نئی دہلی
ہندوستانی قومی شاہراہ اتھارٹی (این ایچ اے آئی) نے سڑکوں کی حفاظت کو بہتر بنانے کے مقصد سے قومی شاہراہوں پر تجاوزات اور غیر قانونی پارکنگ کے خلاف کارروائی تیز کر دی ہے۔
این ایچ اے آئی نے بدھ کے روز جاری اپنے بیان میں کہا کہ قومی شاہراہوں کے کنارے غیر قانونی پارکنگ، سڑک کنارے تجاوزات اور بے قابو سرگرمیاں سڑک استعمال کرنے والوں کے لیے سنگین خطرات پیدا کرتی ہیں اور ٹریفک کے بہاؤ اور حفاظتی نظام کو متاثر کرتی ہیں۔
ان مسائل کے حل کے لیے این ایچ اے آئی نے مختلف ریاستوں میں قومی شاہراہوں پر غیر قانونی پارکنگ کے 595 حساس مقامات کی نشاندہی کی ہے۔
اتھارٹی ریاستی حکومتوں، ضلعی انتظامیہ اور قانون نافذ کرنے والے اداروں کے ساتھ مل کر ان غیر قانونی پارکنگ مقامات کو ہٹانے کے لیے کام کر رہی ہے۔اس کے علاوہ، این ایچ اے آئی نے اپنے علاقائی دفاتر کو ایڈوانس ٹریفک مینجمنٹ سسٹم (اے ٹی ایم ایس) کی تمام اکائیوں کا فوری آڈٹ کرنے کی ہدایت دی ہے۔
