نئی دہلی: مغربی بنگال کی وزیرِ اعلیٰ اور ترنمول کانگریس (ٹی ایم سی) کی سربراہ ممتا بنرجی نے ایس آئی آر (SIR) کے معاملے پر الیکشن کمیشن کو سخت تنقید کا نشانہ بنایا ہے۔ انہوں نے کہا کہ انہوں نے اپنی زندگی میں کبھی اتنا گھمنڈی اور جھوٹا الیکشن کمیشن نہیں دیکھا۔ چیف الیکشن کمشنر گیانیش کمار سے ملاقات کے بعد ممتا بنرجی نے الزام لگایا کہ بی جے پی کے اشارے پر بنگال میں لوگوں کے نام ووٹر لسٹ سے ہٹائے جا رہے ہیں۔

اس دوران بنگال کی وزیرِ اعلیٰ نے سیاہ لباس پہن کر الیکشن کمیشن کے خلاف احتجاج بھی کیا۔ مغربی بنگال کی وزیرِ اعلیٰ ممتا بنرجی نے پارٹی کے ایک وفد کے ساتھ ایس آئی آر کے مسئلے پر چیف الیکشن کمشنر گیانیش کمار سے ملاقات کی۔ ممتا بنرجی نے کہا کہ بنگال کے عوام اپنی شکایات الیکشن کمیشن کے سامنے رکھنے آئے ہیں، لیکن انہیں دھمکیاں دی جا رہی ہیں۔ انہوں نے بنگ بھون احاطے کے باہر بھاری پولیس تعیناتی پر بھی سوال اٹھائے۔

تاہم، انہوں نے واضح کیا کہ وہ پولیس کو نہیں بلکہ اوپر بیٹھے لوگوں کو اس کا ذمہ دار ٹھہراتی ہیں۔ سی ای سی گیانیش کمار سے ملاقات کے بعد ممتا بنرجی نے کہا، “مجھے بہت دکھ ہوا ہے۔ میں طویل عرصے سے دہلی کی سیاست میں رہی ہوں۔ میں چار بار وزیر اور سات بار رکنِ پارلیمان رہی ہوں۔ میں نے کبھی ایسا الیکشن کمشنر نہیں دیکھا جو اتنا مغرور اور اتنا جھوٹا ہو۔

انہوں نے کہا، میں نے چیف الیکشن کمشنر سے کہا کہ میں آپ کی کرسی کا احترام کرتی ہوں، کیونکہ کوئی بھی کرسی مستقل نہیں ہوتی، ایک دن آپ کو جانا ہی ہوگا۔ بنگال کو ہی کیوں نشانہ بنایا جا رہا ہے؟ انتخابات جمہوریت میں ایک تہوار ہوتے ہیں، لیکن آپ نے 58 لاکھ لوگوں کے نام ہٹا دیے اور انہیں اپنا دفاع کرنے کا موقع تک نہیں دیا۔

#WATCH | Delhi: West Bengal CM Mamata Banerjee comes out of the Election Commission Office in Delhi.

She says, ".... If you had to do SIR, you should have left the election-bound states and done it with proper planning, but you didn't. You have a BJP government in Assam. You… pic.twitter.com/Xrw95HNjSa

— ANI (@ANI) February 2, 2026

ممتا بنرجی نے کہا، اگر آپ کو ایس آئی آر کرنا ہی تھا تو انتخابی ریاستوں کو چھوڑ کر بہتر منصوبہ بندی کے ساتھ کرنا چاہیے تھا، لیکن ایسا نہیں کیا گیا۔ آسام میں بی جے پی کی حکومت ہے، وہاں ایس آئی آر نہیں کیا گیا، لیکن مغربی بنگال اور تمل ناڈو میں کیا گیا۔ آپ نے ہمارے ساتھ کیا کیا؟ آپ نے 58 لاکھ لوگوں کے نام ووٹر لسٹ سے ہٹا دیے۔ یہاں بہت زیادہ گڑبڑی اور غلط میپنگ ہے۔

انہوں نے مزید کہا، اگر 2022 میں ہم سے ایس آئی آر کے نام پر ہمارے والد کے پیدائشی سرٹیفکیٹ مانگے جاتے تو یہ ممکن نہیں تھا۔ پہلے بچے گھروں میں پیدا ہوتے تھے، اسپتالوں میں نہیں۔ اپنے وزیرِ اعظم سے پوچھئے کہ کیا ان کے پاس اپنے والدین کی ادارہ جاتی پیدائش (انسٹی ٹیوشنل ڈیلیوری) کے سرٹیفکیٹ موجود ہیں؟