پٹنہ

مرکزی وزیر داخلہ امت شاہ نے بہار کے وزیر اعلیٰ اور جنتا دل (یونائیٹڈ) کے سربراہ نتیش کمار کے بطور وزیر اعلیٰ دور کو ریاست کی تاریخ کا ’’سنہری باب‘‘ قرار دیتے ہوئے راجیہ سبھا انتخابات کے لیے ان کے نامزدگی داخل کرنے پر قومی سیاست میں واپسی کا خیر مقدم کیا ہے۔

امت شاہ نے بہار کے وزیر اعلیٰ کے طور پر نتیش کمار کے ’’شاندار‘‘ دور حکومت کا ذکر کرتے ہوئے کہا کہ اس عرصے میں انہوں نے بہار کی ترقی میں نمایاں کردار ادا کیا۔انہوں نے کہا، ’’بہار کے وزیر اعلیٰ نے آج راجیہ سبھا کے لیے اپنا نامزدگی داخل کیا ہے۔ اس کے ساتھ ہی ایک طویل وقفے کے بعد وہ دوبارہ قومی سیاست میں راجیہ سبھا کے رکن کی حیثیت سے داخل ہوں گے۔ نتیش کمار نے 2005 سے اب تک بہار کے وزیر اعلیٰ کے طور پر خدمات انجام دیں۔ ان کا دور واقعی شاندار رہا ہے۔ یہ دور بہار کی تاریخ میں سنہری باب کے طور پر لکھا جائے گا اور ریاست کی مجموعی ترقی کو نئی سمت دے گا۔‘

امت شاہ نے مزید کہا كہ اپنے طویل سیاسی کیریئر میں رکن اسمبلی، رکن پارلیمنٹ، وزیر اعلیٰ اور مرکزی وزیر کے طور پر خدمات انجام دیتے ہوئے ان کے کرتا پر کبھی کوئی داغ نہیں لگا۔ ان کی پوری زندگی بدعنوانی کے الزامات سے پاک رہی ہے۔انہوں نے کہا کہ وزیر اعظم نریندر مودی کی قیادت میں گزشتہ 11 برسوں کے دوران نتیش کمار نے ہر طرح سے بہار کی ترقی میں اہم کردار ادا کیا اور انہی کی قیادت میں وزیر اعظم مودی کی تمام اسکیمیں بہار کے عوام تک پہنچیں۔

امت شاہ نے کہا كہ وہ ایک بار پھر راجیہ سبھا کے رکن کے طور پر دہلی واپس آ رہے ہیں۔ میں اور قومی جمہوری اتحاد (این ڈی اے) کے تمام ساتھی ان کا دل سے خیر مقدم کرتے ہیں۔ وزیر اعلیٰ کے طور پر ان کا دور ہمیشہ بہار کے عوام کے دلوں میں یاد رکھا جائے گا اور اس کا احترام کیا جائے گا۔یہ بیان ایسے وقت میں سامنے آیا ہے جب بہار کی سیاست میں بڑی تبدیلی دیکھنے کو ملی ہے اور موجودہ وزیر اعلیٰ نتیش کمار نے پٹنہ میں راجیہ سبھا کے لیے اپنا نامزدگی داخل کیا ہے۔

نتیش کمار کے علاوہ این ڈی اے کے دیگر امیدواروں نے بھی ایوانِ بالا کے لیے اپنے کاغذاتِ نامزدگی داخل کیے۔ ان میں بھارتیہ جنتا پارٹی کے صدر نتین نوین، راشٹریہ لوک مورچہ کے سربراہ اوپیندر کشواہا، بی جے پی کے شیوش کمار اور جنتا دل (یونائیٹڈ) کے رام ناتھ ٹھاکر شامل ہیں۔

بہار کے سب سے طویل عرصے تک وزیر اعلیٰ رہنے والے نتیش کمار نے اس سے قبل اعلان کیا تھا کہ وہ راجیہ سبھا جائیں گے اور موجودہ انتخابی مرحلے میں اپنا نامزدگی داخل کریں گے۔انہوں نے سوشل میڈیا پلیٹ فارم ایکس پر لکھا، ’’میں اس بار ہونے والے انتخابات میں راجیہ سبھا کا رکن بننا چاہتا ہوں۔ میں آپ کو پوری ایمانداری کے ساتھ یقین دلانا چاہتا ہوں کہ مستقبل میں بھی آپ کے ساتھ میرا تعلق برقرار رہے گا اور ایک ترقی یافتہ بہار کی تعمیر کے لیے آپ کے ساتھ مل کر کام کرنے کا میرا عزم بدستور قائم رہے گا۔ جو نئی حکومت بنے گی اسے میرا مکمل تعاون اور رہنمائی حاصل رہے گی۔

نتیش کمار کے اس اعلان پر اپوزیشن کی جانب سے بھی ردعمل سامنے آیا، جس میں کہا گیا کہ بی جے پی شروع سے ہی انہیں وزیر اعلیٰ کے عہدے سے ہٹانا چاہتی تھی۔اپوزیشن لیڈر تیجسوی یادو نے سخت تنقید کرتے ہوئے کہا کہ ان کا ’’ہائی جیک‘‘ والا الزام درست ثابت ہوا ہے۔

انہوں نے کہا كہ سب جانتے ہیں کہ بہار کے انتخابات میں این ڈی اے نے نعرہ دیا تھا ‘2025 سے 2030 پھر سے نتیش’۔ بی جے پی اور این ڈی اے کی جماعتیں جانتی ہیں کہ انتخابات کیسے مختلف ہتھکنڈوں اور پورے نظام کے استعمال سے کرائے گئے۔ اسی وقت ہم نے کہا تھا کہ بی جے پی والوں نے نتیش کمار کو ‘ہائی جیک’ کر لیا ہے اور انہیں دوبارہ کرسی پر نہیں بیٹھنے دیں گے۔ ہم نے یہ بھی کہا تھا کہ وہ چھ ماہ سے زیادہ اس کرسی پر نہیں رہیں گے۔

یہ تمام پیش رفت اس وقت سامنے آئی ہے جب نتیش کمار نے 2025 میں پانچویں بار انتخاب جیتا تھا اور این ڈی اے نے ریاست میں دو تہائی اکثریت حاصل کی تھی۔ اس کے بعد انہوں نے دسویں مرتبہ وزیر اعلیٰ کے طور پر حلف لیا تھا اور وہ بہار کے سب سے طویل عرصے تک خدمات انجام دینے والے وزیر اعلیٰ ہیں۔