گاندھی نگر

گجرات کے انتہائی متوقع اور پُرعزم کلپسر پروجیکٹ کو اب نئی رفتار ملنے کی امید بڑھ گئی ہے۔ وزیر اعظم  مودی کے حالیہ نیدرلینڈ دورے کے دوران اس منصوبے کے حوالے سے اہم پیش رفت ہوئی ہے۔ نیدرلینڈ کے عالمی شہرت یافتہ آبی نظم و نسق کے ڈھانچے ’’افسلاوٹڈائک‘‘ کے معائنے کے بعد ہندوستان اور نیدرلینڈ کے درمیان تکنیکی تعاون پر ایک اہم اتفاق رائے قائم ہوا ہے۔

وزیر اعظم مودی نے نیدرلینڈ کے وزیر اعظم کے ساتھ افسلاوٹڈائک بند کا دورہ کیا۔ یہ بند دنیا کے کامیاب ترین آبی نظم و نسق ماڈلز میں شمار کیا جاتا ہے۔ گجرات کے کلپسر پروجیکٹ اور اس ڈچ منصوبے کے درمیان کئی تکنیکی مماثلتیں بتائی جا رہی ہیں۔ وزیر اعظم مودی نے وہاں استعمال ہونے والی ٹیکنالوجی کو سیکھنے کے قابل قرار دیا۔اس دوران ہندوستان کی وزارت جل شکتی اور نیدرلینڈ کی وزارت انفراسٹرکچر و آبی نظم و نسق کے درمیان ایک لیٹر آف انٹینٹ پر دستخط بھی کیے گئے۔ اس معاہدے کے تحت دونوں ممالک کلپسر پروجیکٹ کے سلسلے میں تکنیکی تعاون کریں گے۔ مانا جا رہا ہے کہ اس سے طویل عرصے سے رکے ہوئے اس منصوبے کو نئی سمت ملے گی۔

کلپسر پروجیکٹ وزیر اعظم مودی کے اُن بڑے خوابوں میں شامل ہے، جس کا تصور انہوں نے گجرات کے وزیر اعلیٰ رہتے ہوئے پیش کیا تھا۔ گجرات طویل عرصے سے خشک سالی اور بے قاعدہ بارش جیسے مسائل سے دوچار رہا ہے۔سردار سروور ڈیم  نے ریاست کو کافی راحت دی، لیکن مستقبل کی آبی سلامتی کو مدنظر رکھتے ہوئے کلپسر جیسے عظیم منصوبے کی ضرورت محسوس کی گئی۔

اس منصوبے کے تحت خنبھات کی کھاڑی پر ایک بڑا بند تعمیر کیا جائے گا۔ اس کا مقصد اُن سات دریاؤں کے پانی کو محفوظ کرنا ہے جو اس وقت سمندر میں جا کر مل جاتے ہیں۔ منصوبے کے مطابق یہاں میٹھے پانی کا ایک وسیع ذخیرہ تیار کیا جائے گا۔ اس کے ساتھ ساتھ مدّ و جزر سے توانائی پیدا کرنے، آبپاشی اور نقل و حمل کے نیٹ ورک کو بھی فروغ دیا جائے گا۔

سال 2004 میں نریندر مودی کی قیادت میں بھاونگر میں سمندری سروے کا آغاز کیا گیا تھا تاکہ بند کی ممکنہ ساخت اور سمت کا تعین کیا جا سکے۔ تاہم، منصوبے کی پیچیدہ تکنیکی چیلنجوں کے باعث اس کی رفتار سست رہی۔ حکومت مسلسل ان مسائل کے حل کے لیے کوششیں کرتی رہی ہے۔

حال ہی میں گجرات کے وزیر اعلیٰ  بھوپیندر پٹیل نے نیدرلینڈ کی سفیر مارِسا گیرارڈس کے ساتھ ملاقات کر کے اس منصوبے پر تفصیلی گفتگو کی تھی۔ اس میں ہندوستان اور نیدرلینڈ کے ماہرین کے مشترکہ گروپ کی تشکیل اور سرکاری شراکت داری پر اتفاق کیا گیا تھا۔کلپسر پروجیکٹ کے نافذ ہونے کے بعد سوراشٹر کے نو اضلاع کے 42 تعلقوں میں تقریباً 10 لاکھ ہیکٹیئر زمین کو آبپاشی کا فائدہ ملنے کی امید ہے۔ اس کے علاوہ جنوبی گجرات اور سوراشٹر کے درمیان فاصلہ 240 کلومیٹر سے کم ہو کر صرف 60 کلومیٹر رہ جائے گا۔

اس منصوبے سے تقریباً 1500 میگاواٹ ہوا سے توانائی اور 1000 میگاواٹ شمسی توانائی پیدا ہونے کی بھی توقع ظاہر کی جا رہی ہے۔ اس کے ساتھ سیاحت اور ماہی گیری کی صنعت کو بھی فروغ ملے گا۔تفصیلی پروجیکٹ رپورٹ میں سب سے اہم حصے ’’کلوزر میتھوڈولوجی‘‘ کو تیار کرنے میں نیدرلینڈ کی مشہور سمندری انجینئرنگ کمپنی رائل ہاسکوننگ کی مہارت حاصل کی گئی ہے۔ دوسری جانب افسلاوٹڈائک منصوبہ گزشتہ 90 برسوں سے سمندری بند تعمیر اور سیلاب پر قابو پانے کی عالمی مثال سمجھا جاتا ہے۔

ہندوستان کی وزارت خارجہ کے مطابق، یہ شراکت داری آبی نظم و نسق، موسمیاتی موافقت اور پائیدار بنیادی ڈھانچے کے شعبوں میں ہندوستان اور نیدرلینڈ کی مشترکہ وابستگی کو ظاہر کرتی ہے۔ ماہرین کا ماننا ہے کہ ڈچ ٹیکنالوجی اور تجربہ گجرات کے اس ڈریم پروجیکٹ کو حقیقت میں بدلنے میں بڑی مدد فراہم کرے گا۔