گوہاٹی
وزیر اعظم نریندر مودی نے ہفتہ کے روز کانگریس پر الزام لگایا کہ اس نے اپنے دورِ حکومت میں شمال مشرقی خطے کو ’’نظر انداز‘‘ کیا، اور کہا کہ بی جے پی کی قیادت والی این ڈی اے حکومت اس خطے کو ’’اشٹ لکشمی‘‘ کے طور پر دیکھتی ہے۔ یہاں ایک ریلی سے خطاب کرتے ہوئے وزیر اعظم نے کہا کہ ان کی حکومت آسام میں بنیادی ڈھانچے کو مضبوط بنانے پر خاص توجہ دے رہی ہے۔
وزیر اعظم نے کہا کہ پارلیمنٹ میں مرکزی بجٹ پیش ہونے کے بعد آسام کا یہ ان کا پہلا دورہ ہے۔انہوں نے کہا كہ چند دن پہلے مرکزی بجٹ پیش کیا گیا۔ بجٹ کے بعد شمال مشرقی خطے کا یہ میرا پہلا دورہ ہے۔ جس شمال مشرق کو کانگریس نے نظر انداز کیا، وہ ہماری ترجیح ہے اور ہم اس کی ترقی کے لیے پوری طرح وقف ہیں۔ ہمارے لیے شمال مشرق ہماری اشٹ لکشمی ہے۔ ہم نے شمال مشرق کو معاشی طور پر خود مختار بنانے کے لیے اس پر خاص توجہ دی ہے۔
انہوں نے الزام لگایا كہ کانگریس تو ہندوستان کو ایک قوم ماننے سے بھی انکار کرتی ہے۔ جو لوگ ماں ہندوستان کے لیے ذرا سی بھی عزت نہیں رکھتے، وہ کبھی ملک کی فلاح کے لیے کام نہیں کر سکتے۔وزیر اعظم نے کہا کہ پہلے جب شمال مشرق کا ذکر ہوتا تھا تو لوگوں کو کمزور بنیادی ڈھانچہ یاد آتا تھا۔
انہوں نے کہا كہ اور آج یہاں ایسے شاہراہیں بن رہی ہیں جہاں نہ صرف گاڑیاں چلتی ہیں بلکہ ہوائی جہاز بھی اتر سکتے ہیں۔ یہ فخر کا لمحہ ہے۔ یہ آسام کی بدلتی ہوئی روح ہے۔ وزیر اعظم نے کہا کہ ان کی زندگی کا سب سے بڑا اعزاز بی جے پی کا کارکن ہونا ہے۔
انہوں نے کہا كہ آج بی جے پی نے جو بھی مقام حاصل کیا ہے، اس کا سہرا ہمارے پارٹی کارکنوں کو جاتا ہے۔ ہمارا بھروسہ تنظیم پر ہے۔ اسی لیے اتنی بڑی تعداد میں کارکنوں کو اعزاز دینا ہمارے لیے باعثِ فخر ہے۔ ہم ایک ہی منتر سے جڑے ہیں اور وہ منتر ہے: ہندوستان ماتا کی جے۔
انہوں نے مزید کہا كہ مجھے فخر ہے کہ میری زندگی کا سب سے بڑا اعزاز یہ ہے کہ نریندر مودی بی جے پی کا ایک کارکن ہے۔ ایک کارکن کی حیثیت سے میں آسام میں ہمارے کارکنوں اور تنظیم کی طاقت کے آگے سر جھکاتا ہوں۔ میں ماں آدی شکتی اور ماں کاماکھیا کو بھی بار بار سلام پیش کرتا ہوں۔ وزیر اعظم مودی نے پلوامہ دہشت گردانہ حملے میں جان گنوانے والے سکیورٹی اہلکاروں کو بھی خراجِ عقیدت پیش کیا۔
انہوں نے کہا كہ آج پلوامہ حملے کی برسی ہے۔ میں ماں ہندوستان کے ان بہادر بیٹوں کو سلام پیش کرتا ہوں جنہوں نے اس حملے میں اپنی جان قربان کی۔ اس دہشت گرد حملے کے بعد جس طرح ہندوستان نے دہشت گردوں کو سزا دی، اسے پوری دنیا نے دیکھا۔ کچھ لوگ آج بھی کانپ رہے ہیں۔ آپ نے آپریشن سندور میں ہندوستان کی طاقت دیکھی ہے۔
واضح رہے کہ آسام میں رواں سال کے پہلے نصف میں اسمبلی انتخابات ہونے ہیں۔
.gif)
