۔ میں نے کہا کہ ہم کچھ بل چاہتے ہیں جنہیں اسمبلی میں پاس کیا جائے۔ گزشتہ اتوار کو محبوبہ مفتی نے بھارتیہ جنتا پارٹی (بی جے پی) پر سخت تنقید کی تھی، الزام لگایا تھا کہ بی جے پی ہندوستان میں مسلمانوں کو نشانہ بنا رہی ہے جبکہ افغانستان میں طالبان کے ساتھ تعلقات مضبوط کر رہی ہے۔  انہوں نے کہا کہ بی جے پی "لوجہاد"، "زمین جہاد"، "ووٹ جہاد" اور "گائے جہاد" جیسے نعرے لگا کر اپنے ہی ملک کے مسلمانوں کو بدنام اور تقسیم کر رہی ہے۔