نوئیڈا

نوئیڈا کے سیکٹر 75 میں واقع ایک بلند و بالا رہائشی سوسائٹی کی 12ویں منزل پر موجود فلیٹ میں جمعہ کی صبح آگ لگ گئی، جس کے بعد اندر پھنسے ایک خاندان کو بحفاظت نکال لیا گیا اور پوری عمارت کو خالی کرا لیا گیا۔گوتم بدھ نگر کے چیف فائر آفیسر پردیپ کمار کے مطابق ابتدائی تحقیقات سے معلوم ہوتا ہے کہ آگ ایئر کنڈیشنر میں شارٹ سرکٹ کے باعث لگی۔

لکھنؤ سے جاری ایک سرکاری بیان کے مطابق وزیر اعلیٰ یوگی آدتیہ ناتھ نے واقعے کا نوٹس لیتے ہوئے حکام کو فوری طور پر موقع پر پہنچنے، راحت اور بچاؤ کارروائیوں میں تیزی لانے اور ضرورت پڑنے پر مناسب طبی امداد فراہم کرنے کی ہدایت دی۔

وزیر اعلیٰ نے انتظامیہ کو ہر سطح پر چوکس رہنے اور امدادی کارروائیوں کی مسلسل نگرانی کرنے کا بھی حکم دیا۔یہ واقعہ صبح تقریباً سات بجے سیکٹر 75 کی آئیوی کاؤنٹی سوسائٹی میں پیش آیا، جہاں 28 منزلہ عمارت کی 12ویں منزل پر واقع ایک فلیٹ سے اچانک آگ کے شعلے بھڑک اٹھے۔

گھنا سیاہ دھواں اور آگ کے شعلے دور دور تک دیکھے جا سکتے تھے۔

چیف فائر آفیسر نے بتایا کہ اطلاع ملتے ہی مقامی پولیس اور فائر بریگیڈ کی ٹیمیں فوری طور پر موقع پر پہنچ گئیں اور آگ بجھانے کا کام شروع کر دیا گیا۔انہوں نے کہا کہ فائر ٹینڈرز کے ساتھ ایک ہائیڈرولک پلیٹ فارم بھی موقع پر تعینات کیا گیا۔پردیپ کمار کے مطابق عمارت میں پہلے سے موجود فائر فائٹنگ آلات کی وجہ سے فائر بریگیڈ کی گاڑیوں اور آلات کو محدود طور پر استعمال کرنا پڑا۔ خصوصی حفاظتی لباس اور سانس لینے کے آلات سے لیس فائر فائٹرز نے بہادری کے ساتھ آگ سے متاثرہ دو فلیٹوں میں داخل ہو کر کارروائی کی۔

انہوں نے بتایا کہ آگ ممکنہ طور پر ایئر کنڈیشنر میں خرابی یا فلیٹ کے پوجا کمرے سے شروع ہوئی تھی۔ فائر بریگیڈ کے اہلکار فلیٹ نمبر 1203 اور 1204 میں داخل ہوئے اور آگ پر مکمل قابو پا لیا۔انہوں نے مزید کہا کہ فائر سروس کی ٹیم نے فلیٹ میں پھنسے میاں، بیوی اور ان کے بچوں کو بحفاظت باہر نکال لیا۔ چھ فائر ٹینڈرز کی مدد سے آگ کو مکمل طور پر بجھا دیا گیا۔

چیف فائر آفیسر نے تصدیق کی کہ اس واقعے میں کوئی جانی نقصان نہیں ہوا۔اطلاع ملتے ہی پولیس اور فائر بریگیڈ کی ٹیمیں موقع پر پہنچ گئیں۔ رہائشیوں کو سیڑھیوں کے ذریعے عمارت سے باہر نکالا گیا جبکہ احتیاطی تدابیر کے طور پر پڑوسی فلیٹوں کے مکینوں کو بھی محفوظ مقامات پر منتقل کر دیا گیا۔

اسی دوران جب آئیوی کاؤنٹی میں امدادی کارروائیاں جاری تھیں، فائر بریگیڈ کو سیکٹر 52 کے شتابدی وہار کے قریب واقع ایک تجارتی عمارت میں آگ لگنے کی اطلاع بھی موصول ہوئی۔

پردیپ کمار نے بتایا کہ سیکٹر 52 کے اس کمرشل کمپلیکس میں آگ گراؤنڈ فلور پر موجود ایک ریسٹورنٹ کے فریزر میں شارٹ سرکٹ کے باعث لگی۔ عمارت کی بالائی منزلوں پر پی جی رہائش گاہ بھی قائم ہے۔انہوں نے کہا کہ فائر سروس کے اہلکاروں نے عمارت میں موجود 15 افراد کو بحفاظت باہر نکالا اور آگ پر مکمل قابو پا لیا۔

انہوں نے مزید بتایا کہ اس واقعے میں بھی کسی قسم کا جانی نقصان نہیں ہوا۔