نئی دہلی: سپریم کورٹ نے جمعہ کو مرکزی حکومت اور نیشنل ٹیسٹنگ ایجنسی (این ٹی اے) کو ہدایت دی کہ وہ نیٹ۔یو جی پرچہ لیک کے بعد مجوزہ اصلاحات پر عمل درآمد کی پیش رفت سے متعلق ایک تازہ اور جامع حلف نامہ داخل کریں۔یہ ہدایت فیڈریشن آف آل انڈیا میڈیکل ایسوسی ایشن (فائما) اور دیگر کی جانب سے دائر ان درخواستوں کی سماعت کے دوران دی گئی جن میں این ٹی اے کے نظام میں بنیادی اصلاحات کا مطالبہ کیا گیا ہے۔

عدالت نے کہا کہ حلف نامے میں یہ واضح کیا جائے کہ مجوزہ اصلاحات کو مستقل ادارہ جاتی نظام کی شکل دینے کے لیے کیا اقدامات کیے گئے ہیں۔ اس میں شفافیت۔ ڈیجیٹل بنیادی ڈھانچے۔ سکیورٹی۔ انتظامیہ۔ انسانی وسائل اور کمپیوٹر بیسڈ ٹیسٹنگ (سی بی ٹی) کی جانب منتقلی سے متعلق پیش رفت کی تفصیلات شامل ہوں۔مرکز کی جانب سے پیش ہوتے ہوئے سالیسٹر جنرل تشار مہتا نے بنچ کو یقین دلایا کہ حکومت امتحانی نظام کو مضبوط بنانے کے لیے "10 اضافی قدم" اٹھا رہی ہے اور عدالت کی جانب سے اٹھائے گئے تمام نکات پر مشتمل نیا حلف نامہ داخل کرے گی۔

جسٹس پی ایس نرسمہا اور جسٹس الوک آرادھے پر مشتمل بنچ نے حکومت کی درخواست منظور کرتے ہوئے وقت دیا لیکن واضح کیا کہ اصلاحات پر عمل درآمد کی مسلسل نگرانی کی جائے گی۔بنچ نے کہا۔"ہم اس معاملے کو اسی طرح جاری نہیں رہنے دے سکتے۔"عدالت نے آئندہ پیر کو معاملے کی دوبارہ سماعت مقرر کی۔

عدالت نے نوٹ کیا کہ نیٹ۔یو جی پرچہ لیک کے بعد قائم کی گئی ہائی پاورڈ کمیٹی اپنی سفارشات پیش کر چکی ہے۔ تاہم حکومت کے موجودہ حلف نامے میں ان سفارشات پر عمل درآمد کی پیش رفت واضح طور پر بیان نہیں کی گئی۔

جسٹس پی ایس نرسمہا نے سماعت کے دوران کہا۔"مکمل ادارہ جاتی نظام قائم کرنا ضروری ہے۔ یہ عارضی انتظامات ہمیں مسلسل پریشان کرتے رہے ہیں۔"عدالت نے مرکز کو ہدایت دی کہ وہ مجوزہ گورننگ بورڈ۔ ماہرین پر مشتمل یونٹس۔ مختلف فریقوں کی نامزدگی اور شعبہ جاتی ماہرین کی تقرری سے متعلق تفصیلات بھی پیش کرے اور یہ واضح کرے کہ یہ ادارہ جاتی ڈھانچہ کس طرح کام کرے گا اور اس کے قیام میں کتنی پیش رفت ہوئی ہے۔

سپریم کورٹ نے ہائی پاورڈ کمیٹی کی جانب سے نشاندہی کیے گئے تمام 10 شعبوں میں اصلاحات کی موجودہ صورت حال پر بھی تفصیلی رپورٹ طلب کی۔ ان میں ڈیجیٹل بنیادی ڈھانچہ۔ تحقیق و ترقی۔ شفافیت۔ سکیورٹی۔ انتظامیہ اور انسانی وسائل شامل ہیں۔عدالت نے سکیورٹی۔ نگرانی اور ویجلنس کے لیے مقرر کیے گئے نئے ایڈیشنل ڈائریکٹر جنرلز کے کردار۔ ذمہ داریوں اور اب تک کی پیش رفت کی تفصیلات بھی طلب کیں۔

