نئی دہلی: انڈین آئل کارپوریشن (IOC) نے ملک میں پیٹرول اور ڈیزل کی مجموعی قلت کی خبروں کو مسترد کرتے ہوئے کہا ہے کہ کچھ علاقوں میں ایندھن کی کمی کی اطلاعات صرف مقامی اور عارضی نوعیت کی ہیں۔ کمپنی کے مطابق یہ صورتحال مختلف علاقوں میں طلب اور رسد کے عدم توازن، فروخت کے انداز میں تبدیلی اور موسمی عوامل کی وجہ سے پیدا ہوئی ہے۔

انڈین آئل نے وضاحت کی کہ فصلوں کی کٹائی کے موسم میں ڈیزل کی طلب میں اضافہ ہوتا ہے، جبکہ کچھ صارفین مہنگے نجی پمپس کے بجائے سرکاری پمپس کی طرف منتقل ہو رہے ہیں، جس سے بعض مقامات پر دباؤ بڑھ گیا ہے۔ اس کے علاوہ عالمی قیمتوں میں اتار چڑھاؤ کے باعث تھوک خریداری میں بھی اضافہ دیکھا گیا ہے۔

کمپنی نے بتایا کہ یکم سے 22 مئی کے دوران پیٹرول کی فروخت میں سالانہ بنیاد پر 14 فیصد جبکہ ڈیزل کی فروخت میں تقریباً 18 فیصد اضافہ ہوا ہے، جو بڑھتی ہوئی طلب کو ظاہر کرتا ہے۔ انڈین آئل نے اپنے بیان میں کہا: “ملک میں پیٹرول اور ڈیزل کی کوئی مجموعی قلت نہیں ہے۔ چند ریٹیل مراکز پر جو صورتحال دیکھی جا رہی ہے وہ انتہائی مقامی اور عارضی ہے۔

” کمپنی کے مطابق اس کے 42,000 سے زائد پمپس کے نیٹ ورک میں صرف چند مقامات پر سپلائی متاثر ہوئی ہے، جبکہ زیادہ تر جگہوں پر ایندھن کی فراہمی معمول کے مطابق جاری ہے۔ سرکاری تیل کمپنیوں نے یہ بھی کہا ہے کہ ملک بھر میں وافر ذخائر موجود ہیں اور مختلف علاقوں میں پیدا ہونے والی محدود رکاوٹوں کو دور کرنے کے لیے اقدامات کیے جا رہے ہیں۔ انڈین آئل نے عوام سے اپیل کی ہے کہ افواہوں پر مبنی گھبراہٹ میں خریداری سے گریز کریں تاکہ سپلائی کا نظام معمول کے مطابق چلتا رہے۔