نئی دہلی: راؤز ایونیو کورٹ نے جمعرات کو نیپون ڈینرو اسپات لمیٹڈ کوئلہ بلاک معاملے میں مرکزی تفتیشی بیورو (سی بی آئی) کی جانب سے داخل کی گئی کلوزر رپورٹ منظور کرلی۔ سابق رکن پارلیمنٹ سندیپ دکشت اور رکن پارلیمنٹ منیکم ٹیگور نے کلوزر رپورٹ کو چیلنج کرتے ہوئے احتجاجی عرضیاں دائر کی تھیں، جنہیں عدالت نے مسترد کر دیا۔ کوئلہ بلاک معاملات کی سماعت کرنے والے خصوصی سی بی آئی جج ویریندر کمار کھرتا نے حکم سناتے ہوئے کہا، ’’کلوزر رپورٹ منظور کی جاتی ہے۔‘‘ عدالت فیصلے کی تفصیلی نقل بعد میں جاری کرے گی۔

سی بی آئی کی جانب سے ایڈیشنل لیگل ایڈوائزر سنجے کمار پیش ہوئے، جبکہ درخواست گزاروں کے وکلا بھی عدالت میں موجود تھے اور ویڈیو کانفرنسنگ کے ذریعے بھی سماعت میں شامل ہوئے۔ راؤز ایونیو کورٹ نے یکم ستمبر کو کانگریس رہنماؤں سندیپ دکشت اور منیکم ٹیگور کی جانب سے دائر احتجاجی عرضیوں پر اپنا فیصلہ محفوظ کر لیا تھا۔ 5 جون کو شکایت کنندگان کے دونوں وکلا نے عدالت کو بتایا تھا کہ ان کی احتجاجی عرضیوں اور ضابطۂ فوجداری (سی آر پی سی) کی دفعہ 156(3) کے تحت دائر درخواست میں ان کی گزارش صرف چارج شیٹ میں موجود مواد کی بنیاد پر ملزمان کو طلب کرنے تک محدود ہے اور وہ کسی دوسری راحت کا مطالبہ نہیں کر رہے ہیں

۔ 10 جولائی 2024 کو راؤز ایونیو کورٹ نے مرکزی وزیر مملکت رونیت سنگھ، منیکم ٹیگور، سندیپ دکشت، ہریش چودھری، لال سنگھ، رگھوویر سنگھ مینا اور ایجاراج سنگھ سمیت سات سیاسی رہنماؤں کو سی بی آئی کی جانب سے داخل کلوزر رپورٹ پر نوٹس جاری کیا تھا۔ 5 ستمبر 2012 کو سات ارکان پارلیمنٹ نے شکایت درج کرائی تھی، جس میں 1993 سے 2004 کے درمیان کوئلہ بلاکس کی الاٹمنٹ میں بے ضابطگیوں کا الزام لگایا گیا تھا۔

عدالت کے 10 جولائی کے حکم کے مطابق، مرکزی تفتیشی بیورو نے حال ہی میں کلوزر رپورٹ داخل کی تھی اور کہا تھا کہ تفتیش کے دوران کسی سرکاری ملازم یا نجی ادارے، بشمول ایف آئی آر میں نامزد کمپنی نیپون ڈینرو اسپات لمیٹڈ، کے خلاف مجرمانہ سازش، دھوکہ دہی یا سرکاری عہدے کے غلط استعمال کا کوئی جرم ثابت نہیں ہوا۔ یہ کمپنی اب تحلیل ہو چکی ہے اور جے ایس ڈبلیو اسٹیل لمیٹڈ میں ضم ہو چکی ہے۔ 14 ستمبر 2012 کو اس وقت کے رکن پارلیمنٹ سندیپ دکشت نے بھی ایک الگ شکایت دی تھی۔

اس میں انہوں نے ان کوئلہ بلاکس کی فہرست پیش کی تھی جن کی الاٹمنٹ کے طریقہ کار اور عمل کی گہرائی سے تفتیش کی ضرورت بتائی گئی تھی۔ انہوں نے اپنے 14 ستمبر کے خط کے ساتھ 24 کوئلہ بلاکس کی فہرست دی تھی۔ عدالت نے نوٹ کیا کہ کھلونی کوئلہ بلاک، جو اس معاملے کی تفتیش کا موضوع تھا، سندیپ دکشت کی فہرست میں شامل نہیں تھا۔ تاہم، دکشت نے 14 ستمبر 2012 کے خط میں یہ بات دہرائی تھی کہ 1993 میں نئی پالیسی شروع ہونے کے وقت سے ہی کوئلہ بلاکس کی الاٹمنٹ کے پورے عمل کی مکمل تفتیش ہونی چاہیے۔

عدالت نے یہ بھی نوٹ کیا کہ 5 ستمبر 2012 کی شکایت سات ارکان پارلیمنٹ نے مشترکہ طور پر کی تھی، جبکہ 14 ستمبر 2012 کے خط پر صرف سندیپ دکشت کے دستخط تھے۔ خط میں انہوں نے کہا تھا کہ دیگر ارکان پارلیمنٹ دہلی میں موجود نہیں ہیں، اس لیے وہ ان کی جانب سے خط اور فہرست بھیج رہے ہیں۔

مرکزی ویجیلنس کمیشن (سی وی سی) کے ڈائریکٹر کی جانب سے معاملہ بھیجے جانے کے بعد اس کی تفصیلی جانچ کے لیے ابتدائی انکوائری شروع کی گئی تھی۔ اس کے بعد سی بی آئی نے باقاعدہ مقدمہ درج کیا تھا۔ اس سے قبل سی بی آئی نے عدالت میں کہا تھا کہ ان ارکان پارلیمنٹ نے ایک عمومی شکایت درج کرائی تھی اور ان کا اعتراض مذکورہ کمپنی کے خلاف تھا۔ تاہم، عدالت نے ان سیاسی رہنماؤں کو معاملے میں شکایت کنندگان کے طور پر نوٹس جاری کیا تھا۔ خصوصی جج نے 10 جولائی 2024 کے حکم میں کہا تھا، ’’عدالت کی رائے میں کلوزر رپورٹ پر غور کرنے سے پہلے مذکورہ ساتوں شکایت کنندگان کو معاملے میں نوٹس جاری کرنا ضروری ہے۔‘‘