عدالت نے اصلاحاتی عمل کا ایک اہم حصہ قرار دیتے ہوئے امتحان کے تینوں مراحل یعنی امتحان سے پہلے۔ امتحان کے دوران اور امتحان کے بعد کیے جانے والے اقدامات کی مکمل رپورٹ پیش کرنے کی ہدایت دی۔امتحان سے پہلے کے مرحلے کے لیے عدالت نے ریاستی اور ضلعی حکام کے ساتھ امتحانی نظام کی جانچ سے متعلق پیش رفت کی معلومات مانگیں۔ اس کے علاوہ متعدد مرحلوں میں امتحان منعقد کرنے کی تجویز۔ امتحانی مراکز۔ سوالیہ پرچوں کی تیاری اور ان کی چھپائی اور نقل و حمل سے متعلق اصلاحات کی تفصیلات بھی طلب کیں۔

گزشتہ سال کے پرچہ لیک کے بعد اختیار کیے گئے ہنگامی انتظامات پر سوال اٹھاتے ہوئے جسٹس نرسمہا نے کہا کہ سوالیہ پرچوں کی نقل و حمل کے لیے بھارتی فضائیہ کی خدمات اس وقت کی مجبوری تھی لیکن اسے مستقل نظام نہیں بنایا جا سکتا۔

انہوں نے کہا۔"بھارتی فضائیہ کو گزشتہ واقعات کی وجہ سے تعینات کیا گیا تھا۔ یہ صرف عارضی انتظام تھا۔ مستقل نظام قائم ہونا چاہیے۔"عدالت نے کمپیوٹر بیسڈ ٹیسٹنگ کی جانب منتقلی کو بھی اصلاحات کا نہایت اہم حصہ قرار دیتے ہوئے حکومت سے اس کا مکمل منصوبہ۔ عمل درآمد کا روڈ میپ۔ امتحانی ڈیٹا کی منتقلی اور محفوظ رکھنے کے طریقہ کار اور ڈیٹا کے تحفظ کے لیے مجوزہ حفاظتی اقدامات کی تفصیلات طلب کیں۔

ڈیجیٹل سکیورٹی کی اہمیت پر زور دیتے ہوئے جسٹس نرسمہا نے کہا کہ امتحانی نظام کی سالمیت کا انحصار امتحانی ڈیٹا کے محفوظ انتظام پر ہے اور اگر اس میں کسی قسم کی کوتاہی ہوئی تو پورا نظام متاثر ہو جائے گا۔

انہوں نے کہا۔"جب ڈیٹا محفوظ نہیں رہتا تو پرچہ لیک ہوتا ہے اور پورا نظام ناکام ہو جاتا ہے۔"عدالت نے امیدواروں کی شناخت کی تصدیق کے لیے ڈیجی یاترا جیسی ٹیکنالوجی کے استعمال سے متعلق تجویز پر بھی حکومت سے تفصیلات طلب کیں اور کہا کہ موجودہ حلف نامے میں اس سفارش کا کوئی ذکر نہیں ہے۔جسٹس نرسمہا نے کہا۔"ہم ادارہ جاتی نظام کے تناظر میں وقت صرف کر رہے ہیں۔ تجویز کیا ہے۔ اس پر عمل درآمد کیسے ہوگا۔"مرکز کے اس یقین دہانی کرانے کے بعد کہ آئندہ سماعت سے قبل جامع حلف نامہ داخل کیا جائے گا عدالت نے کہا۔"ہم اس پورے عمل کی کڑی نگرانی کریں گے۔ ہم یقینی بنائیں گے کہ ادارہ جاتی نظام قائم ہو اور سال بھر اس کی نگرانی جاری رکھیں گے۔"